စက်ဖြင့် ရေစုပ်တင်ရာ၌ ရေစုပ်စက်နှင့်ပိုက်များအား မှန်ကန်သောအနေအထားတွင် တပ်ဆင်အသုံးပြုရန် လိုအပ်ပါသည်။ ရေစုပ်စက်များကို စုပ်ယူမည့်ရေမျက်နှာပြင်နှင့် နီးကပ်စွာထားလျှင် ရေစုပ်ခြင်းနှင့် ရေထုတ်ခြင်းကို ပိုမိုကောင်းမွန်စေသည်။ ရေစုပ်စက်ကိုရှေ့နောက် ဘယ်ညာမစောင်းစေဘဲ ညီညာသောအနေအထားဖြင့် ချထားရမည်။ ယင်းသို့ချထားပြီးနောက် စက်နှိုးသောအခါ လှုပ်ရှား၊ ရွေ့လျားမသွားစေရန် ငုတ်များဖြင့် လိုအပ်သလို ရိုက်စွဲထားရပါသည်။ မညီညာဘဲ တဖက်စောင်းနေခဲ့ပါက အင်ဂျင်အတွင်းရှိ စက်ဆီများကောင်းစွာ မလည်ပတ်သဖြင့် အင်ဂျင်အစိတ်အပိုင်းများလျှင်မြန်စွာ ပွန်းစားပြီး ပျက်စီးတတ်သည်။ ရေစုပ်ပိုက်သည် ကောက်ကွေးနေလျှင် ဖြစ်စေ တစ်နေရာရာတွင် ရေစုပ်စက်ထက်ပို၍မြင့်နေလျှင်ဖြစ်စေ ပိုက်အတွင်း၌ လေခိုနေတတ်သဖြင့် ရေစုပ်စက်စွမ်းအားလျော့နည်းစေသည်။
ရေထုတ်ပိုက်၏ အနေအထားမှာ မှန်ကန်ရန်လိုအပ်ပါသည်။ ရေထုတ်ပိုက်သည် ရေစုပ်စက်မှ ရေထုတ်ပေးသည့်နေရာအထိ တဖြည်းဖြည်းမြင့်၍ သွားခြင်း သို့မဟုတ် နိမ့်၍သွားခြင်းသည် အကောင်းဆုံးဖြစ်သည်။ မြေမျက်နှာပြင်အနေအထား အနိမ့်အမြင့် အနည်းငယ်ရှိပါက ရေထုတ်စွမ်းအားကို မထိခိုက်နိုင်ပါ။ အချို့နေရာများတွင် အလွန်မြင့်သော အနေအထားမှ အလွန်နိမ့်သော အနေအထားသို့ပြောင်းသွားပါက ပိုက်ထဲတွင် လေခိုနေတတ်သဖြင့် ရေအထွက်လျော့နည်းစေသည်။
#Crd ရေဆင်းစိုက်ပျိုးရေးတက္ကသိုလ်
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။