ကြက်မွေးက လျှပ်စစ်ဓာတ်အားထုတ်တော့မလား

လျှပ်စစ်ဓာတ်အားရရှိနိုင်မယ့် အရင်းအမြစ်အသစ်တွေကို သိပ္ပံပညာရှင်တွေ ထပ်မံရှာဖွေတွေ့ရှိတဲ့ သတင်းတွေဖတ်ရတိုင်း လျှပ်စစ်ဓာတ်အား မလုံလောက်လို့ စိတ်ညစ်နေကြရတဲ့ မြန်မာနိုင်ငံက စာဖတ်သူတွေအတွက် အားဆေးတစ်ခွက်သောက်ရသလိုပါပဲ။

အသစ်ရှာတွေ့တဲ့ နည်းလမ်းတွေက ခေတ်ကာလနဲ့ ကိုက်ညီပြီး၊ ရေရှည်တည်တံ့မယ်၊ လူ့အဖွဲ့အစည်းထဲက လက်ရှိကြုံတွေ့နေရဆဲ အခက်အခဲတွေကိုပါ ဖြေရှင်းပြီးသားဖြစ်မယ်ဆိုရင် ဒါကို "သားရွှေအိုးထမ်းလာတာကို မြင်တဲ့ကိန်း" လို့ ဆိုရမှာပါ။ ဒီကနေ့မှာလည်း ကမ္ဘာ့လူသားထုအတွက် သားရွှေအိုးထမ်းလာတာကို မြင်ရသလို အကျိုးထူးနိုင်တဲ့ ရှာဖွေတွေ့ရှိမှု အသစ်တစ်ခုကို တင်ပြလိုပါတယ်။

ဆွစ်ဇာလန်နိုင်ငံ ETH Zurich တက္ကသိုလ်နဲ့ စင်ကာပူနိုင်ငံ NTU တက္ကသိုလ်တွေက သုတေသီတွေ‌ ပူးပေါင်းပြီး ဆောင်ရွက်တဲ့ သုတေသန တစ်ခုက "ကြက်‌မွေးကနေ သန့်စင်တဲ့ လျှပ်စစ်ဓာတ်အား ထုတ်ယူနိုင်မယ့် နည်းပညာ" တစ်ရပ်ကို ရှာဖွေဖော်ထုတ်နိုင်ခဲ့ပါတယ်။

ကမ္ဘာပေါ်မှာ နှစ်စဉ်ကြက်မွှေးတန်ချိန် သန်း ၆၀၀၀ လောက် ထွက်ရှိနေပြီး အဲဒီထဲက သန်း ၄၀ လောက်ကို အသုံးမပြုနိုင်ဘဲ မီးရှို့ဖျက်စီးပြီး လေလွင့်ဆုံးရှုံးနေရတာပါ။ မီးရှို့ဖျက်စီးတဲ့အခါ ကာဗွန်ဒိုင်အောက်ဆိုဒ်နဲ့ အခြားသော အဆိပ်သင့်ဓာတ်ငွေ့တွေ အမြောက်အများ ထုတ်လွှတ်နေတာက ပိုကြီးတဲ့ ပြဿနာပါ။

အခု သုတေသီတွေရဲ့ ရှာဖွေတွေ့ရှိမှုကတော့ ကြက်မွေးမှာပါဝင်တဲ့ ကရယ်တင် (keratin) ကို ထုတ်ယူပြီး amyloid fibrils တွေအဖြစ် ပြောင်းလဲတာ ဖြစ်ပါတယ်။ အဲဒီ amyloid fibrils တွေကို Fuel cell တွေမှာ ထည့်သွင်း အသုံးပြုမှာ ဖြစ်ပါတယ်။ ကြက်မွေးမှာ keratin ပါဝင်မှုက ၉၁ ရာခိုင်နှုန်း ရှိတာပါ။

Fuel cell ဆိုတာကတော့ ဟိုက်ဒြိုဂျင်ရဲ့ ဓာတုစွမ်းအင်ကို အသုံးပြုပြီး လျှပ်စစ်ဓာတ်အား ထုတ်လုပ်ပေးတဲ့ ပစ္စည်းတွေပါ။ အရိုးရှင်းဆုံး ပြောရရင် ဟိုက်ဒြိုဂျင် ကို လောင်စာအဖြစ် Fuel cell ထဲထည့်အသုံးပြုပြီး လျှပ်စစ်စွမ်းအင် ထုတ်ပေးတာ ဖြစ်ပါတယ်။ ဘေးထွက်ပစ္စည်းအနေနဲ့ ရေ၊ အောက်ဆီဂျင်နဲ့ အပူဓာတ်တွေ ရရှိပါတယ်။ ကာဗွန်ဒိုင်အောက်ဆိုဒ်ဓာတ်ငွေ့ ထုတ်လွှတ်မှုမရှိပါဘူး။

