သိထားသင့်သမျှ သွေးတိုးရောဂါအကြောင်း

သွေးတိုးတယ်ဆိုတာဘာလဲ?

    သွေးများဟာ ရေမော်တာတစ်လုံးကဲ့သို့ လုပ်ဆောင်ပေးသော နှလုံးရဲ့ညှစ်အားဖြင့် ခန္ဓာကိုယ်တစ်ခုလုံးသို့ လှည့်ပတ်နေတာဖြစ်ပါတယ်။ နှလုံးမှ အားတစ်ခုနဲ့ ပို့လွှတ်လိုက်တဲ့သွေးတွေဟာ သွေးလွှတ်ကြောတွေထဲသို့ တွန်းကန်ဝင်ရောက်လာရပါတယ်။ သွေးလွှတ်ကြောများထဲသို့ အားတစ်ခုနဲ့ တွန်းကန်ဝင်ရောက်လာတဲ့ ရောက်ရတဲ့ သွေးဖိအားပမာဏတိုင်းတာခြင်းကို သွေးပေါင်ချိန်လို့ ခေါ်ပါတယ်။ ပုံမှန်ရှိရမယ့် သွေးဖိအားပမာဏထက် ပိုပြီးမြင့်တက်လာတဲ့အခါ သွေးတိုးတယ်လို့ ခေါ်ပါတယ်။ သွေးကြောများကျဉ်းပါက သွေးဖိအားကို ပိုပြီးမြင့်တက်စေပါတယ်။ အချိန်ကြာလာတဲ့အခါ သွေးဖိအားများခြင်းဟာ ရောဂါလက္ခဏာတွေမပြသဘဲနဲ့တောင် သင့်ရဲ့သွေးကြာတွေနဲ့ ဦးနှောက်၊ နှလုံး၊ မျက်စိ၊ ကျောက်ကပ်ကဲ့သို့ အင်္ဂါအစိတ်အပိုင်းတွေကို ထိခိုက်စေနိုင်ပါတယ်။ ဒါကြောင့် သွေးတိုးခြင်းကို စောစီးစွာသိရှိဖို့ အရေးကြီးပါတယ်။ 

သွေးတိုးရောဂါကို ဘာကဖြစ်စေတာလဲ?

    သွေးတိုးရောဂါကို နှစ်မျိုးနှစ်စားခွဲခြားနိုင်ပြီး နှစ်မျိုးလုံးဟာ ဖြစ်ပေါ်စေတဲ့အကြောင်းရင်းတွေကွဲပြားပါတယ်။ 

ပထမအမျိုးအစားသွေးတိုးရောဂါ

    လူအများစုဟာ ပထမအမျိုးအစားသွေးတိုးရောဂါကို ခံစားနေရပါတယ်။ ဖြစ်စေတဲ့အကြောင်းအရင်း တိကျမှုမရှိပေမယ့် သိပ္ပံပညာရှင်တွေကတော့ ဖြစ်နိုင်ခြေရှိတဲ့အချက်တွေ ဖော်ထုတ်ထားပါတယ်။ 

မျိုးရိုးဗီဇ

    မျိုးဗီဇလက္ခဏာချို့ယွင်းမှုကြောင့် မိဘမျိုးရိုးစဉ်ဆက်တစ်ခုလုံး ရောဂါလက်ဆင့်ကမ်းသယ်ဆောင်လာတာမျိုး ဖြစ်နိုင်ပါတယ်။ 

ရုပ်ပိုင်းဆိုင်ရာပြောင်းလဲမှု

    ခန္ဓာကိုယ်မှာ ပြောင်းလဲမှုတစ်ခုဖြစ်လာတဲ့အခါ ပြဿနာအချို့ ရင်ဆိုင်ရတတ်ပါတယ်။ သွေးတိုးခြင်းဟာ ထိုပြဿနာတွေထဲကတစ်ခု ဖြစ်နိုင်ပါတယ်။ ဥပမာ - အသက်အရွယ်ကြီးရင့်လာမှုကြောင့် ကျောက်ကပ်အားနည်းပြီး ခန္ဓာကိုယ်မှ ဆားနဲ့ ရေဓာတ်တွေ မထိန်းချုပ်နိုင်တော့ဘဲ သွေးတိုးတာမျိုး ဖြစ်တတ်ပါတယ်။

ပတ်ဝန်းကျင်ကြောင့်

    ကျန်းမာရေးနဲ့မညီညွတ်တဲ့ စားသောက်မှုပုံစံနဲ့ ကိုယ်လက်လှုပ်ရှားမှုနည်းတာတွေက ကိုယ်အလေးချိန်တိုးလာစေပြီး သွေးတိုးရောဂါဖြစ်နိုင်ချေတွေကို မြင့်တက်စေပါတယ်။

ဒုတိယအမျိုးအစားသွေးတိုးရောဂါ

    ဒုတိယအမျိုးအစားဟာ ပထမအမျိုးအစားထက် ပိုပြီးပြင်းထန်ကြောက်စရာကောင်းပါတယ်။ ဒုတိယအမျိုးအစားသွေးတိုးရောဂါကို ဖြစ်ပေါ်စေတဲ့အကြောင်းအရင်းတွေကတော့

