အစိမ်းရောင်လမ်းပြည်ပဝယ်လိုအားကောင်းမွန်လာသည်နှင့်အမျှ မြန်မာ့ရော်ဘာဈေးနှုန်းများ ပြန်လည်မြင့်တက်လာကြောင်း ပြည်တွင်းရှိ ရော်ဘာဈေးကွက်ကျွမ်းကျင်သူများထံမှ သိရသည်။
ဒီနှစ် ရာသီပြန်အစမှာ ရာသီဥတုကဖောက်ပြန်ပြီး မုန်တိုင်းတွေလည်းရှိခဲ့တော့ ထိုင်းနိုင်ငံနဲ့ ဗီယက်နမ်နိုင်ငံတို့ဘက်မှာ အစေးမခြစ်ရတာမျိုးတွေရှိခဲ့တယ်။ မြန်မာနိုင်ငံဘက်မှာကလည်း အစေးမခြစ်တစ်လှည့် ခြစ်တစ်လှည့်ပါပဲ။ တရုတ်ပြည်ဘက်မှာကျတော့ ပြည်တွင်းဝယ်လိုအားတက်နေတဲ့ ကာလဖြစ်နေတယ်။ ထိုင်းနိုင်ငံက တင်ပို့တဲ့ပစ္စည်းက သိပ်မရတဲ့အတွက် မြန်မာနိုင်ငံဘက်ကနေ လှည့်ဝယ်ရတဲ့သဘောကြောင့် မြန်မာ့ရော်ဘာဈေးကွက်က ခုလိုနည်းနည်းချင်း တက်လာတာပါ။ သို့သော် ဘယ်ရက်လောက်အထိ ဈေးဆက်တက်မယ်ဆိုတာကိုတော့ အတိအကျခန့်မှန်းပြောလို့ မရနိုင်သေးပါဘူး။
ဟု ပဲခူးတိုင်း၊ ရွှေကျင်မြို့နယ်၊ ရော်ဘာစိုက်ပျိုးထုတ်လုပ်တင်ပို့ရောင်းချသူများ အသင်း၏ ဥက္ကဌ ဦးတေဇာတိုး က ပြောသည်။
မြန်မာ့ရော်ဘာဈေးနှုန်းအတက်အကျသည် ကမ္ဘာ့ရော်ဘာဈေးကွက်အခြေအနေနှင့် သက်ဆိုင်သည်သာမက ကမ္ဘာ့ရေနံစိမ်းဈေးနှုန်းအတက်အကျနှင့် ဝယ်လက်နိုင်ငံများ၏ အစေးခြစ်နားချိန်တို့အပေါ်၌လည်း များစွာမူတည်နေသည်။
အရင်ကတော့ နယ်စပ်ကနေ တရားမဝင်ရောင်းချတာမျိုးတွေရှိခဲ့တယ်။ နောက်ပိုင်းကျတော့ တရုတ်ပြည်ဘက်က ပါမစ်သမားကိုသာ ရောင်းချခွင့်ပေးတယ်။ ပါမစ်ပေးတဲ့အခါ အချိန်တစ်ခု သတ်မှတ်ပေးတယ်။ ပါမစ်ကိုင်ထားတဲ့သူတွေက တရုတ်ပြည်ထဲကို ရော်ဘာရောင်းချတဲ့အခါ အခွန် ၂၇% လောက်သက်သာတယ်။ သူတို့ဆီက တောင်သူတွေကိုလည်း ကာကွယ်ထားတဲ့အနေနဲ့ ပြည်ပတင်သွင်းမှုကို ပမာဏတစ်ခုသတ်မှတ်ပြီးတော့ သွင်းခွင့်ပေးတာမျိုးပါ။ မြန်မာနိုင်ငံနဲ့တရုတ်ပြည်နဲ့က အခွန်ကင်းလွတ်ခွင့် မရထားတာကြောင့် ပါမစ်ပေးတဲ့အချိန်မှာမှ အခွန် ၂၇% လောက် သက်သာတာမို့ ဒီအချိန်ကို စောင့်ဆိုင်းကြရတယ်။ ဆောင်းတွင်းဘက်ဆို တရုတ်ပြည်မှာ ရာသီဥတုအေးတဲ့အတွက် အစေးခြစ်နားလေ့ရှိတယ်။ အဲ့ဒိအချိန်မှာလိုအပ်တဲ့ ရော်ဘာကို ပြည်ပကသွင်းတဲ့အခါ ယူနန်ပြည်နယ်အစိုးရကနေ ပါမစ်ချပေးတာပါ။ ဒါ့ကြောင့် အဲ့ဒီလိုအချိန်မျိုးမှာဆိုရင်လည်း ရော်ဘာဈေး ကောင်းတတ်ပါတယ်။
ဟု ဦးတေဇာတိုးက ဆက်လက်ပြောသည်။
၂၀၂၀ ခုနှစ် အောက်တိုဘာလ (၂၂) ရက် မုဒုံရော်ဘာပေါက်ဈေးများအနေဖြင့် မှိုင်းခံရော်ဘာ RSS 3 တစ်ပေါင်လျှင် လက်ငင်းဝယ်ဈေး (၈၀၀) ကျပ်၊ မှိုင်းသတ် ကြိုပွိုင့်ဝယ်ဈေး (၇၇၅) ကျပ် ဈေးနှုန်းများဖြင့် ရောင်းဝယ်နေကြောင်း သိရသည်။
ဆောင်းပါးများ/သတင်းများ ပြန်လည်ကူးယူဖော်ပြပါက "အစိမ်းရောင်လမ်းမှ ပြန်လည်ကူးယူဖော်ပြပါသည်" ဟု ထည့်ပေးပါရန် မေတ္တာရပ်ခံအပ်ပါသည်။
မာလာမြိုင် ကုမ္ပဏီ ကြော်ငြာ
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ comment.comment }}
{{ question.title }}