ဈေးအပြောင်းအလဲဖြစ်သွားသောသီးနှံများ (ဈေးကွက်သုံးသပ်ချက်)

ပဲစင်းငုံနီ

ပဲစင်းငုံနီက တစ်ပတ်အတွင်း အတက်အကျ အပြောင်းအလဲများရှိနေခဲ့ပြီး ပြီးခဲ့တဲ့ အပတ်နဲ့ ယှဉ်ရင် ဈေးကျဆင်းသွားပါတယ်။ တစ်တန်ကို သိန်း ၅၂ သိန်းကျော်အထိ စံချိန်တင် ဈေးမြင့်တက်ခဲ့ပေမယ့် ပြန်ကျဆင်းသွားတာ ဖြစ်ပါတယ်။ အရောင်းအဝယ်ကတော့ ပို့ကုန်ရှိနေတာ ဖြစ်တဲ့အတွက် အဝယ်ရှိပေမယ့် အရောင်းကတော့ အမြင့်ဈေး ကို စောင့်ကြည့် နေကြတာ ဖြစ်လို့ အများကြီး မရှိဘူးလို့ ကုန်သည်အချို့က ဆိုပါတယ်။

အိန္ဒိယနိုင်ငံမှာလည်း ပဲစင်းငုံနီ ဈေးက တည်ငြိမ်မှု မရှိဘဲ အရောင်းအဝယ်အေးကာ ဈေးမာနေတဲ့ အခြေအနေလို့ အိန္ဒိယဈေးကွက်သတင်းတွေရဲ့ ဖော်ပြချက်အရ သိရပါတယ်။ ယခုနှစ် ပဲစင်းငုံအထွက်နှုန်းက မြင့်တက်လာနိုင်တယ်လို့ ထုတ်ပြန်ထားပြီး မကြာခင် အာဖရိက ပဲ တွေ အဝင်ရှိလာရင်တော့ လက်ရှိပဲဈေးက ကျဆင်းနိုင်မယ်လို့ ခန့်မှန်းထားကြပါတယ်။

ရန်ကုန်စျေးကွက်မှာ ပြီးခဲ့တဲ့ အပတ် သောကြာနေ့က ပဲစဥ်းငုံနီတစ်တန်ကို ကျပ် ၅၂၂၅၀၀၀ ကျပ်၊ တနင်္လာနေ့မှာ တစ်တန်ကို ၅၂၀၀၀၀၀ ကျပ်၊ အင်္ဂါနေ့မှာ တစ်တန်ကို ၅၂၃၇၀၀၀၊ ဗုဒ္ဓဟူးနေ့မှာ တစ်တန်ကို ၅၂၀၀၀၀၀၊ ကြာသပတေးနေ့မှာတော့ တစ်တန်ကို ၅၁၀၀၀၀၀ ၊ ပေါက်ဈေးရှိပြီး ပြီးခဲ့တဲ့ အပတ်နဲ့ယှဉ်ရင် ၁၂၅၀၀၀ ကျပ်ဈေးကျဆင်းသွားပါတယ်။

ပြည်တွင်း FOB ဈေးနှုန်းကတော့ တစ်တန်ကို ၁၁၄၀ မှ ၁၁၅၀ ဒေါ်လာရှိပြီး တစ်တန်ကို ဒေါ်လာ ၆၅ ဈေးမြင့်တက်လာပါတယ်။ ငွေကြေးလဲလှယ်ဈေးနှုန်း ပြန်ကျဆင်းသွားတဲ့အတွက် ပဲဈေးလည်း ပြန်ကျဆင်းသွားတာ ဖြစ်ပါတယ်။

ပဲတီစိမ်း

ပဲတီစိမ်းကတော့ အနည်းငယ်ဈေးမြင့်တက်လာပါတယ်။ အသစ်ဝင်တဲ့ ပဲတွေကတော့ အရောင်းအဝယ်ပုံမှန်ရှိနေပါတယ်။

ရန်ကုန်ဘုရင့်နောင်ဈေးကွက်မှာတော့ ပဲတီစိမ်း(ခရမ်းရွှေဝါ)၊ (ပဲခူးရွှေဝါ)၊ ဝါးခယ်မ၊ အညာတို့က တစ်ပိဿာ ကို ၄၃၃၀ ကနေ ၅၆၀၀ ကြားပေါက်ဈေးရှိနေပြီး တစ်ပိဿာကို ၁၅ ကျပ်ဈေးတက်ပါတယ်။

မန္တလေးဈေးကွက်မှာတော့ ပဲတီစိမ်း(အညာ) အသစ်က သုံးတင်းဝင်တစ်အိတ်ကို ၂၀၀၀၀၀ မှ ၂၅၀၀၀၀ ပေါက်ဈေးရှိပြီး ပြီးခဲ့တဲ့အပတ်နဲ့ယှဉ်ရင် တစ်အိတ်ကို ၁၀၀၀၀ ကျပ်ဈေးကျဆင်းပါတယ်။

