IRRDB နှစ်ပတ်လည်အစည်းအဝေးနှင့် IRC ညီလာခံကို မြန်မာနိုင်ငံမှ အိမ်ရှင်အဖြစ်ကျင်းပမည်

ရန်ကုန်၊ စက်တင်ဘာ ၂၄ ရက်။ 

   နိုင်ငံပေါင်း ၂၀ တက်ရောက်မည့် အပြည်ပြည်ဆိုင်ရာ ရော်ဘာသုတေသနနှင့် ဖွံ့ဖြိုးရေးဘုတ် (IRRDB) နှစ်ပတ်လည်အစည်းအဝေးနှင့် အပြည်ပြည်ဆိုင်ရာ ရော်ဘာညီလာခံကို မြန်မာနိုင်ငံမှ အိမ်ရှင်အဖြစ် နေပြည်တော်နှင့် ပုဂံတို့တွင် ကျင်းပပြုလုပ်သွားမည်ဖြစ် ကြောင်း မြန်မာနိုင်ငံ ရော်ဘာစိုက်ပျိုးထုတ်လုပ်သူများအသင်းမှ သိရသည်။ 

   အဆိုပါ အပြည်ပြည်ဆိုင်ရာ ရော်ဘာညီလာခံ (IRC) ကို စက်တင်ဘာလ ၃၀ ရက်မှ အောက်တိုဘာလ ၁ ရက်အ ထိ နေပြည်တော်ရှိ မင်္ဂလာသီရိဟိုတယ်တွင် ကျင်းပပြုလုပ်သွားမည်ဖြစ်ပြီး အပြည်ပြည်ဆိုင်ရာ ရော်ဘာသုတေသနနှင့် ဖွံ့ဖြိုးရေးဘုတ် (IRRDB) နှစ်ပတ်လည်အစည်းအဝေးကို အောက်တိုဘာလ ၃ ရက်မှ ၄ ရက်အထိ ပုဂံတွင် ဆက်လက်ကျင်းပသွားမည်ဖြစ်ကြောင်း သိရသည်။ 

   "IRRDB အစည်းအဝေးက နိုင်ငံတကာမှာ နှစ်စဉ်လှည့်ပြီးလုပ်နေတာ၊ ဒီနှစ်က မြန်မာပြည်မှာ ပထမဦးဆုံးအနေနဲ့ ကျင်းပပြုလုပ်မှာဖြစ်ပါတယ်။ နိုင်ငံခြားသားတွေအတွက် ဝင်ကြေးသတ်မှတ်ထားပေမယ့် ကိုယ့်နိုင်ငံ ရော်ဘာစိုက်ပျိုးထုတ်လုပ်သူအားလုံးကို ဝင်ကြေးအခမဲ့နဲ့ တက်ရောက်ခွင့်ပြုသွားမှာပါ။ ခြံကြီး၊ ခြံလတ်၊ ခြံသေး ဘာမှမကျန် ရော်ဘာစိုက်ပျိုးထုတ်လုပ်သူအားလုံးကို ဒီလိုပွဲမျိုး တက်ရောက်ပြီး လေ့လာစေချင်တယ်။ ဒီပွဲက ရော်ဘာ စိုက်ပျိုးထုတ်လုပ်သူတွေအတွက် အကျိုးအရမ်းရှိပါတယ်။ Conference မှာ နိုင်ငံအလိုက် စာတမ်းတွေဖတ်မှာဖြစ်တဲ့အတွက် သူတို့အတွေ့အကြုံတွေ သိရှိရမယ်။ သူတို့ သုတေသနတွေ့ရှိချက်တွေ ရရှိမှာဖြစ်တဲ့အတွက် အကျိုးအများကြီးရှိမှာပါ။" ဟု မြန်မာနိုင်ငံ ရော်ဘာစိုက်ပျိုးထုတ်လုပ်သူများအသင်း အတွင်းရေးမှူး ဦးခိုင်မြင့်က ပြောသည်။ 

   အပြည်ပြည်ဆိုင်ရာ ရော်ဘာညီလာခံကို ရော်ဘာလုပ်ငန်းများ ယှဉ်ပြိုင်နိုင်မှုမြင့်မားရေးနှင့် ရေရှည်တည်တံ့ရေးဆောင်ပုဒ်ဖြင့် ကျင်းပပြုလုပ်သွားမည်ဖြစ်ပြီး နိုင်ငံတကာ ကျွမ်းကျင်ပညာရှင်များမှ ရော်ဘာဖွံ့ဖြိုးတိုးတက်ရေးနှင့် ပတ်သက်သော သုတေသနစာတမ်း ၆၀ ကျော်ကို ဖတ်ကြားသွားမည်ဖြစ်ကာ မြန်မာနိုင်ငံမှ စာတမ်း ၈ စောင် ပါဝင်မည်ဖြစ်ကြောင်းသိရသည်။ 

   "IRRDB အစည်းအဝေးကို ကျွန်တော်တို့အနေနဲ့ နှစ်စဉ်သွားတက်ရောက်ဖို့ကို တော်တော်လေး ကြိုးစားအားထုတ်ယူရတယ်။ သွားလို့ရှိရင်လည်း ကုန်ကျစရိတ်က အရမ်းများပါတယ်။ တကယ်တမ်း သွားတက်နိုင်တာက လေးယောက်၊ ခြောက်ယောက်လောက်ပဲ သွားတက်နိုင်တယ်။ အချို့နှစ်တွေမှာ နှစ်ယောက်လောက်ပဲ သွားတက်နိုင်တယ်။ မြန်မာနိုင်ငံမှာ ဒီလိုပွဲကျင်းပတဲ့အခါမှာ နိုင်ငံတကာအတိုင်းပဲ ဝင်ကြေးသတ်မှတ်ထားတယ်။ အဖွဲ့ဝင် နိုင်ငံတွေအတွက် နေရာ ၅ နေရာ စီစဉ်ပေးထားပါတယ်။ ငါးဦးထက်ကျော်ရင်တော့ တစ်ဦးကို ဒေါ်လာ ၁၅၀ သတ်မှတ်တယ်။" ဟု ဦးခိုင်မြင့်က ပြောသည်။ 

   ပြည်တွင်း ရော်ဘာစိုက်ပျိုးထုတ်လုပ်မှုများတွင် လိုအပ်ချက်များရှိနေသည့် နည်းပညာ၊ နည်းစနစ်များအပါအဝင် ရော်ဘာထုတ်လုပ်မှု ဈေးကွက်တင်ပို့မှုဆိုင်ရာ အချက်အလက်များကို ယင်းအပြည်ပြည်ဆိုင်ရာ ရော်ဘာညီလာခံတွင် ရရှိမည်ဖြစ်ခြင်းကြောင့် ပြည်တွင်း ရော်ဘာစိုက်ပျိုးထုတ်လုပ်သူများအနေဖြင့် တက်ရောက်သင့်ကြောင်း သိရသည်။

အေးအေးမြင့်(ABM)

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်