မတ်ပဲ စျေးဆက်တိုက်မြင့်တက်လာ.. ပဲတီစိမ်းနဲ့ ပဲစင်းငုံကတော့ စျေးငြိမ်နေဆဲ

မတ်ပဲက ခုတစ်ပတ်မှာလည်း ဈေးထပ်မံမြင့်တက်လာပါတယ်။ အိန္ဒိယနိုင်ငံရဲ့ ပွဲတော်ကာလ မတ်ပဲလိုအပ်ချက်ကြောင့် အဝယ်သွက်နေပြီး ပြည်တွင်းမှာလည်းမတ်ပဲ လက်ကျန်နည်းတဲ့အတွက် မတ်ပဲစျေးက ဆက်တိုက်မြင့်တက်လာနေတာဖြစ်တယ်လို့သိရပါတယ်။

" မတ်ပဲက အိန္ဒိယ ဘက်က လိုအပ်ချက်ရှိတော့ အဝယ်လိုက်လို့စျေးကောင်းလာတယ်။ အစက FOC ၉၀၀ ကျော်ပဲရှိတာ အခု ၁၀၀၀ ကျော်အထိပေးလာတော့ စျေးကတက်လာတာပေါ့။ လက်ကျန်ကလည်းအရမ်းနည်းသွားပြီ မရှိတော့ဘူး။ ဒီစျေးထက်တော့ ထပ်တက်ဖို့သိပ်မရှိပါဘူး။ အခုကိုက အမြင့်စျေးတန်းဖြစ်နေတာပါ" လို့ ကုန်သည်တစ်ဦးက သုံးသပ်ပြောပါတယ်။

အိန္ဒိယဘက်က မတ်ပဲလိုအပ်ချက်ရှိနေတာကြောင့် လာမယ့် မတ်ပဲအသစ်တွေပေါ်ချိန်ဖြစ်တဲ့ မတ် ၊ ဧပြီ လရောက်ရင်လည်း မတ်ပဲစျေးတန်းက တအားကြီးကျဆင်းနိုင်မယ့်အခြေအနေမရှိဘူးလို့ သိရပါတယ် ။

ဒါပေမယ့် ခုနှစ်မှာ မိုးများသွားခဲ့တဲ့အတွက် စပါးရိတ်ပြီးသော်လည်း လယ်ခင်းထဲမှာ ရေတွေမခမ်းတာကြောင့် မတ်ပဲစိုက်ပျိုးမှုနောက်ကျနိုင်တယ်လို့ သိရပါတယ်။

ဒီတစ်ပတ် ရန်ကုန်ဘုရင့်နောင်ဈေးကွက်မှာ မတ်ပဲ (FAQ/RC)က တစ်တန်ကို ၂၉၂၇၀၀၀ ပေါက်ဈေးရှိပြီး တစ်တန်ကို ၁၀၄၀၀၀ ကျပ်ဈေးမြင့်တက်လာပါတယ်။ FOB ပေါက်ဈေးက အမေရိကန်ဒေါ်လာ ၁၀၉၀ မှ ၁၁၀၀ ရှိပြီး တစ်တန်ကို ၃၅ ဒေါ်လာ မြင့်တက်လာပါတယ်။ SQ ကလည်း တစ်တန်ကို သိန်း ၃၂၀၇၀၀၀ ပေါက်ဈေးရှိပြီး တစ်တန်ကို ၉၄၀၀၀ ဈေးမြင့်တက်လာပါတယ်။

မတ်ပဲ (RAW) ကတော့ တစ်ပိဿာ ကို ၄၈၃၀ မှ ၄၈၇၀ ရှိပြီး တစ်ပိဿာကို ၂၀၀ ကျပ်ဈေးမြင့်တက်လာပြီး နယ်ဈေးကွက်တွေမှာလည်း မတ်ပဲက တစ်တင်းကို ၉၄၈၀၀ အထိ ရှိလာပါတယ်။