နယ်ဈေးကွက်တွေမှာတော့ ပဲတီစိမ်း တစ်တင်းကို ၄၀၀၀၀ မှ ၆၂၀၀၀ ကြားရှိနေပြီး တစ်တင်းကို ၂၀၀၀ လောက်ဈေးမြင့်တက်လာပါတယ်။

စီပီပြောင်း

ပြောင်းဈေးကတော့ ဈေးထပ်ပြီး မြင့်တက်ပါတယ်။ ငွေလဲလှယ်ဈေးနှုန်းအပါအဝင် ပြည်တွင်း သယ်ယူပို့ဆောင်စရိတ်မြင့်တက်လာတာ၊လက်ကျန်လျော့နည်းလာတာ၊ ထိုင်းနိုင်ငံတင်ပို့မှုအတွက် ဝယ်ယူမှုများပြားတာတွေကြောင့် ဈေးကမြင့်တက်နေတာ ဖြစ်တယ်လို့ သိရပါတယ်။

ရန်ကုန်ဈေးကွက်မှာတော့ တစ်ပိဿာကို ၁၇၃၀ မှ ၁၇၅၀ ရှိပြီး အတက်ဈေးနဲ့ ဈေးငြိမ်ပါတယ်။

မန္တလေးဈေးကွက်မှာတော့ စီပီပြောင်းက သုံးတင်းဝင် တစ်အိတ်ကို ၈၇၀၀၀ မှ ၈၈၀၀၀ ပေါက်ဈေးရှိပြီး တစ်အိတ်ကို ၁၀၀၀ ကျပ်ဈေးတက်ပါတယ်။ ရှမ်းပြောင်းကလည်း တစ်အိတ်ကို ၈၇၀၀ မှ ၈၈၀၀ ရှိပြီး တစ်အိတ်ကို ၁၀၀၀ ကျပ်ဈေးတက်ပါတယ်။

မြေပဲ

မြေပဲဈေးက ဆက်တိုက် ပြန်ကျဆင်းပါတယ်။ ဈေးကွက်ထဲ အသစ်တွေ အဝင်ရှိနေပြီး ဆီစက်တွေက ဈေးချ ဝယ်ယူတာတွေကြောင့်ဈေးက ပြန်ကျဆင်းသွားတာ ဖြစ်ပါတယ်။ ဒါ့အပြင်အကျဈေးကို စောင့်နေကြတဲ့အတွက် ဈေးကွက်အတွင်းမှာတော့ အရောင်းအဝယ်က အေးသွားပါတယ်။

မန္တလေးဈေးကွက်မှာ မြေပဲအနီလုံးဆံက တစ်ပိဿာကို ၈၀၀၀ မှ ၈၅၀၀ ရှိပြီးတစ်ပိဿာကို ၅၀၀ ကျပ်ဈေးကျဆင်းပါတယ်။

အောင်လံဈေးကွက်မှာလည်း မြေပဲလုံးဆံဖြူက တစ်ပိဿာကို ၈၀၀၀ မှ ၈၁၀၀ ရှိပြီး တစ်ပိဿာကို ၈၀၀ ကျပ် ဈေးကျဆင်းပါတယ်။

ကြက်သွန်ဖြူ

ကြက်သွန်ဖြူလည်း ဈေးကျဆင်းသွားပါတယ်။ ဈေးအမြင့်နဲ့ ရှိနေတဲ့အတွက် အဝယ်လျော့သွားတာဖြစ်လို့ ဈေးကျဆင်းသွားတာပဲဖြစ်ပါတယ်။ ဈေးကွက်ထဲကို ကြက်သွန်ဖြူ ပိဿာချိန် ၁၅၀၀၀ နီးပါးလည်း အဝင်ရှိနေပြီး အဝင်ကလည်း များနေပါတယ်။

ရန်ကုန်ဈေးကွက်မှာ ကြက်သွန်ဖြူ(ကြူကုတ်)က တစ်ပိဿာကို ၁၈၀၀၀ မှ ၁၈၃၀၀ ပေါက်ဈေးရှိပြီး တစ်ပိဿာကို ၂၀၀ ကျပ် ဈေးကျဆင်းပါတယ်။

ကြက်သွန်ဖြူ(ရှမ်း)ကတော့ တစ်ပိဿာကို ၉၅၀၀ မှ ၁၂၅၀၀ ပေါက်ဈေးရှိပြီး တစ်ပိဿာကို ၁၀၀၀ ကျပ် ဈေးကျဆင်းပါတယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...