မြန်မာပြည်အထက်ပိုင်း ကွမ်းနုဝါဈေးကွက် အတက်ဘက်သို့ ဦးတည်လာ

၂၀၂၁ ခုနှစ်၊ အောက်တိုဘာလ တတိယပတ်မှ စတင်၍ မြန်မာပြည်အထက်ပိုင်းရှိ ကွမ်းရွက် (ကွမ်းနုဝါ) ဈေးနှုန်းများ အတက်ဘက်သို့ စတင်ဦးတည်လာကြောင်း ဒေသခံကွမ်းရွက်ခြံများထံမှ သိရသည်။

"အောက်ပြည်ဘက်က ကွမ်းတွေက အစောပိုင်းရက်တွေကတည်းက ဈေးစတက်နေတာ။ ကျွန်တော်တို့ဒေသက ကွမ်းတွေကတော့ အခုမှ ဈေးစတက်တာ လေးရက်လောက်ပဲ ရှိပါသေးတယ်။ ဈေးဘာလို့ အတက်ဘက် ဦးတည်လာလဲဆိုတော့ မိုးတွင်းတုန်းက မိုးရေချိန်များခဲ့တော့ ကွမ်းခြံတွေ ပျက်သွားတာကြောင့် ကွမ်းအထွက်နှုန်း လျော့နေတာရယ်၊ ဒီနှစ်ကိုက စိုက်ပျိုးသူ နည်းတာကြောင့် အထွက်နှုန်းနည်းသွားတာရယ် အကြောင်းအရင်းနှစ်ခုက သွားစုံနေတယ်။ အရင်အတိုင်းသာ လမ်းပန်းဆက်သွယ်ရေး ပွင့်လန်းမယ်ဆို ကွမ်းဈေးနှုန်းက အခုထက် ပိုကောင်းသွားနိုင်တယ်။"

ဟု စစ်ကိုင်းတိုင်းဒေသကြီး၊ မုံရွာမြို့မှ ကွမ်းနုဝါ စီးပွားဖြစ်စိုက်ပျိုးထုတ်လုပ်သူ ဦးဝင်းနိုင်က ပြောသည်။

မြန်မာနိုင်ငံတွင် ကွမ်းနုဝါကို မြန်မာပြည်အလယ်ပိုင်း၊ စစ်ကိုင်းဒေသကြီးအတွင်း အများဆုံးစိုက်ပျိုးထုတ်လုပ်နေကြပြီး၊ မန္တလေးတိုင်းဒေသကြီးနှင့် မကွေးတိုင်းဒေသကြီးတို့တွင်လည်း အနည်းအကျဉ်းစီ စိုက်ပျိုးထုတ်လုပ်နေကြသည်။

"ကျွန်တော်တို့ဒေသက စိုက်ပျိုးထုတ်လုပ်တဲ့ ကွမ်းနုဝါကို တောင်ကြီး၊ လားရှိုး၊ မိုးကုတ်၊ ဖားကန့်၊ တမူး၊ ကလေး စတဲ့ မြန်မာပြည်အလယ်ပိုင်းကနေ အထက်ပိုင်းဒေသတွေအထိ ရောင်းချပါတယ်။ ဒီဒေသတွေက ကွမ်းနုဝါကိုပဲ အများဆုံးစားသုံးကြတာလေ။ ဈေးကွက်က နယ်ပယ် ကျယ်ဝန်းတယ်။ ရန်ကုန်ဘက်ကတော့ အောက်ပြည်မှာစိုက်တဲ့ ကွမ်းစိမ်းတွေ ဈေးသင့်နေသေးရင် ကျွန်တော်တို့ဆီက ကွမ်းကို မစားသေးဘူး။ ကွမ်းစိမ်း ဈေးတအားတက်တဲ့အချိန် စားသုံးသူ မလိုက်နိုင်တဲ့အခါဆိုရင်တော့ ကျွန်တော်တို့ဆီက ကွမ်းနုဝါကို မှာစားကြတာမျိုး ရှိတတ်ပါတယ်။"

ဟု ၎င်းက ဆက်လက်ပြောသည်။

ယခုလက်ရှိ ကွမ်းနုဝါ ဈေးကွက်အတွင်း ကွမ်းရွက် (ကွမ်းနုဝါ) တစ်ပိဿာလျှင် ငွေကျပ် (၁၀၀၀) မှ ကျပ် (၄၀၀၀) အတွင်း ဈေးနှုန်းများဖြင့် ရောင်းဝယ်ဖောက်ကားနေကြောင်း သိရှိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။