ကောက်နေတဲ့ ရုံးပတီသီးအကြောင်းနဲ့ တစ်ပတ်အတွင်းစိတ်ဝင်စားစရာ အမေးအဖြေများ

မင်္ဂလာပါရှင့်

စိတ်ဝင်စားစရာ အမေးအဖြေတွေကို လေ့လာရမဲ့ စနေနေ့လေး ပြန်လည် ရောက်ရှိလို့လာပါပြီ။

ဒီတစ်ပတ်အတွင်းမှာ တောင်သူတွေရဲ့ စိုက်ခင်းမှာ ဘာပြဿနာတွေကြုံတွေ့နေရလဲဆိုတော့

၁။ မေး (Kyaw San Lin) - ရုံးပတီသီးအသီးကောက်နေလို့ဗျ အသီးကောက်တော့ကုန်သည်မယူဘူး။ ဘာဆေးလေးများပတ်ဖျန်းရင်ကောင်းမလဲ အကြံပြုကူညီကျပါဦးဗျ။

ဖြေ ( ဒို့ဦးလေး) - ရေနဲ့ အာဟာရ မလုံလောက်ရင် အဖျားကောက်တတ်ပါတယ်။ နောက်ပြီး စုပ်စားပိုး ၊ သီးထိုးပိုးကျရင်လည်း ကောက်တတ်ပါတယ်။ အဆီတာမီပရစ်အုပ်စု ဖျန်းပေးပါ။ ဆေးရွက်ကြီး၊ တမာ၊ ဆပ်ပြာ ပိုးသတ်ဆေးကျိုပြီး တစ်လှည့်ဖျန်းပေးပါ။ အီးအမ်နဲ့ ငါးအမိုင်နိုကိုလည်း အားဆေးအဖြစ် အသုံးပြုနိုင်ပါတယ်။ နှုန်းထားနည်းနည်းဖြင့် အကြိမ်ရေများများဖျန်းပါ။

ဒုတိယမေးခွန်းကတော့ စပါးပင်မှာ ရေနည်းနည်းနဲ့ များများထားတာက ဘယ်ဟာက ပိုကောင်းလဲဆိုတာပါ။ တခြားတောင်သူတွေပါ သိသွားဖို့အတွက် ဖော်ပြပေးလိုက်ပါတယ်နော်။

၂။ မေး (အာကာစိုး) - ရေစပ်စပ်နဲ့ ရေများများထည့်ထားတာက ဘယ်ဟာကအပင်ကိုပိုပွားစေလဲ။

ဖြေ (Ko Aung Moe San) - ရေစပ်စပ်။

(ဦးသက်လွင်) - ပင်ပွားလိုအပ်ချိန် ရေစပ်စပ်ထားရန် လိုအပ်ပြီး မလိုအပ်ချိန်တွင် ရေများများထားပြီး ပင်ပွားမထွက်နိုင်အောင် ရေမြုပ်သတ်ရပါတယ်။

နောက်မေးခွန်းလေးကတော့ ပူနေတဲ့ အပူချိန်ကြောင့် ငရုတ်ပျိုးပင်မှာ ကြုံတွေ့နေရတဲ့ အခက်အခဲလေးတစ်ခုမို့ ဖော်ပြပေးလိုက်ပါတယ်နော်။

၃။ မေး (Myint Khaing) - ငရုတ်ပျိုးပင်အရပ် ၈ လက်မလောက်ရှည်ပြီး နေ့ဘက်နွမ်းနေတယ် ခုချိန်ချစိုက်လို့အဆင်ပြေမလား ဘယ်လိုပြင်ဆင်ရင်အဆင်ပြေမလဲဆရာ။

ဖြေ (ဒို့ဦးလေး) - နေပူချိန်ပြင်းထန်လို့ပါ။ အပူချိန်မြင့်ရင် ယာယီအရိပ်မိုးလေးလုပ်ပေးသင့်ပါတယ်။ မိုးလေးတစ်မိုးရွာပြီးမှ ချစိုက်ရင်ကောင်းမယ်။

(ဦးသက်လွင်) - ပျိုးပင်အား ရေဝအောင်ပေးပါ အပင်နိမ့်သော ပျိုးပင်ပုများကို အဓိက ရွေးချယ်စိုက်ပျိုးပါ။

