ဟင်းသီးဟင်းရွက်တွေကို ချက်ပြုတ်တဲ့အခါ အာဟာရဓာတ်တွေ မဆုံးရှုံးအောင် ဘယ်လိုလုပ်မလဲ?

ဟင်းသီးဟင်းရွက်တွေဟာ နေ့စဉ်စားသုံးသင့်တဲ့ အစားအစာတွေထဲမှာ အရေးပါတဲ့အခန်းကဏ္ဍက ပါဝင်ပါတယ်။ ဗီတာမင်၊ သတ္တုဓာတ်၊ အမျှင်ဓာတ်နဲ့ အခြားအပင်ထွက်အာဟာရဓာတ်တွေ ရရှိနိုင်တာ ကြောင့် ဟင်းသီးဟင်းရွက်အမျိုးမျိုးကို ပုံမှန်စားသုံးပေးခြင်းက ကျန်းမာရေးအတွက် အထောက်အကူ ပြုပါတယ်။

ဒါပေမယ့် ဟင်းသီးဟင်းရွက်တွေကို စားသုံးတဲ့အခါ ဘယ်လိုချက်ပြုတ်သလဲ ဆိုတာကလည်း အရေး ကြီးပါတယ်။ ဟင်းသီးဟင်းရွက်တွေမှာ ပါဝင်တဲ့ အာဟာရဓာတ်အချို့ဟာ ရေမှာပျော်ဝင်နိုင်တာ၊ အပူဒဏ်ကို အလွယ်တကူခံရနိုင်တာကြောင့် ရေအများကြီးအသုံးပြုခြင်း၊ အချိန်ကြာကြာချက်ပြုတ်ခြင်း တို့ကြောင့် အာဟာရဓာတ်အချို့ လျော့နည်းနိုင်ပါတယ်။

ဟင်းသီးဟင်းရွက်တွေရဲ့ အာဟာရဓာတ်မဆုံးရှုံးအောင် မီးဖိုချောင်မှာ လက်တွေ့လိုက်နာနိုင်တဲ့ အချက်တွေကို ဖော်ပြပေးထားပါတယ်။

မချက်ပြုတ်ခင်ကတည်းက အာဟာရကို ထိန်းသိမ်းပါ

အာဟာရဓာတ်ထိန်းသိမ်းရေးဟာ ချက်ပြုတ်မှ စတင်တာမဟုတ်ပါဘူး။ ဟင်းသီးဟင်းရွက်တွေကို ပြင်ဆင်တဲ့အဆင့်ကတည်းက ဂရုစိုက်ဖို့ လိုပါတယ်။

ဟင်းသီးဟင်းရွက်တွေကို မလှီးဖြတ်ခင် ရေနဲ့ သေချာဆေးကြောပါ။ လှီးဖြတ်ပြီးမှ ရေထဲမှာ အချိန်ကြာအောင် မစိမ်ထားပါနဲ့။

ရေမှာပျော်ဝင်နိုင်တဲ့ ဗီတာမင်အချို့ဟာ ရေထဲကို ရောက်သွားနိုင်တာကြောင့် ဖြစ်ပါတယ်။

ဟင်းသီးဟင်းရွက်ကို အရမ်းသေးငယ်အောင်မလှီးပါနဲ့

ချက်ပြုတ်ရလွယ်ကူစေဖို့ ဟင်းသီးဟင်းရွက်တွေကို လှီးဖြတ်ရပေမယ့် အရမ်းသေးငယ်အောင် လှီးဖြတ်ဖို့ မလိုအပ်ပါဘူး။

ဟင်းသီးဟင်းရွက်ကို အလွန်သေးငယ်အောင် လှီးလိုက်တဲ့အခါ ရေနဲ့ထိတွေ့နိုင်တဲ့ မျက်နှာပြင်ဧရိယာ ပိုများလာနိုင်ပါတယ်။ အာဟာရတွေပိုဆုံးရှုံးနိုင်ပါတယ်။ ဒါကြောင့် ချက်မယ့်ဟင်းလျာနဲ့ သင့်တော်တဲ့ အရွယ်အစားအတိုင်း လှီးဖြတ်ပေးတာက ပိုကောင်းပါတယ်။

