ငါးခြောက်ကုန်ကြမ်းတင်သွင်းခွင့် ရပ်ဆိုင်းထားမှုကြောင့် ငါးခြောက်ပွဲရုံ (၆၀) ရာခိုင်နှုန်းနီးပါး လုပ်ငန်းများ ရပ်ဆိုင်း

ပြည်ပနိုင်ငံများမှ ငါးခြောက်ကုန်ကြမ်းတင်သွင်းခွင့် ရပ်ဆိုင်းထားမှုကြောင့် ငါးခြောက်ပွဲရုံ (၆၀) ရာခိုင်နှုန်းနီးပါး လုပ် ငန်းများ ရပ်ဆိုင်းထားရကြောင်း မြန်မာနိုင်ငံ ငါးပိ၊ ငါးခြောက်နှင့် ငံပြာရည်ထုတ်လုပ်ရောင်းချသူများအသင်းမှ သိရသည်။

ငါးခြောက်ကုန်ကြမ်းကို ပြည်ပမှ တရားဝင်တင်သွင်းခွင့်အတွက် ငါးလုပ်ငန်းဦးစီးဌာနနှင့် မြန်မာနိုင်ငံငါးလုပ်ငန်းအဖွဲ့ချုပ်တို့မှ ထောက်ခံချက် ထုတ်ပေးထားသော်လည်း ပြည်တွင်း၌ ဖမ်းဆီးရရှိခြင်းမရှိသော ငါး၊ ပုစွန်မျိုးစိတ်များကိုသာ တင်သွင်းရန် ထုတ်ပြန်ပြီးသည့်နောက် ၂၀၁၈ ခု နှစ် နိုဝင်ဘာလမှ စတင်ကာ ကုန်သွယ်ရေးဦးစီးဌာနက ငါးခြောက်ကုန်ကြမ်း တင်သွင်းခွင့်လိုင်စင်ထုတ်ပေးခြင်းကို ရပ်ဆိုင်းခဲ့ခြင်းဖြစ်သည်။

“ငါးခြောက်ပွဲရုံလုပ်ငန်းရှင် (၃၀၀) လောက်အထိရှိတယ်။ အခုဘယ်လိုဖြစ်နေလဲဆိုရင် ငါးခြောက်ကုန်ကြမ်းရရှိမှု နည်းလာတဲ့အတွက် ပွဲရုံ (၅၀) လောက်ပဲ အလုပ်ရပြီးတော့ လုပ်ငန်းရှင် (၂၀၀) လောက်က အလုပ်ရရှိမှုနည်းလာတယ်။ ကုန်သွယ်ရေးဦးစီးဌာနကနေ တရားဝင် တင်သွင်းခွင့်အတွက် လိုင်စင်ထုတ်မပေးတဲ့အတွက် အောက်လမ်းကနေပဲ လုပ်ငန်းရှင် (၁၀၀) လောက် အလုပ်ရဖို့အတွက်ကို လုပ်နေရတယ်။ မဖြစ်မနေလို့သာ အခွန်ပေးနေရတာ။ ဒီလောက်ကြီးကို မပေးချင်ဘူး။ ဒီလိုမလုပ်ဘူး၊ ဒီလိုမပေးဘူးဆိုလည်း ကျွန်တော့်ဆီက လုပ်ငန်းရှင်တွေ အလုပ်မရှိဘူး” ဟု မြန်မာနိုင်ငံ ငါးပိ၊ ငါးခြောက်နှင့် ငံပြာရည် ထုတ်လုပ်ရောင်းချသူများအသင်းဥက္ကဋ္ဌ ဦးစိုးနိုင်ဝင်းက ပြော သည်။

ပြည်တွင်း၌ ကုန်ကြမ်းလိုအပ်ချက်မြင့်တက်လာ၍ ငါးခြောက်ထုတ်လုပ်ရောင်းချနေသည့် လုပ်ငန်းရှင် (၃၀၀) ဝန်း ကျင်အနက် လုပ်ငန်းရှင်(၂၀၀) ဝန်းကျင်မှာ လုပ်ငန်းများရပ်ဆိုင်းထားရကြောင်း သိရသည်။

ယခင် ပြည်ပမှတင်သွင်းသည့် ငါးခြောက်ကုန်ကြမ်း ပေ (၄၀) ကွန်တိန်နာ (၁)လုံးလျှင် အစိုးရသို့ အခွန်ကျပ် ၁၅ သိန်းဝန်းကျင်သာ ပေးသွင်းရပြီး ယခုအခါ ထိုင်းနိုင်ငံမှတစ်ဆင့် ပြန်လည်တင်သွင်းနေရသဖြင့် ကုန်ကျစရိတ် ၃ ဆနီးပါးဖြစ်သည့် ကျပ် (၄၅) သိန်နီးပါးအထိ ရှိလာကြောင်း သိရသည်။

“ကျွန်မတို့ရဲ့ ငါးလုပ်ငန်းကဏ္ဍတစ်ခုလုံး ပြိုလဲနိုင်တဲ့အတွက် ဘာပဲလုပ်လုပ် တရားဝင်လုပ်ပါ။ တရား ဝင်လုပ်တဲ့ နည်းကိုလည်း ကျွန်မတို့ကို လာမေးပါ။ ကျွန်မတို့လည်း ငါးဦးစီးကို မေးပြီးတဲ့အခါမှာ တရားဝင်က ဒါလုပ်လို့ရတယ်။ ဒီလိုသွင်းပါ။ ဒီလိုလုပ်ပါ ဆိုပြီးတော့ Guide Line ပေးလို့ ရပါတယ်။ အဲ့ဒါကြောင့် ဘာပဲလုပ်လုပ် ဥပမာ ငါးတန်သွင်းတယ်ပေါ့။ တရားမဝင်သွင်းတဲ့အခါ ငါးတန်မှာ ရောဂါ ပါလာရင် ဟိုဘက်တိုင်းပြည် ပြန်ရောင်းရင် ပြည်တွင်းကငါးလား၊ ပြည်ပကသွင်းတဲ့ငါးလားဆိုပြီး မသိနိုင်တဲ့အတွက် လုပ်ထုံးလုပ်နည်းအတိုင်းပဲ လုပ်ကြပါ"ဟု မြန်မာနိုင်ငံ ငါးလုပ်ငန်းအဖွဲ့ချုပ် ဒုတိယဥက္ကဌ ဒေါက်တာတိုးနန္ဒာတင်က ပြောသည်။

ငါးခြောက်တင်သွင်းမှု ရပ်ဆိုင်းထားခြင်းနှင့် ပတ်သက်၍ မြန်မာနိုင်ငံ ငါးလုပ်ငန်းအဖွဲ့ချုပ်အနေဖြင့် ကုန်သွယ်ရေးဦး စီးဌာနမှ တာဝန်ရှိသူများနှင့် တွေ့ဆုံသည့်အခါ ယင်းကိစ္စရပ်အား ပြန်လည်ခွင့်ပြုပေးရန် တင်ပြသွားမည် ဖြစ်ကြောင်း သိရသည်။

အေးအေးမြင့်(ABM)