စလင်းချောင်းရေကြီးမှုကြောင့် ချောင်းရိုးအနိမ့်ပိုင်းတစ်လျှောက်ရှိ ကြက်သွန်စိုက်ခင်းများ ပျက်စီး

24/03/2022 14:55 PM တွင် အစိမ်းရောင်လမ်း အစိမ်းရောင်လမ်း မှ ရေးသား

ပြီးခဲ့တဲ့ရက်တွေအတွင်း အချိန်အခါမဟုတ်မိုးရွာသွန်းမှုတွေဖြစ်ခဲ့ပြီး မကွေးတိုင်းဒေသကြီး၊ စလင်းမြို့နယ်ရှိ စလင်းချောင်းအတွင်း ရေကြီးရေလျှံမှုတွေကြောင့် ချောင်းရိုးအနိမ့်ပိုင်းတစ်လျှောက်ရှိ ကြက်သွန်စိုက်ခင်းများ ပျက်စီးခဲ့တယ်လို့ သိရပါတယ်။ 

မကွေးတိုင်း၊ စလင်းမြို့နယ်၊ ကျွန်းရင်းအုပ်စုထဲက စလင်းချောင်း အနိမ့်ပိုင်းမြေတွေမှာ စိုက်ထားတဲ့ ကြက်သွန်စိုက်ခင်းပျက်စီးမှုတင် ဧက ၂၀၀ ခန့် ရှိတယ်လို့ ဒေသခံတစ်ဦးထံက သိရပါတယ်။

“ ဒီချောင်းစမ်းခင်းမှာစိုက်တဲ့ ကြက်သွန်တွေအားလုံး၊ မျိုးထုတ်တဲ့မျိုးနှံအားလုံးဟာ တစ်ပင်တစ်လုံးမှရရှိခြင်း မရှိတော့ပါဘူးခင်ဗျာ။ ဒီစလင်းချောင်းရိုးတစ်လျှောက်က ချောင်းရေကြီးမှု ကြောင့် ခု ၂၀၂၂ ကြက်သွန်ရာသီမှာ တောင်သူများဆုံးရှုံးနစ်နာမှုကတော့ တစ်ပြားတစ်ချပ်မှကို ရရှိမယ့်အနေအထား မရှိတော့ပါဘူးခင်ဗျာ” လို့ ကျွန်းရင်းရွာက ဒေသခံတစ်ဦးဖြစ်သူ ကိုအောင်လွင်ဦးက သူ့ရဲ့ ဖေ့စ်ဘုတ်အကောင့်မှာ ရေကြီးနေတဲ့ ဗီဒီယိုဖိုင်နဲ့တကွ ပြောပြထားပါတယ်။

အခုလို ဆောင်းကြက်သွန်စိုက်ပျိုးသူတွေအနေနဲ့ မြေဆီဖိုး၊ စက်ဆွဲခ၊ စိုက်ခ၊ ပျိုးခ၊ ရင်းနှီးခတွေတွက်ကြည့်ပါက ဝါးကွက်တစ်ရာ(ဝါးကွက်တစ်ကွက် ၁၀ တောင်ပတ်လည်ခန့်) ကို အနည်းဆုံး အရင်းအနှီး ငါးသိန်းအထက်ရှိပြီး ဧကနဲ့တွက်ရင်တော့ တစ်ဧက အရင်းအနှီး အနည်းဆုံး ၇ သိန်းခွဲကျော် ဆုံးရှုံးကြတာဖြစ်တယ်လို့ ကိုအောင်လွင်ဦးက ဆိုပါတယ်။ 

စလင်းချောင်းအတွင်း ဆောင်းကြက်သွန်စိုက်ခင်းတွေကို ဇန်နဝါရီ၊ ဖေဖော်ဝါရီ လောက်မှာ စတင်စိုက်ပျိုးကြတာဖြစ်ပြီး ပုံမှန်အားဖြင့်တော့ ချောင်းရိုးအတွင်း ရေရှိလေ့မရှိဘဲ အခုကတော့ အချိန် အခါမဟုတ်မိုးတွေကြောင့် တောင်ကျရေတွေကတဆင့် ချောင်းအတွင်းရေကြီးရေဖုံးလွှမ်းမှုရှိသွားတာဖြစ်တယ်လို့ သိရပါတယ်။ 

