သင်္ဘောစိုက်ရန် စနစ်တကျမြေပြုပြင်နည်း

မြန်မာပြည်ရှိ သင်္ဘောစိုက်ပျိုးခြံအများစုသည် သမားရိုးကျ စိုက်ပျိုးနည်းဖြင့်သာ သင်္ဘောပင်များကို စိုက်ပျိုးလေ့ရှိကြပါသည်။ သင်္ဘောစိုက်တောင်သူတို့ မေ့နေကြသောအချက်မှာ စိုက်ပျိုးမြေ၏ အရေးပါမှုဖြစ်ပါသည်။  အထွက်နှုန်းကို အဓိကချုပ်ကိုင်ထားသည်မှာ မြေကြီးအရည်အသွေးဖြစ်ပေသည်။ ယခုဖော်ပြေပေးမည့်အကြောင်းအရာသည် သင်္ဘောပင်စိုက်ပျိုးရန် တစ်နိုင်တစ်ပိုင်ဖြစ်စေ စီးပွားဖြစ်ဖြစ်စေ စိုက်ပျိုးပါက အထွက်နှုန်းကို သိသိသာသာပြောင်းလဲနိုင်သော မြေပြုပြင်ခြင်းနည်းစနစ်လေးတစ်ခုဖြစ်ပါသည်။ ဧကလိုက်စိုက်ပျိုးသူများအတွက် ရည်ရွယ်၍ ရေးထားသော်လည်း အိမ်တွင်တစ်နိုင်တစ်ပိုင် စိုက်သူများလဲ အောက်ပါနည်းစနစ်လေးအတိုင်း မြေကြီးကို တိုက်ရိုက်ကျင်းတူး မစိုက်ပဲ ထိုမြေကို မြေဆွေးပြန်လုပ်ပြီးမှ စိုက်ပျိုးကြည့်နိုင်ပါသည်။

ဧကလိုက် စိုက်ပျိုးသူအများစုမှာ စိုက်ဘောင်ဖြင့်စိုက်ပျိုးကြသော်လည်း ကျွန်တော်ယခုအကြံပေးမည့် ကျင်းတူးမြေပြင်စနစ်လေးဖြင့် စမ်းသပ်စိုက်ပျိုးကြည့်ဖို့ တိုက်တွန်းချင်ပါသည်။ ကျင်းတူးမြေပြင်ပြီးမှသာ မိုးများလွန်းသောဒေသများ၌ ဘောင်ပြန်လုပ်စိုက်ပါခင်ဗျာ။

အထွက်တိုး သင်္ဘောပင်စိုက်ပျိုးရန် အဆင့်(၄) ဆင့်ဖြင့် မြေပြင်ခြင်း

ပထမအဆင့်၌ မြေကိုပြုပြင်ရာတွင် နှစ်ပေပတ်လည်၊ နှစ်ပေအနက်ကျင်းကို တူးရပေမည်။ ကျင်းတစ်ကျင်းစီကို ဝါးရွက်အမှိုက်ဆွေးများ ပြည့်အောင် ထည့်ပေးရမည်။ ထို့နောက် မီးသင်းပေးရမည်။ ပြီးပါက ကျင်းထဲ ရေထည့်ပေးရပါမည်။ နောက်တစ်နေ့ အထက်ပါကဲ့သို့ တစ်ဖန်ပြန်လုပ်ရမည်။

ဒုတိယအဆင့်မှာတော့ တူး၍ရရှိလာသော မြေကြီးများကို သင်္ဘောကျင်း လေးကျင်း၏ အလယ်၌ စုပုံထားပြီး မြေဆွေးပြုလုပ် နှပ်ထားရမည်။ စုပုံထားသော မြေကြီးများကို မြေဆွေးဖြစ်အောင် ပြုလုပ်ပုံမှာ တူး၍ရရှိလာသော မြေကြီးနှစ်ဆ ဝါးရွက် သစ်ရွက် တစ်ဆနှင့် စက်ဖွဲပြာ တစ်ဆကို ရောမွှေပေးရပါမည်။ (မိမိမှာ တိရစ္ဆာန်ချေး အလွယ်တကူရှိပါက ထည့်ပေးနိုင်ပါသည်။) ဧကလိုက်စိုက်ပျိုးသူများအဖို့ ကျင်းလေးကျင်း၏ အလယ်တွင်စုပုံထားရမည် ဖြစ်သောကြောင့် အလွယ်တကူပြုလုပ်နိုင်ပေသည်။