ပဲစင်းငုံနီ - ရန်ကုန်ဈေးကွက်မှာတော့ အောက်တိုဘာလက ဖြစ်ပေါ်ခဲ့တဲ့အမြင့်စျေးတန်းမှာပဲ ဈေးငြိမ်နေဆဲဖြစ်ပါတယ်။ ပြည်တွင်းမှာ လက်ကျန်မရှိသလောက်နည်းနေတာကြောင့် အရောင်းအဝယ် အေးနေပေမယ့် ပစ္စည်းလက်ကျန်မရှိတဲ့အတွက် စျေးတန်းက ကျမသွားဘဲ အမြင့်စျေးမှာပဲ ငြိမ်နေတာဖြစ်တယ်လို့သိရပါတယ်။

ပဲစင်းငုံနီ အသစ်တွေကလည်း မကြာခင်ရိတ်သိမ်းကြတော့မှာဖြစ်ပြီး ပဲအသစ်တွေပေါ်ရင်လည်း စျေးတန်းက ကျဆင်းနိုင်မယ့်အခြေအနေမရှိဘူးလို့ သိရပါတယ် ။

"ခုတောင် တစ်သိန်းကျော်တယ်လေ၊ ပဲစင်းငုံနီကို ဟိုဘက်ကလည်း ထပ်မဝယ်တော့ဘူး။ ဒီမှာလည်း ပဲမရှိမှန်းသိတယ်။ ဒါကြောင့်ထပ်မတက်တာ။ ဒီစျေးထပ် တက်ဖို့က ခက်မယ်။ ပဲစင်းငုံကတော့ ရှေ့တစ်လလောက်ထွက်မယ်။ ထွက်လာလည်း စျေးကတန်းမကျလောက်သေးဘူး။ ဟိုဘက်မှာက လိုအပ်ချက်ကရှိနေသေးတော့လေ။ ဧပြီ၊ မေလလောက်မှ စျေးတန်းကကျနိုင်မယ်" လို့ ကုန်သည်တစ်ဦးက သုံးသပ်ပြောပါတယ်။

ခုတစ်ပတ် ရန်ကုန်စျေးကွက်မှာ ပဲစင်းငုံနီ(RC) တစ်တန်ကို သိန်း ၄၀၇၅၀၀၀ ပေါက်ဈေးရှိပြီး FOB ပေါက်ဈေးကလည်း တစ်တန်ကို အမေရိကန်ဒေါ်လာ ၁၃၅၀ မှ ၁၃၇၀ ရှိနေပါတယ်။

မန္တလေးဈေးကွက်မှာတော့ ပြီးခဲ့တဲ့ ရက်က ပဲစင်းငုံနီ အသစ်ကို ၃၄၀၀၀၀ အထိ ဈေးဖွင့်ထားပေမယ့် နိုဝင်ဘာလ အစမှာတော့ စျေးဖွင့်ထားခြင်းမရှိပါဘူး။

ပြည်တွင်း စားတော်ပဲက စျေးငြိမ်နေပြီး ပြည်ပအဝင် ကနေဒါ စားတော်ပဲကတော့ စျေးထပ်တက်လာပါတယ်။ ဈေးကွက်အတွင်း ပြည်ပအဝင် ကနေဒါ စားတော်ပဲက များပေမယ့် ပြည်တွင်းစားတော်ပဲကတော့ လက်ကျန်မရှိတဲ့အပြင် အရောင်းအဝယ်လည်း မရှိတာကြောင့် ဈေးကျဆင်းနေတာ ဖြစ်တယ်လို့သိရပါတယ်။ ဒါကြောင့် က‌နေဒါပဲက အဝယ်သွက်နေပြီး ဈေးကောင်းရရှိနေတာဖြစ်တယ်လို့သိရပါတယ်။

မန္တလေးဈေးကွက်မှာ ကနေဒါ စားတော်ပဲတွေကတော့ တစ်အိတ်ကို ၂၄၅၀၀၀ ရှိပြီး တစ်အိတ်ကို ၃၀၀၀၀ လောက် ဈေးမြင့်တက်လာပါတယ်။ ပြည်တွင်း စားတော်ပဲကတော့တစ်အိတ်ကို ၃၂၀၀၀၀ မှ ၃၃၀၀၀၀ ကျပ်ရှိပြီး စျေးငြိမ်နေပါတယ်။