အခုပျက်စီးတဲ့စိုက်ခင်းတွေဟာ ချောင်းရိုးအတွင်း အနိမ့်ပိုင်းမှာစိုက်ထားတဲ့အခင်းတွေဖြစ်ပြီး ကုန်း ပိုင်းတွေမှာ စိုက်ထားတဲ့စိုက်ခင်းတွေကတော့ ပျက်စီးမှုမရှိဘူးလို့ သိရပါတယ်။

“ စလင်းချောင်းက ရေစီးသန်တယ်ဗျ။ ဒါပေမဲ့ နွေဘက်ဆိုရင်တော့ ရေလာရိုးမရှိဘူး။ ခုဟာက မမျှော်လင့်တဲ့ ပြဿနာပေါ့” လို့ စလင်းမြို့နယ်ဘက်မှာ အလုပ်လုပ်ကိုင်ခဲ့ဖူးသူ စိုက်ပျိုးရေးပညာ ရှင် ဦးသာပိုက ပြောပါတယ်။

ချောင်းရေကြီးတာက အရှိန်နဲ့တိုက်စားသွားတာဖြစ်လို့ ပြန်လည်ကုစားဖို့ခက်ပြီး မြစ်ရေဖုံးတာမျိုး ဆိုရင်တော့ ဆိုးဆိုးရွားရွားမျိုးမဟုတ်ရင် ပြန်လည်ကုစားနိုင်တယ်လို့ ဦးသာပိုက ရှင်းပြပါတယ်။

“ မြစ်ရေလိုမျိုးဆိုရင်တော့ တဖြည်းဖြည်းတိုးတာမျိုးဆိုတော့ ရေပြန်ကျသွားလို့ အခြေအနေ မဆိုး သေးရင် ပြန်ကုစားလို့ရနိုင်သေးတယ်။ နုန်းတွေကို လူအားနဲ့ဖယ်ပစ်တာမျိုး။ ထွန်ခြစ်နဲ့ ဆွဲပစ်တာ မျိုးပေါ့။ ပြီးရင် အပင်တွေပေါ် နုန်းတွေရှိနေရင် ဆေးဖျန်းပုံးနဲ့ရေဆေးချ။ နုန်းစင်သွားရင် မန်ကိုဇက်လို မှိုသတ်ဆေးတစ်မျိုးမျိုးဖျန်း၊ ငါးရက်လောက်နေရင် အားဆေးတစ်မျိုးမျိုးလိုက်။ ဒါဆို ရင်တော့ ပြန်ထောင်နိုင်တယ်။ ချောင်းရေကတော့ အပင်တွေကို တိုက်စားပစ်တာမျိုးဆိုတော့ ပြန်ကုစားလို့ မရဘူး” လို့ ဦးသာပိုက ဆိုပါတယ်။

မန္တလေးတိုင်းဒေသကြီး၊ မြင်းခြံမြို့နယ်ရှိ ဆင်တဲဝချောင်းဘက်မှာလည်း ရေကြီးမှုကြောင့် ချောင်းရိုးတစ်လျှောက်ရှိ ကြက်သွန်စိုက်ခင်းအချို့ ရေနစ်မြုပ်မှုတွေရှိခဲ့တယ်လို့ သိရပါတယ်။ 

မတ် ၂၀ ရက်ကစလို့  မြန်မာနိုင်ငံကို ဖြတ်သန်းခဲ့တဲ့ မုန်တိုင်းငယ်အရှိန်ကြောင့် တိုင်းနဲ့ပြည်နယ်အားလုံးရှိ ဒေသအများစုမှာ အချိန်အခါမဟုတ် မိုးရွာသွန်းမှုတွေဖြစ်ပေါ်ခဲ့တာဖြစ်ပါတယ်။

လက်ရှိမှာတော့ ရန်ကုန်ဈေးကွက်မှာ လက်ကားဈေးအနေနဲ့ ကြက်သွန်တစ်ပိဿာကို ကျပ် ၈၅၀ ဝန်းကျင်မှာ ရှိနေတယ်လို့ သိရပါတယ်။

ဓာတ်ပုံခရက်ဒစ် - သားဘုန်း နှင့် Aung Lwin Oo FB

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

 

 


ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...
Read more Facebook စာမျက်နှာသို့သွားရန်

ဆွေးနွေးချက်များ

ဆွေးနွေးရန်