ဂျင်း ပြည်ပတင်ပို့မှု အခက်အခဲရှိနေခြင်းကြောင့် ဈေးကွက်ကမောက်ကမဖြစ်နေ

ယခင်က ဂျင်း အများဆုံး ဝယ်ယူနေသည့် ဘင်္ဂလားဒေ့ရှ်နိုင်ငံသို့ အောင်ပန်း-တောင်ကုတ် လမ်းကြောင်းမှ တင်ပို့ခဲ့ကြပြီး လက်ရှိတွင် အဆိုပါလမ်းပိုင်းမှတစ်ဆင့် တင်ပို့ရန် အခက်အခဲများရှိနေခြင်းကြောင့် ဂျင်းဈေးကွက် အထိနာနေကြောင်း သိရသည်။

"လွန်ခဲ့တဲ့ သုံးနှစ်လောက်ကတည်းက ဘင်္ဂလားဒေ့ရှ်ဘက်ကို မတင်ပို့နိုင်တော့တာပါ။ ဒါကြောင့် ဂျင်းဈေးကွက်လည်း အရင်လို မကောင်းတော့ဘူး။ ပြည်တွင်းစားသုံးမှုလောက်ပဲ ရှိတယ်။ ရေကြောင်းလိုင်းနဲ့ပို့ရင်လည်း ကုန်ကျစရိတ်များတယ်။ ဘာပဲဖြစ်ဖြစ် နောက်နှစ်လည်း လျှော့စိုက်ရမယ့် ကုန်စည်တစ်မျိုးပါပဲ" ဟု အောင်ပန်းမှ ကုန်သည်တစ်ဦးက ပြောသည်။

လက်ရှိတွင် မြေဖြူဂျင်းဥမ တစ်ပိဿာလျှင် ၅၀၀ မှ ၇၀၀ ကျပ်ကြားသာရှိပြီး မြေနီဂျင်းဥမ တစ်ပိဿာလျှင် ၁,၀၀၀ မှ ၂,၀၀၀ ကျပ် ပတ်ဝန်းကျင်တွင် ရှိကြောင်း သိရသည်။

ထို့ကြောင့် လက်ရှိဈေးကွက်မှာ ကမောက်ကမဖြစ်နေပြီး တချို့ကုန်သည်များမှာလည်း အဝယ်နားထားကြကြောင်း သိရသည်။

"လက်ရှိ ဈေးကွက်မှာ ဂျင်းဥမ တစ်မျိုးတည်း ရှိတယ်။ ဈေးကွက်က အရင်နှစ်တွေလောက်တော့ ဘယ်ကောင်းမလဲ၊ ဘယ်ဈေးရမလဲ။ အခြေအနေ မကောင်းတော့ ပြည်ပကို တင်ပို့လို့လည်း မရဘူး။ လျှော့ချစိုက်ပျိုးလိုက်ရင် ဈေးကွက်မှာ ကုန်မပေါတော့ ဈေးရသင့်ရထိုက်တာ ရနိုင်တာပေါ့" ဟု ရှမ်းပြည်နယ်မှ ကုန်စိမ်းရောင်းဝယ်သူတစ်ဦးက ပြောသည်။

လက်ရှိတွင် ပြည်တွင်းစားသုံးမှုပမာဏကို ကျော်လွန်ကာ စိုက်ပျိုးထုတ်လုပ်မှုများ ရှိနေသဖြင့် လျှော့ချစိုက်ပျိုးရန် ဈေးကွက်နားလည်သူများက အကြံပြုထားကြသည်။

ဈေးကွက်တွင် မကြာမီ ဂျင်းဥမရာသီ ကုန်ဆုံးကာ ဂျင်းတက်ဝင်ချိန် ရောက်ရှိလာတော့မည်ဖြစ်ပြီး ဂျင်းခြောက်မှာမူ ဝယ်လိုအား အနည်းငယ်ရှိနေသော်လည်း ဈေးမကိုက်သဖြင့် အရောင်းအဝယ် ပါးနေကြောင်းလည်း သိရသည်။

လွန်ခဲ့သောနှစ်များက ဂျင်းဥမ တစ်ပိဿာလျှင် ၇,၀၀၀ မှ ၈,၀၀၀ ကျပ်ကြား ရှိခဲ့ပြီး ယခုအခါ ဈေးအလွန်အမင်း ကျဆင်းနေခြင်းဖြစ်ကြောင်း သိရသည်။

အောင်ပန်းကုန်စည်ဒိုင်သို့ တောင်ကြီး၊ ဟဲဟိုး၊ ပင်းတယ၊ ရွာငံ၊ နမ်းစံ၊ လွိုင်လင်ဘက်မှ ဂျင်းများ ဝင်ရောက်လျက်ရှိပြီး အထွက်နှုန်းများလည်း မြင့်တက်နေကြောင်း သိရသည်။

လက်ရှိတွင် ဂျင်းကို ရှမ်းပြည်နယ်မှတစ်ဆင့် ဘင်္ဂလားဒေ့ရှ်သို့ တိုက်ရိုက်တင်ပို့နိုင်ခြင်း မရှိသဖြင့် ရန်ကုန်ဘက်မှတစ်ဆင့် သင်္ဘောဖြင့်လည်းကောင်း၊ ကွန်တိန်နာဖြင့်လည်းကောင်း၊ စင်္ကာပူနိုင်ငံမှတစ်ဆင့်လည်းကောင်း တင်ပို့နေကြရကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။