ဒီမေးခွန်းလေးကတော့ ကျွန်မအားလုံးမျှော်နေတဲ့ မိုး....။ ရွာလာရင် စိုက်ဖို့ ဘာတွေပြင်ဆင်ရမလဲသိချင်သူတွေအတွက် ဖော်ပြပေးလိုက်ပါတယ်ရှင့်။

၄။ မေး (U Lay Doi) - မိုးကာလမှာနံနံပင်စိုက်ချင်တယ်။ ဘာတွေပြင်ဆင်ထားရမလဲ ဆရာ

ဖြေ (ဒို့ဦးလေး) - ပြင်ဆင်ရမှာကတော့.. ပေါင်းမျိုးစေ့များ မပေါက်နိုင်အောင် ပေါင်းအုပ်ဆေးသုံးပါ။ သို့မဟုတ် ပေါင်းတွေပေါက်ခိုင်းပြီး ထယ်ထိုးထွန်မွှေပါ။ ထယ်ရေးညက်ပြီး ရေမဝပ်အောင် ဘောင်ယောင်တင်ပေးပါ။ နံနံစေ့အနည်းငယ်ကို အဝတ်စဖြင့်ထုတ်ပြီး အပင်ပေါက်စမ်းသပ်ထားပါ။

ဒီတစ်ပတ်တော့ ဒီလောက်နဲ့ပဲ အဆုံးသတ်ပါဦးမယ်။

အခက်အခဲတွေအကြံဉာဏ်တွေလိုအပ်လာပြီဆိုရင် အစိမ်းရောင်လမ်းရဲ့ အမေးအဖြေကဏ္ဍမှာ အကူအညီပေးမဲ့ ဆရာတွေမျှော်နေကြောင်းကိုလည်း သတင်းကောင်းပေးပါရစေ။

အပူချိန်တွေမြင့်မားနေတဲ့ ကာလမို့ ဦးကြီးတို့အားလုံးကျန်းမာရေးကို ဂရုစိုက်ကြပါနော်။

ပြင်းထန်သည့်အပူဒဏ်အန္တရာယ်ကို ကာကွယ်ရန်အတွက် -

၁။ ရေများများသောက်ပါ။ ဆိုဒါ/သကြားပါသောအချိုရည်များကို မသောက်ပါနှင့်။ ၎င်းတို့သည် မိမိတို့ခန္ဓာကိုယ်တွင်ရှိသောရေဓာတ်ကို ပိုမိုဆုံးရှုံးစေပါသည်။
၂။ ပြင်းထန်သောနေရောင်ခြည်နှင့် နေရောင်ခြည်တိုက်ရိုက်ထိတွေ့မှုကို ရှောင်ရှားရန်အတွက် အလုပ်အချိန်ဇယားစီစဥ်ပါ။ အပူရှိန်ပြင်းသည့် နံနက် (၁၁း၀၀) နာရီ မှ မွန်းလွဲ (၃း၀၀)နာရီအချိန်တွင် ခန္ဓာကိုယ်နှင့်အားစိုက်ပြီးလုပ်ရသည့်အလုပ်များ၊ ကိုယ်လက်လှုပ်ရှားမှုများကို ရှောင်ရှားရန်လိုအပ်ပါသည်။
အကယ်၍ ၎င်းအချိန်တွင် လယ်၊ ခြံယာထဲ၌ အလုပ်လုပ်ရန်လိုအပ်ပါက အေးမြသည့်အရိပ်အောက်တွင် မကြာခဏအနားယူပါ။ အေးမြသည့်အချိန် နံနက်စောစော၊ ညနေခင်းအချိန်တို့တွင် အလုပ်လုပ်ပါ။
၃။ အရေပြားကို ဖုံးလွှမ်းနိုင်သောအရောင်ဖျော့ဖျော့အဝတ်အစားများကို ဝတ်ပါ။ ဦးရေပြား၊ နားရွက်၊ လည်ပင်းတို့ကို ကာကွယ်ရန်အနည်းဆုံး(၃)လက်မအစွန်းရှိသော ဦးထုပ်ကို ဝတ်ဆင်ပါ။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...