တောကြက်မောက် နှင့် ကြက်မောက်ပန်း

Celosia L.,

Celosia argentea L.,

Common name: silver cock's comb,

Family. Amaranthaceae

ဒီအပင်လေးတွေရဲ့ဒေသအမည်က တောကြက်မောက်ဖြစ်သည်။ မျိုးရင်း Amaranthaceae ထဲပါဝင်သည်၊ Amaranthaceae ဆိုသည့် Family က ကျနော်တို့နှင့်မစိမ်းလှပါ။ နေ့စဉ်နီးပါးစားသုံးနေသည့် ဟင်းနုနွယ် အပင်များ၊ ဘုရားပန်းတင်သည့် ကြက်မောက်ပန်းများ၊ မညှိုးလုံးပန်းများ၊ နောက်ပိုးမြက်များ၊ ရွက်နားထောင်းပင်၊ အီဆူးပင်၊ အုံးဖွဲပင်၊ အလှစိုက်ရွက်လှ စသည်ဖြင့် မျိုးစုများစွာပါသည့် မျိုးရင်းကြီးတခုဖြစ်သည်။ ယခုတွေ့ရသည့် တောကြက်မောက်ပင်တွေက အရိုင်းပေါက်သည်။ အဖြူရောင် ပန်းခိုင်အလုံးတွေပွင့်သည်။ ခုတ်မနိုင်သော ပေါင်းဖြစ်သည်။ တောင်သူတွေစိတ်ညစ်ရသည့် အပင်ဖြစ်သည်။ သို့သော် ဒီအပင်တွေက ကျွဲနွားစာအတွက်အသုံးဝင်သည်။ ရနံ့မရှိ အများအားဖြင့် ပုရွက်ဆိတ် အနက်များဖြင့် ဝတ်မှုံကူးကြသည်။ သေချာတာတစ်ခုကတော့ ပန်းအားလုံး petals ပွင့်ချပ်မရှိကြပါ။ အလှအပကို bracts ပွင့်ခံရွက် များကသာ တာဝန်ယူထားသည်။

ကလေးမှာတာဝန်ကျစဉ်က အနီရောင် Celosia အနွယ်ဝင် အပင်တွေအများကြီးတွေ့ခဲ့ဖူးသည်။ အဖြူကတော့ အညာမှာပိုပေါသည်။ အအေးပိုင်း ချင်းပြည်တစ်ဝိုက်မှာ အိမ်တိုင်းလိုလို ကြက်မောက်ပန်းရောင်စုံကို အလှစိုက်သည့် ဓလေ့ရှိသည်။ အိမ်ရှေ့မှာ အနီအဝါ ကြက်မောက်ပန်းကြောင့် အိမ်လေးတွေက နေချင့်သဖွယ်ဖြစ်ရသည်။ အညာဖက်မှာတော့ ကြက်မောက်ပန်းစိုက်တာတွေ့ရခဲသည်။ အဖြူ၊ အနီ အပင် နှစ်ပင်၏ morphology က ဘာမှမကွဲပြား အရောင်သာကွဲပြားသည်။

တစ်နှစ်ခံ သို့မဟုတ် နှစ်ရှည်ခံပင်ပျော့တွေဖြစ်သည်။ အရွက်တွေက ရွက်ထီး ရွက်လွှဲ ထွက်ကြသည်။ ပန်းခိုင်က spiciform ဖြစ်နေသည်၊ ပန်းပွင့်လေးတွေကသေးငယ်သည်၊ လိင်စုံသည်၊ bracts ပွင့်ခံရွက် ပွင့်ညှာရွက် bracteoles တွေပါသည်၊ ပန်းပွင့်မှာ ပွင့်ချပ်မပါဘဲ ပွင်ရွက်အုံ perienth ပါသည်၊ segments ၅ခုပါသည်၊ ဝတ်ဆံဖို ၅ ခုပါသည်၊ အချင်းချင်း စုဆက်နေပြီး အခြေမှာ ပြွန်ဖြစ်နေသည်၊ အနက်ရောင်ပြောင်လက်သော ပြားသော အစေ့ပါသည်။

မျိုးခွဲခြားပုံ

ပင်စည် အစိမ်းရောင် ပန်းပွင့် အဖြူ သို့မဟုတ် ပန်းနုရောင်ကို Celosia argentia တောကြက်မောက် ဟုခေါ်သည်။ ပင်စည်အရွက်တွေက scarlet အနီရောင် အရောင်စုံပန်းတွေက အနီ သို့မဟုတ် အဝါဆိုလျှင် Celosia crista ကြက်မောက် ဖြစ်သည်။

Google မှာ Celosia လို့ ရိုက်ထည့်လိုက်လျှင် အလွန်လှသည့် Celosia မျိုးကွဲ varieties တွေ အများကြီးကျလာမှာပါ။ မေမြို့ကန်တော်ကြီးမှာကျင်းပတော့မည့် ပန်းပွဲတော်မှာလည်း Celosia မျိုးစိတ်များစွာ ပါဝင်လို့နေသည်။ အရောင်အသွေး စုံလင်လှပြီး တစ်ခါပွင့်လျှင်ရက်ပေါင်းများစွာပွင့်တတ်တာမို့ ဥယျာဉ်စိုက်ပျိုးသူများအလွန်သဘောကျသည့် ပန်းပင်လည်းဖြစ်သည်။

လူအတော်များများ မြင်ဖူးသော်လည်း အမည်နှင့် အပင်မတွဲမိကြပါဘူး။

ကဲ..မိတ်ဆွတို့ ရေ...Celosia ပန်းလေးတွေရဲ့ အလှကို ခံစားကြည့်ရအောင် ။

အားလုံးကျမ်းမာကြပါစေ။

ကိုသက်နိုင်ဦး

ဟုမ္မလင်း

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။