- ကျောက်ကပ်ရောဂါ

- အိပ်နေစဉ် အသက်ရှုလမ်းကြောင်းပိတ်ခြင်း

- မွေးရာပါ နှလုံးရောဂါ

- လည်ပင်းမှာရှိတဲ့ သိုင်းရွိုက်ဂလင်း ပြဿနာများ

- ဆေးဝါးအချို့မှီဝဲခြင်းကြောင့် ဘေးထွက်ဆိုးကျိုးများ

- မူးယစ်ဆေးဝါးသုံးစွဲမှုများ

- အရက်အလွန်သောက်သုံးခြင်း

- ကျောက်ကပ်အပေါ်မှာရှိတဲ့ အဒရီနယ်ဂလင်း ပြဿနာများ

- ခန္ဓာကိုယ်ရဲ့ ဟော်မုန်းစနစ်ပြဿနာများ

သွေးတိုးခြင်းရဲ့ ရောဂါလက္ခဏာတွေ

    သွေးတိုးရောဂါဟာ များသောအားဖြင့် ရောဂါလက္ခဏာမပြတတ်ဘဲ တိတ်ဆိတ်စွာရှိနေတတ်ပါတယ်။ နှစ်တွေအများကြီးကြာပြီး ရောဂါလက္ခဏာတွေထင်ရှားလာမှ သိကြရတာများပါတယ်။ ထိုအခါမှ ခေါင်းကိုက်ခြင်း၊ အသက်ရှူမဝခြင်း၊ နှာခေါင်းသွေးလျှံခြင်း၊ ခန္ဓာကိုယ် နီရဲပူလောင်လာခြင်း၊ မူးဝေခြင်း၊ ရင်ဘတ်အောင့်ခြင်း၊ အမြင်အာရုံဝေဝါးခြင်း၊ ဆီးထဲသွေးပါခြင်း အစရှိတဲ့ ပြင်းထန်လက္ခဏာတွေအဖြစ် ပေါ်ထွက်လာပါတော့တယ်။ ဒီလိုတွေဖြစ်လာရင် ပေါ့ပေါ့ဆဆမနေသင့်ပဲ ချက်ချင်းကုသမှုလိုအပ်ပါတယ်။ အထူးသဖြင့် မိသားစုဝင်မျိုးရိုးထဲမှာ နှလုံးရာဂါ၊သွေးတိုးရောဂါရှိပါက မကြာခဏ သွေးပေါင်ချိန်တိုင်းသင့်ပါတယ်။ 

သွေးပေါင်ချိန်ကို သိရှိနားလည်ခြင်း

    မိမိမှာဖြစ်ဖြစ် မိသားစုဝင်ထဲမှာဖြစ်ဖြစ် သွေးတိုးရောဂါရှိနေပြီဆိုတာ သိထားရင်တော့ ဆရာဝန်နဲ့ဆွေးနွေးပြီး သွေးပေါင်ချိန်တိုင်းစက်လေးတွေ အိမ်မှာဆောင်ထားသင့်ပါတယ်။ သွေးပေါင်ချိန်ပမာဏဟာ အပေါ်သွေး ၁၂၀၊ အောက်သွေး ၈၀ ထက်ပိုပြီး မြင့်တက်လာတဲ့အခါ သွေးတိုးတယ်လို့ ခေါ်ပါတယ်။ 

    အပေါ်သွေး ၁၈၀၊ အောက်သွေး ၁၂၀ ထက်ပိုပြီး ကျော်လွန်သွားပြီဆိုရင် အရေးပေါ်အခြေအနေဖြစ်ပါတယ်။ ဒီအခြေအနေမျိုးဖြစ်လာရင် အလျင်အမြန်ကုသမှုလိုအပ်ပါတယ်။ ရင်ဘတ်အောင့်တာ၊ အသက်ရှူရခက်လာတာ၊ အမြင်တွေဝေဝါးတာ၊ မူးဝေတာမျိုးတွေဖြစ်တတ်ပြီး ဆေးရုံအရေးပေါ်ခန်း ဝင်ရနိုင်ပါတယ်။

ကိုယ်ဝန်ဆောင်ခြင်းနှင့် သွေးတိုးရောဂါ

    သွေးတိုးရှိတဲ့ ကိုယ်ဝန်ဆောင်အမျိုးသမီးတွေမှာ နောက်ဆက်တွဲဆိုးကျိုးဖြစ်တဲ့ ကျောက်ကပ်နှင့် အသည်းထိခိုက်ခြင်းတွေ ခံစားရနိုင်ခြေ ပိုများပါတယ်။ လမစေ့ဘဲမွေးတာ၊ ကလေးပေါင်ချိန်မမှီတာတွေ ဖြစ်နိုင်တာကြောင့် အနီးကပ်ကျန်းမာရေးစောင့်ရှောက်မှုတွေ လိုအပ်ပါတယ်။ 

    အချို့အမျိုးသမီးတွေမှာတော့ အရင်က သွေးတိုးရောဂါမရှိဘဲ ကိုယ်ဝန် ၂၀ ပတ် လောက်ကစပြီး သွေးတိုးတဲ့ဝေဒနာကို ခံစားရနိုင်ပါတယ်။ ကိုယ်ဝန်ဆောင်ချိန်သွေးတိုးခြင်းဟာ ကလေးမီးဖွားပြီးချိန်မှာတော့ ပျောက်ကင်းသွားတတ်ပါတယ်။ ဒါပေမယ့် ကိုယ်ဝန်ဆောင်ချိန်သွေးတိုးခြင်းဟာ နောက်ပိုင်းမှာ သွေးတိုးရောဂါရရှိနိုင်ခြေကို မြင့်တက်လာစေပါတယ်။ 

သွေးတိုးခြင်းရဲ့ နောက်ဆက်တွဲပြဿနာတွေကို နောက်ဆောင်ပါးမှာ ပြောပြသွားပေးပါ့မယ်။