ရေအများကြီးနဲ့ အချိန်ကြာကြာ မပြုတ်ပါနဲ့

ဟင်းသီးဟင်းရွက်တွေကို ရေအများကြီးနဲ့ အချိန်ကြာကြာပြုတ်တဲ့အခါ ရေမှာပျော်ဝင်နိုင်တဲ့ ဗီတာမင် အချို့ဟာ ပြုတ်ရည်ထဲကို ရောက်သွားနိုင်ပါတယ်။

အထူးသဖြင့် ဗီတာမင် စီ ဟာ ရေမှာပျော်ဝင်နိုင်ပြီး အပူဒဏ်ကိုလည်း ခံနိုင်ရည်နည်းတဲ့ ဗီတာမင်တစ်မျိုး ဖြစ်ပါတယ်။

ဒါကြောင့် ဟင်းသီးဟင်းရွက်ကို ပြုတ်စားမယ်ဆိုရင်

ရေကို လိုအပ်သလောက်သာ အသုံးပြုပါ။

အချိန်အကြာကြီး မပြုတ်ပါနဲ့။

နူးရုံလောက် ရှိတဲ့အချိန်မှာ ချက်ပြုတ်မှုကို ရပ်ပါ။
(ဟင်းချို၊ ဟင်းရည်လိုမျိုး ပြုတ်ရည်ကိုပါ စားသုံးတဲ့ဟင်းလျာဆိုရင်တော့ ပြုတ်ရည်ထဲကို ရောက်သွားတဲ့ အာဟာရဓာတ်အချို့ကိုပြန်လည်စားသုံးမိမှာဖြစ်ပါတယ်။)

အာဟာဓာတ်တွေ အပြည့်ရရှိအောင် "ပေါင်း" ခြင်းကိုလည်း ရွေးချယ်နိုင်ပါတယ်

ဟင်းသီးဟင်းရွက်တွေကို "ပေါင်း"ခြင်းဟာ ရေနဲ့တိုက်ရိုက်ထိတွေ့မှုကို လျှော့ချနိုင်တဲ့ ချက်ပြုတ်နည်း တစ်ခု ဖြစ်ပါတယ်။

ပန်းဂေါ်ဖီ၊ မုန်လာဥနီ၊ ရုံးပတီသီး၊ ပဲတောင့်ရှည်နဲ့ အခြားဟင်းသီးဟင်းရွက်အချို့ကို ပေါင်းပြီး နူးရုံ လောက်မှာ စားသုံးနိုင်ပါတယ်။

ဟင်းသီးဟင်းရွက်ကို အရမ်းနူးအိပြီး အရောင်ပြောင်းသွားတဲ့အထိ ချက်ပြုတ်ဖို့ မလိုအပ်ပါဘူး။

အချိန်တိုအတွင်း အမြန်ကြော်နိုင်ပါတယ်

ဟင်းသီးဟင်းရွက်အချို့ကို ဆီအနည်းငယ်နဲ့ အချိန်တိုအတွင်း အမြန်ကြော်ခြင်းကလည်း လက်တွေ့ အသုံးပြုနိုင်တဲ့ ချက်ပြုတ်နည်းတစ်ခု ဖြစ်ပါတယ်။

“အစိမ်းစားမှ အာဟာရအပြည့်ရမယ်” ဆိုတာ မဟုတ်ပါ

ဟင်းသီးဟင်းရွက်တွေကို အစိမ်းစားရင် အာဟာရပိုရမယ်လို့ ယူဆတတ်ကြပါတယ်။ တကယ်တော့ ဟင်းသီးဟင်းရွက်အမျိုးအစားနဲ့ အာဟာရဓာတ်အမျိုးအစားပေါ်မူတည်ပြီး ချက်ပြုတ်ခြင်းရဲ့ သက် ရောက်မှုက မတူညီနိုင်ပါဘူး။

အချို့ဟင်းသီးဟင်းရွက်တွေဟာ ချက်ပြုတ်လိုက်တဲ့အခါမှသာ ၄င်းတို့ရဲ့ အာဟာရဓာတ်တွေကို ခန္ဓာကိုယ်က ပိုမိုအသုံးချနိုင်တာလည်း ရှိပါတယ်။

