ဓာတုဓာတ်ကြွင်းမပါတဲ့ ပဲတီစိမ်းများကို တရုတ်ကပြန်လည်ဝယ်ယူပေးမည်..

တရုတ်နိုင်ငံမှ မြန်မာ့ပဲတီစိမ်း ပြန်လည်၀ယ်ယူမည်ဆိုသည့် သတင်းကြောင့် ပြည်တွင်းဈေးကွက်တွင် ပဲတီစိမ်း အမျိုးအစားအချို့ ဈေးမြင့်တက်လာကြောင်း ဈေးကွက်အတွင်းမှ စုံစမ်းသိရှိရသည်။

ပြီးခဲ့သည့် လများက ပိုးသတ်ဆေးဓာတ်ကြွင်းများနေခြင်းကြောင့် ပဲတီစိမ်းတန်ချိန်၁၀,၀၀၀ ကျော်ကို ပြန်လည်ပို့ဆောင်သည့်ဖြစ်စဉ်အပြီး တရုတ်နိုင်ငံမှမြန်မာ့ ပဲတီစိမ်းအ၀ယ်ရပ်လိုက်သည်။ ထို့နောက် နှစ်နိုင်ငံအစိုးရတာ၀န်ရှိသူများ ညှိနှိုင်းပြီးနောက် တရုတ်နိုင်ငံမှ ပြန်လည်၀ယ်ယူ‌ပေးခြင်းဖြစ်သည်။

ထိုသို့တရုတ်နိုင်ငံမှ ပဲတီစိမ်း ပြန်လည်၀ယ်ယူမည့် သတင်းကြောင့် ပြည်တွင်းဈေးကွက်တွင် ပဲတီစိမ်း (အညာ)က တစ်ပိဿာလျှင်ကျပ်၅,၁၆၅/၅,၁၈၅မ ကျပ် မှ ၅,၅၀၀/၅,၅၂၀သို့ ဈေးမြင့်တက်လာသည်။ ထို့အပြင် ပြည်ပရောင်းချသည့် FOB ဈေးကလည်း ပဲတီစိမ်း FAQ(အညာ)တစ်တန်လျှင် အမေရိကန်ဒေါ်လာ ၈၇၀/၈၈၀ မှ ၉၁၀/၉၂၀သို့ ဈေးမြင့်တက်သည်။

မြန်မာနိုင်ငံတွင်စိုက်ပျိုးထုတ်လုပ်သည့် ပဲတီစိမ်းကို တရုတ်ဈေးကွက်အပြင် အိန္ဒိယ၊ ဥရောပသမဂ္ဂ (အီးယူ)အဖွဲ့၀င်နိုင်ငံများကိုလည်း တင်ပို့ရောင်းချသည်။

ယခုနှစ်တွင် အိန္ဒိယနိုင်ငံက မြန်မာ့ပဲတီစိမ်းကို မတ်ပဲ၊ ပဲစင်းငုံကဲ့သို့ အခွန်မဲ့၀ယ်ယူတင်သွင်းမည့် အစီစဉ်အား ပယ်ဖျက်ကြောင်းကို အိန္ဒိယ မီဒီယာအချို့က ဖော်ပြကြသည်။

ထို့ကြောင့် မြန်မာ့ပဲတီစိမ်းသည် အီးယူနှင့် တရုတ်ဈေးကိုသာအဓိက ဦးတည်ရောင်းချရမည့် အခြေအနေမျိုးဖြစ်သည်။ အီးယူနိုင်ငံများမှ ၀ယ်လိုအားက နည်းခြင်းကြောင့် တရုတ်ဈေးကွက်က အ‌ရေးပါလာသည်။

တစ်နှစ်လျှင် တန်ချိန် ၁ သန်းကျော် စိုက်ပျိုးထုတ်လုပ်သည့် မြန်မာ့ပဲတီစိမ်းကို တရုတ်ဈေးကွက်က ၆၀ ရာခိုင်နှုန်းကျော် ဈေးကွက်‌ဝေစု ရယူထားသည်။ ထို့ကြောင့်တရုတ်ဈေးကွက်သည် မြန်မာနိုင်ငံမှ ပဲတီစိမ်းစိုက်ပျိုးသည့် တောင်သူလယ်သမားများအတွက် အဓိကအခန်း ကဏ္ဍမှပါ၀င်နေသည်။

ထိုကြောင့် ဆောင်းပဲတီစိမ်း စိုက်ပျိုးမည့်တောင်သူများအနေဖြင့် မိမိစိုက်ပျိုးသော သီးနှံကို GAPစနစ်ဖြင့် စိုက်ပျိုးပြီး ပိုးသတ်ဆေးများအပါအဝင် ဓာတုဆေးများသုံးစွဲမှုကိုလည်း စနစ်တကျထိန်းသိမ်းဆောင်ရွက်ရန် တင်ပို့ရောင်းချသူများက အကြံပြုထားသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။