တတိယအဆင့်အနေနဲ့ ရေအစိုဓာတ် သင့်အောင် ဖြန်းပေးရမည်။ ထိုသိုဖြန်းရာ၌ သဘာဝအားဆေးဖြင့် ရောကာ အထက်ပါမြေဆွေးပုံကို ဖြန်းပေးရမည်။ သဘာဝအားဆေးများသုံးရာတွင် ငါးအမိုင်နိုအက်ဆစ် အီးအမ် သစ်သီးအချဉ်ဖောက်ရည် မိမိ၌ အလွယ်ရနိုင်သော အားဆေးရည်ကို အသုံးပြုပေးနိုင်ပါသည်။ ဖော်ပြပါအားဆေးများမရှိပါက တင်လဲရည်ကိုသာ ရေဖြင့်ရော၍ ဖြန်းပေးနိုင်ပါသည်။ အကျိုးပြုအဏုဇီဝပိုးများကို ပိုမိုပေါက်ဖွားနိုင်အောင် အစာကျွေးခြင်း သဘောဖြစ်ပါသည်။

စတုတ္ထအဆင့်တွင် ထိုသို့ပြုလုပ်ပြီးသော မြေကို အပေါ်မှာ တစ်ခုခုမိုးပေးဖိပေးရပါမည်။ သတိပြုရမည့်အချက်မှာ နေလုံးဝထိတွေ့ခြင်း မရှိရပါဘူး။ နေထိမယ်ဆိုရင်တော့ လိုအပ်သော စနစ်တကျမြေပြင်ခြင်းမျိုးမရနိုင်တော့ပါဘူး။ ပလက်စတစ်အမဲ မရှိပါက အနည်းဆုံး ကောက်ရိုးထူထူဖြင့် အုပ်ပေးရန်လိုအပ်ပါသည်။

တစ်ပတ်ကိုတစ်ခါ အထက်အောက်လှန်၍ ရေအစိုဓာတ်ကြည့်ကာ ရေဖြန်းပေးခြင်းမျိုး ပြုလုပ်ပေးရန် လိုအပ်ပါသည်။ နှစ်ပတ်ခန့်အကြာမှာ ဝါးရွက်လေးများကို စစ်ဆေးကြည့်ပါ။ အဖြူရောင် မှိုစလေးများ တွေ့ရပါလိမ့်မည်။ တစ်လခွဲခန့်အကြာမှာဆိုရင် ထိုမြေဆွေးပုံကို ကျင်းများအား ပြန်ဖြည့်ပေးနိုင်ပါပြီ။ သင်္ဘောပင်ကိုလည်း စတင်မြေချစိုက်ပျိုးရန် အသင့်ဖြစ်နေသောအရွယ်နှင့် တိုက်နေပါသည်။ သင်္ဘောပင်တစ်လခွဲနှင့် မြေဆွေးတစ်လခွဲ စိုက်ပျိုးရန် အရန်သင့်ဖြစ်စေရန် သင်္ဘောပင် စတင်ပျိုးသည့်နေ့မှစ၍ မြေဆွေးပုံကို ပြုလုပ်သင့်ပါသည်။

အထက်ပါ အဆင့်လေးဆင့်ဖြင့် မြေကို စနစ်တကျပြုပြင်ပြီးစိုက်ပျိုးပါက မိမိတစ်နိုင်တစ်ပိုင် စိုက်ပျိုးသည်ဖြစ်စေ၊ စီးပွားဖြစ်စိုက်ပျိုးသည်ဖြစ်စေ အထွက်နှုန်းမှာ ၃၀ ရာခိုင်နှုန်းမှ ၅၀ ရာခိုင်နုန်းအထိ တိုးနိုင်ကြောင်း အသိပေးနှိုးဆော်လိုက်ရပါသည်။