ဒါကြောင့် ဟင်းသီးဟင်းရွက်အားလုံးကို အစိမ်းစားဖို့ မလိုသလို၊ အာဟာရဓာတ်တွေ ဆုံးရှုံးမှာစိုးလို့ ချက်ပြုတ်ခြင်းကို ရှောင်ဖို့လည်း မလိုအပ်ပါဘူး။

အရေးကြီးတာက ဟင်းသီးဟင်းရွက်အမျိုးအစားနဲ့ သင့်တော်တဲ့ ချက်ပြုတ်နည်းကို ရွေးချယ်ဖို့ ဖြစ်ပါ တယ်။

အရောင်စုံလင်အောင် စားသုံးပါ

ဟင်းသီးဟင်းရွက်အမျိုးအစားစုံလင်အောင် စားသုံးပေးဖို့ကလည်း အရေးကြီးပါတယ်။

ဥပမာ—

အစိမ်းရောင် — ကန်စွန်းရွက်၊ ဟင်းနုနွယ်၊ မုန်ညင်းရွက်

အဝါရောင်/လိမ္မော်ရောင် — ဖရုံသီး၊ မုန်လာဥနီ

အနီရောင် — ခရမ်းချဉ်သီး

ခရမ်းရောင် — ခရမ်းသီး၊ ခရမ်းရောင်ဂေါ်ဖီထုပ်

စတဲ့ အရောင်စုံလင်တဲ့ ဟင်းသီးဟင်းရွက်တွေကို အလှည့်ကျ စားသုံးနိုင်ပါတယ်။

အရောင်မတူတဲ့ ဟင်းသီးဟင်းရွက်တွေမှာ ပါဝင်တဲ့ အာဟာရဓာတ်နဲ့ အပင်ထွက်ဒြပ်ပေါင်းတွေလည်း မတူညီနိုင်တာကြောင့် အမျိုးအစားစုံလင်အောင် စားသုံးခြင်းက ပိုမိုမျှတတဲ့ အစားအစာပုံစံကို ရရှိစေ ပါတယ်။

အိမ်မှာ လက်တွေ့လိုက်နာနိုင်တဲ့ အချက် ၅ ချက်

ဟင်းသီးဟင်းရွက်တွေကို ပြင်ဆင်ချက်ပြုတ်တဲ့အခါ အောက်ပါအချက်တွေကို မှတ်ထားနိုင်ပါတယ်။

၁။ မလှီးခင် ရေဆေးပါ။

၂။ လှီးပြီးသား ဟင်းသီးဟင်းရွက်တွေကို ရေထဲမှာ အချိန်ကြာကြာ မစိမ်ထားပါနဲ့။

၃။ လိုအပ်တာထက် ပိုမိုသေးငယ်အောင် မလှီးပါနဲ့။

၄။ ရေအများကြီးနဲ့ အချိန်ကြာကြာ မပြုတ်ပါနဲ့။

၅။ ပေါင်းခြင်း၊ အချိန်တိုအတွင်း အမြန်ကြော်ခြင်း စတဲ့ သင့်တော်တဲ့ ချက်ပြုတ်နည်းတွေကို ရွေးချယ်ပါ။

ထို့အပြင် ဟင်းသီးဟင်းရွက်တစ်မျိုးတည်းကို အားမကိုးဘဲ အမျိုးအစားစုံလင်အောင် စားသုံးပေး ဖို့လည်း အရေးကြီးပါတယ်။

အာဟာရကောင်းမွန်တဲ့ အစားအစာတစ်နပ်ရဖို့အတွက် ဟင်းသီးဟင်းရွက်ကို ရွေးချယ်တဲ့အချိန်ကနေ စားသုံးတဲ့အချိန်အထိ နည်းမှန်လမ်းမှန်နဲ့ ကိုင်တွယ်ပြင်ဆင်ဖို့ လိုအပ်ပါတယ်။

ဆောင်းပါးရှင်ဆရာမှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။