ပြဿနာက ကမ္ဘာမြေပေါ်မှာ ဟိုက်ဒြိုဂျင်ချည်းပဲ သန့်သန့်ရနိုင်တဲ့ အရင်းအမြစ်က နည်းပါးပါတယ်။ ဟိုက်ဒြိုဂျင်ရအောင် လုပ်ဆောင်တဲ့ လုပ်ငန်းတွေကိုယ်တိုင်က စွမ်းအင်သုံးစွဲမှု မြင့်မားတဲ့ ပြဿနာပါ။ ဒါကြောင့်ရှိနေတဲ့ ဟိုက်ဒြိုဂျင်ကို ထိထိရောက်ရောက် အသုံးချနိုင်ရေးဟာ အရေးကြီးတဲ့ ကိစ္စတစ်ခုပါ။ ဒီအတွက် ပညာရှင်တွေဟာ Fuel cell တွေရဲ့ အဓိက အစိတ်အပိုင်းဖြစ်တဲ့ Polymer electrolyte membrane (PEM) နဲ့ ပတ်သက်ပြီး သုတေသနတွေ အများအပြား ဆောင်ရွက်နေတာပါ။ သုတေသီတွေက PEM တွေအစား amyloid fibrils နဲ့ အခြေခံထုတ်လုပ်ထားတဲ့ keratin membrane နဲ့ အစားထိုးနိုင်ဖို့ မျှော်လင့်နေတာပါ။

ကြက်မွေးကရရှိတဲ့ keratin membrane တွေဟာ ဟိုက်ဒရိုဂျင်ကနေ လျှပ်စစ်ဓာတ်အားထုတ်တဲ့ လုပ်ငန်းကို ညဘက်မှာ ပိုမိုထိရောက်စေတယ်လို့ အခုသုတေသနကို ဦးဆောင် ဆောင်ရွက်ခဲ့တဲ့ ပညာရှင်တွေက ဆိုပါတယ်။

အခြားတစ်ဖက်မှာလည်း လက်ရှိသုံးနေတဲ့ PEM တွေကို အဆိပ်သင့်စေနိုင်တဲ့ ပစ္စည်းတွေနဲ့ ထုတ်လုပ်ထားရတာပါ။ ဒါ့အပြင် PEM တွေကို အသုံးပြုပြီးတဲ့အခါ စွန့်ပစ်ဖို့ ခက်ပါတယ်။ အလွယ်တကူ ဆွေးမြည့်ပျက်စီးတာမျိုးမဖြစ်ဘဲ ပတ်ဝန်းကျင်ကို ညစ်နွမ်းစေလို့ပါ။ ကြက်မွေးကထုတ်တဲ့ keratin membrane တွေကတော့ ဇီဝပစ္စည်းကို အခြေခံတာမို့ အသုံးမလိုတော့လို့ စွန့်ပစ်ရင် အလွယ်တကူ ဆွေးမြည့်သွားပြီး အန္တရာယ်ကင်းပါတယ်။

ပိုပြီးစိတ်ဝင်စားစရာကောင်းတာကတော့ ကုန်ကျစရိတ်ပါ။ keratin membrane တွေဟာ ပုံမှန် membrane တွေရဲ့ ကုန်ကျစရိတ်အောက် ထက်ဝက်လောက် လျော့နည်း သက်သာပါသေးတယ်။

အခုတွေ့ရှိချက်ကနေ သုတေသနတွေ ဆက်လက်ဆင့်ပွားပြီး keratin membrane တွေကို အကျယ်အပြန့် အသုံးချလာနိုင်ဖို့ ပညာရှင်တွေက ယုံကြည်နေကြပါတယ်။ စီးပွားဖြစ်ထုတ်လုပ်နိုင်တဲ့ အဆင့်ရောက်လာရင် ကြက်မွေးကြောင့်ဖြစ်ရတဲ့ ပြဿနာတွေကို လျှော့ချနိုင်မှာ ဖြစ်သလို ပိုမိုသန့်ရှင်းပြီး ရေရှည်တည်တံ့တဲ့ လျှပ်စစ်စွမ်းအင်ကို ရရှိနိုင်မှာ ဖြစ်ပါတယ်။

ဒီအကြောင်းကို သိပ္ပံပညာရှင် Raffaele Mezzenga ဦးဆောင်တဲ့ သုတေသီတွေက Renewable Energy from Livestock Waste Valorization: Amyloid- Based Feather Keratin Fuel Cells ခေါင်းစဉ်နဲ့ အမေရိကန်ဓာတုဗေဒအသင်း (American Chemistry Society) ရဲ့ Applied Materials & Interfaces မှာ စက်တင်ဘာ ၂၆ ရက်က စာတမ်းတင်ပြခဲ့တာ ဖြစ်ပါတယ်။

အခုသယ်ဆောင်လာတဲ့ သတင်းဟာ အမှောင်ထဲက ပြည်မြန်မာအတွက် မျှော်လင့်ချက် အလင်းရောင်မဖြစ်ခဲ့ရင်တောင် ကြုံနေရတဲ့ အခက်အခဲအပေါ် "လူကြံရင်ဘယ်ခံနိုင်မလဲ" လို့ အားတင်းနိုင်ဖို့ အထောက်အကူဖြစ်နိုင်လိမ့်မယ်လို့ ယူဆရင်း မျှဝေလိုက်ရပါတယ်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...