ထွက်နှုန်းနည်းပါးလာချိန်ဖြစ်သဖြင့် ကွမ်းနုဝါဈေးများ မြင့်တက်နေ

ထွက်နှုန်းတစ်စစနှင့် နည်းပါးလာချိန်ဖြစ်သဖြင့် ကွမ်းနုဝါဈေးများ မြင့်တက်နေကြောင်း မြန်မာနိုင်ငံအလယ်ပိုင်းရှိ ကွမ်းနုဝါစိုက်ပျိုးထုတ်လုပ်သူများထံမှ သိရသည်။

ကွမ်းစျေးကွက် ကောင်းနေပါတယ်။ အထွက်နည်းချိန်မို့ပါ။ မိုးရာသီမှာ မိုးများဒေသက ကွမ်းခြံတွေ ရောဂါကျ ပျက်စီးခဲ့ပြီး အထွက်နှုန်းထိခိုက်သွားသလို၊ ဆောင်းရာသီမှာ အထွက်နည်းတာနဲ့ ပေါင်းလိုက်တော့ ကုန်ရှားသွားတာပေါ့။ ဝယ်လိုအားနဲ့ ရောင်းလိုအား မမျှတတော့ ကွမ်းစျေးက တက်တာပေါ့။ ဆောင်းရာသီမှာ ရာသီအေးတော့ ကွမ်းထွက်နည်းသွားတာပါ။ မိုးရာသီလောက် မထွက်တော့ဘူးလေ။

ဟု စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့၊ နန္ဒဝန်ရပ်ကွက်မှ ကွမ်းနုဝါ စီးပွားဖြစ်စိုက်ပျိုးထုတ်လုပ်နေသူ ဦးဝင်းနိုင်က ပြောသည်။

နှစ်စဉ်နှစ်တိုင်း နိုဝင်ဘာလမှ ဖေဖော်ဝါရီလအတွင်း ကာလများသည် ကွမ်းခြံများ အထွက်နှုန်းနည်းသည့် ကာလများဖြစ်ကြပြီး၊ ယခု (၂)လတာ ကာလအတွင်း ကွမ်းနုဝါဈေးနှုန်းများ ထပ်တက်နိုင်ခြေရှိနေကြောင်း သိရသည်။

ကွမ်းဈေးကတော့ ဒီထပ်ပိုတက်စရာ ရှိနေသေးတယ်။ ကိုဗစ်ကြောင့်၊ လမ်းခရီးအသွားအလာအခက်အခဲကြောင့် ဒေသစုံ နေရာစုံကို ကွမ်းမရောက်သေးလို့ စျေးကနည်းနေသေးတာပါ။ ကုန်စည်စီးဆင်းမှု နှေးကွေးနေလို့ပေါ့။ မြန်ဆန်လာရင် စျေးဒီထက် တက်နိုင်သေးတယ်။ စျေးအမြင့်ဆုံးကတော့ ဇန်နဝါရီလပိုင်းလောက်ပါ။ အဲ့ဒီကာလမှာ ကွမ်းရှားရင် လက်ကားဈေးတောင် တစ်ပိဿာကို ကျပ်တစ်သောင်းကျော်လောက်အထိ တက်သွားတတ်ပါတယ်။ လက်လီဈေးကတော့ အခုတောင် တစ်သောင်းကျော်လောက် ရှိနေတယ်။

ဟု ဦးဝင်းနိုင်က ဆက်လက်ပြောသည်။

လက်ရှိ မြန်မာနိုင်ငံအလယ်ပိုင်း ကွမ်းနုဝါဈေးကွက်အတွင်း ကွမ်းနုဝါရှယ်ဆိုဒ် တစ်ပိဿာလျှင် ၆၅၀၀/၇၀၀၀ကျပ်၊ ကွမ်းနုဝါ အလတ်စ တစ်ပိဿာလျှင် ၄၅၀၀/၅၀၀၀ ကျပ်၊ ကွမ်းနုဝါ အညံ့စ တစ်ပိဿာလျှင် ၃၅၀၀/၄၀၀၀ ကျပ် လက်ကားဈေးနှုန်းများဖြင့် ရောင်းဝယ်ဖောက်ကားနေကြကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။