ရှမ်းတောင်တွင် ဘိုစားပဲ၊ ရွှေပဲနှင့် ငရုတ်ပွ ဈေးကွက် အကျဘက်သို့ရောက်

ရှမ်းပြည်နယ်တောင်ပိုင်း ကုန်စိမ်းဈေးကွက်တွင် ယခုဇွန်လဆန်းမှစတင်ကာ ဘိုစားပဲ၊ ရွှေပဲနှင့် ငရုတ်ပွ ဈေးကွက်မှာ အကျဘက်သို့ ရောက်ရှိနေကြောင်း ကုန်သည်များထံမှ သိရသည်။

လက်ရှိတွင် မိုးရာသီ ရောက်ရှိလာပြီဖြစ်သည်နှင့်အညီ ကုန်စည်ဈေးကွက်အတွင်းသို့ ဘိုစားပဲ၊ ရွှေပဲနှင့် ငရုတ်ပွများ ဝင်ရောက်မှု များပြားလာခြင်းကြောင့် ဝယ်လိုအားနှင့် ရောင်းလိုအား မမျှတဘဲ ဈေးနှုန်းများ ကျဆင်းလာခြင်းဖြစ်သည်။

"ဘိုစားပဲ၊ ရွှေပဲနဲ့ ငရုတ်ပွက ဇွန် ၂ ရက်ကစပြီး ဈေးကျလာတာပါ။ ဈေးကျတဲ့အထဲမှာ ရွှေပဲက ပိုပြီးဈေးကျ တာကို တွေ့ရပါတယ်" ဟု ရှမ်းတောင်ကုန်စိမ်းပွဲရုံပိုင်ရှင်တစ်ဦးက ပြောသည်။

ဇွန်လ ၂ ရက်က ရှမ်းပြည်နယ်တောင်ပိုင်း ကုန်စိမ်းဈေးကွက်တွင် ဘိုစားပဲ (အစိမ်းမျိုး) တစ်ပိဿာလျှင် ၄,၃၀၀ ကျပ်နှင့် ဘိုစားပဲ (အပြားမျိုး) အသန့်တစ်ပိဿာလျှင် ၃,၀၀၀ ကျပ်သာ ရှိတော့သည်။

ရွှေပဲ (ရှယ်စ) တစ်ပိဿာလျှင် ၁၂,၀၀၀ ကျပ်နှင့် ရွှေပဲ (အလတ်စ) တစ်ပိဿာလျှင် ၈,၀၀၀ ကျပ်သာရှိပြီး ငရုတ်ပွ (ရှယ်စ) မှာ ၂,၅၀၀ ကျပ် နှင့် ငရုတ်ပွ (အလတ်စ) မှာ ၂,၀၀၀ ကျပ်သာ ဈေးရှိတော့ကြောင်း သိရသည်။

မေလအတွင်း ဖြစ်ပေါ်ခဲ့သည့် ဈေးကွက်နှင့် နှိုင်းယှဉ်ပါက ဘိုစားပဲမှာ အမျိုးအစားအလိုက် တစ်ပိဿာလျှင် ၇၀၀ ကျပ်မှ ၁,၀၀၀ ကျပ်အထိ ဈေးကျဆင်းသွားပြီး ရွှေပဲမှာ ၃,၀၀၀ ကျပ်မှ ၆,၀၀၀ ကျပ်အတွင်း၊ ငရုတ်ပွမှာ ၅၀၀ ကျပ်မှ ၇၀၀ ကျပ်အတွင်း ဈေးနှုန်းများ အသီးသီး ကျဆင်း သွားခြင်း ဖြစ်သည်။

"ငရုတ်ပွဆိုရင် ဒိုင်တွေ ပြန်ရောင်းတာ မှ ၂,၀၀၀ ကျပ်၊ ၂,၅၀၀ ကျပ်ဆိုတော့ တောင်သူရောင်းဈေးက ၁,၀၀၀ ကျပ် သာသာလောက်ပဲ ရမယ်။ ဈေးက ရှေ့လျှောက် ထပ်တောင်ကျဦးမယ်လို့ ခန့်မှန်းတယ်" ဟု ကုန်စိမ်းရောင်းချသူတစ်ဦးက ပြောသည်။

ဘိုစားပဲ၊ ရွှေပဲနှင့် ငရုတ်ပွ ကုန်စိမ်းသီးနှံများသည် ရှမ်းပြည်နယ်တောင်ပိုင်းတွင်သာ အများဆုံး စိုက်ပျိုး ထွက်ရှိခြင်းဖြစ်ပြီး ကုန်စိမ်းသီးနှံသဘာဝအရ ရက်ကြာပါက ပျက်စီးလွယ်သည့်အတွက် ပစ္စည်းအဝင် များပြီး ဝယ်လိုအားနည်းပါက ဈေးကျလေ့ရှိကြောင်း သိရသည်။

မေလတုန်းက ရှမ်းတောင်ကုန်စိမ်းဈေးကွက်တွင် ဘိုစားပဲ (အစိမ်းမျိုး) တစ်ပိဿာလျှင် ၅,၀၀၀ ကျပ်နှင့် ဘိုစားပဲ (အပြားမျိုး) အသန့်တစ်ပိဿာလျှင် ၄,၀၀၀ ကျပ် ရှိခဲ့သည်။ရွှေပဲ (ရှယ်စ) တစ်ပိဿာလျှင် ၁၅,၀၀၀ ကျပ်နှင့် ရွှေပဲ (အလတ်စ) တစ်ပိဿာလျှင် ၁၄,၀၀၀ ကျပ် ရှိခဲ့ပြီး၊ ငရုတ်ပွ (ရှယ်စ) လျှင် ၃,၀၀၀ ကျပ်နှင့် ငရုတ်ပွ (အလတ်စ) လျှင် ၂,၇၀၀ ကျပ် ဈေးရှိခဲ့ကြောင်း သိရသည်။

ဘိုစားပဲ၊ ရွှေပဲနှင့် ငရုတ်ပွ ကုန်စိမ်းသီးနှံများသည် အိမ်သုံးအစားနည်းပြီး စားသောက်ဆိုင်နှင့် ထမင်းဆိုင်များတွင်သာ အဓိက အများဆုံး အသုံးပြုကြခြင်းဖြစ်ကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။