မရမ်းသီးပေါချိန် မရမ်းယိုထိုးစားကြမယ်

မရမ်းသီးတွေ လှိုင်လှိုင်ပေါ်နေချိန်ဆို မရမ်းသီးကိုဆားရည်စိမ်ပြီးလည်း စားကြသလို မရမ်းယိုထိုးပြီးလည်း စားလေ့ရှိကြပါတယ် ။ မွန်ပြည်နယ်ဘက်မှာတော့ မရမ်းသီးပေါ်ချိန်ဆို မရမ်းပြား အစို/အခြောက် ပြုလုပ်လေ့ရှိကြပါတယ်။ မရမ်းပြားကို ငါး/ကြက် မွန်စတိုင်ဟင်းချက်ပြုတ်ရာမှာ အသုံးပြုကြပြီး သင်္ကြန်ထမင်းနဲ့ အသုပ်တချို့ပြုလုပ်ရာမှာလည်း သုံးကြပါတယ်။ မရမ်းသီးသုပ်၊ မရမ်းသီးဟင်း ၊မရမ်းသီးကြော်အပြင် မရမ်းသီးမှည့်အချဥ်ပေါင်းကိုလည်း မြန်မာတို့ နှစ်သက်စွာစားလေ့ရှိကြတဲ့ အတွက် ကလေးရောလူကြီးပါ မကျန်ကြိုက်ကြတဲ့ ယိုထိုးနည်းလေး ပြောပြပါ့မယ်။

မရမ်းယိုပြုလုပ်ဖို့ -

မရမ်းသီး - ၁ ပိဿာ

သကြား - ၃၅ ကျပ်သား

ဆား- အနည်းငယ်

ထုံးရည်ကြည်- အနည်းငယ်တို့ လိုအပ်ပါတယ်။

ပြုလုပ်နည်းမှာ -

၁။ မရမ်းသီးကိုခွဲပြီး အစေ့နှင့် အစေ့ခွံကို သေချာစွာထုတ်ပါ။

၂။ ထုတ်ပြီးပါက ရေသေချာဆေးကြောပြီး ဆားရည် တစ်နေ့စိမ်ပါ။

၃။ ဆားရည်စိမ်နေစဥ် ဆားရည်ကို နှစ်ကြိမ်လဲပေးပါ။ လဲတိုင်းလည်း ရေသေချာဆေးပြီး ပြန်ထပ်စိမ်ပေးပါ။ အဖန်ရည်များထွက်သွားအောင်ပါ။

၄။ ၁ရက်စိမ်ပြီးနောက် စိမ်ထားသော မရမ်းသီးကို ရေသေချာဆေး၍ ထုံးရည်ကြည်နဲ့ ၆နာရီ ထပ်စိမ်ပါ။ အချိန်ပြည့်ရင် ရေသန့်နဲ့သေချာဆေးပြီး ၁နာရီခန့် ဇကာနဲ့ ရေစစ်ထားပါ။

၅။ ထို့နောက် မရမ်းသီးများကို သကြားနဲ့ ရောပြီး ခွက်တစ်ခုထဲမှာ ၂နာရီခန့်စိမ်ထားပါ။ သကြား အရည်ပျော်လာပါလိမ့်မယ်။

၆။ ထိုအရည်ကို စစ်ပြီး မီးအေးအေးနှင့် အရင်ကျိုပါ။အရည်ခမ်းခါနီးတွင် မရမ်းသီးများထည့်၍ ဆက်ကျိုပေးပါ။

၈။ အရမ်းစေးကပ်တဲ့အထိ မထားပဲ အပျစ်အနေ အတော်မှာ အိုးချရပါမယ်။ထိုအခါမှာတော့ အရသာရှိလှတဲ့ မရမ်းယို ရပါပြီ။

၉။ အချိုကြိုက်ပါက သကြားပိုထည့်နိုင်ပါတယ်။‌ အစပ်ကြိုက်ပါက ငရုတ်သီးမှုန့် ၊မဆလာ ထည့်နိုင်ပါတယ်။

၁၀။ ဆားရည်စိမ်ထားပြီးသားမို့လို့ ဆားထပ်ထည့်စရာမလိုပါဘူးနော်။ အရောင်ပိုလှချင်လျှင် ကြေးအိုးနဲ့ ယိုထိုးပါက အရောင်စိမ်းလေး ရပါတယ်။

ဒါကတော့ မရမ်းသီးပေါ်ချိန်အိမ်မှာ အလွယ်တကူပြုလုပ်လို့ရတဲ့ မရမ်းယိုထိုးနည်းလေးပါ။ ဆွမ်းတော်လည်း ကပ်လို့ရသလို ဆေးဖြစ်ဝါးဖြစ်ရော၊ သရေစာအနေဖြင့်ပါ စားလို့ရပါတယ်။

ရေးသားသူ- နှင်းဖြူဖြူ

Ref: YummyGoods Family Pathein.

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။