နှမ်းမျိုးစုံကလည်း အရင်က နှမ်းကို တရုတ်ဘက်က အက်ဆစ်အောင်တဲ့နှမ်းကိုသာ ရွေးပြီးဝယ်ယူတာကြောင့် အက်ဆစ်အောင်မိုးနှမ်းက စျေးကောင်းရပြီး ကျန်တဲ့အက်ဆစ်မအောင်တဲ့နှမ်းက စျေးနှိမ်ဝယ်ယူခံရလို့ စျေးကျခဲ့ပါတယ်။လက်ရှိမှာတော့ တရုတ်ကို နှမ်းတင်ပို့နိုင်ခြင်းမရှိလို့ စျေးတန်းက ကျနိုင်တယ်လို့ သိရပါတယ်။

ခုတစ်ပတ် မန္တလေးဈေးကွက်မှာ နှမ်းနက်(စမုံ)က တစ်အိတ်ကို ၃၃၀၀၀၀ ကျပ် ရှိပြီး တစ်အိတ်ကို ၁၅၀၀၀ ကျပ်ဝန်းကျင်ဈေးတက်သွားပြီး နှမ်းဖြူ(ရိုးရိုး) ကတော့ တစ်အိတ်ကို ၃၄၅၀၀၀ မှ ၃၇၀၀၀၀ ရှိပြီး တစ်အိတ်ကို ၃၅၀၀၀ ကျပ် တက်လာပါတယ်။ နှမ်းဖြူ(ဂျပန်)ကတော့ တစ်အိတ်ကို ၃၇၀၀၀၀ ရှိပြီး ဈေးငြိမ်နေပါတယ်။

နှမ်းညိုကတော့ဈေးကွက်ထဲ အဝင်များပြီး တစ်အိတ်ကို ၂၇၀၀၀၀ မှ ၂၇၅၀၀၀ ပေါက်ဈေးရှိပြီး တစ်အိတ်ကို ၁၀၀၀၀ ကျပ်ဈေးကျဆင်းသွားပါတယ်။

ပဲတီစိမ်းကလည်း တရုတ်နဲ့ ဥရောပနိုင်ငံတွေကိုအဓိကတင်ပို့ရပြီး အဝယ်သွက်ရင် စျေးကောင်းရကာ အဝယ်အေးရင် စျေးတန်းကအေးသွားတဲ့အခြေအနေရှိတယ်လို့သိရပါတယ်။

လက်ရှိမှာ ပဲတီစိမ်းကလည်း တရုတ်ဘက်ကို နယ်စပ်ဂိတ်ပေါက်ကနေ တင်ပို့နိုင်ခြင်းမရှိဘဲ ဥရောပနိုင်ငံတွေကိုသာတင်ပို့နိုင် လို့ စျေးတန်းက အရင်တပတ်က စျေးမှာပဲ ဆက်ရှိနေပါတယ်။

ရန်ကုန် စျေးကွက်မှာ ပဲတီစိမ်းခရမ်းရွှေဝါ ၃၆၃၀ ကျပ်၊ ပဲတီစိမ်းပဲခူးရွှေဝါက ၃၄၆၅ ကျပ်နဲ့ ပဲတီစိမ်းဝါးခယ်မက တစ်ပိဿာ ၃၃၀၀ ကျပ်ပေါက်စျေးရှိနေပါတယ်။ မန္တလေးစျေးကွက်မှာလည်း ပဲတီစိမ်းအညာ ၁၆၅၀၀၀ ကျပ်နဲ့ ပဲတီစိမ်းရွှေဝါက ၁၄၅၀၀၀ မှ ၁၅၀၀၀၀ ကျပ်ရှိနေပါတယ်။

ချစ်ခွန်းချို( AMIA)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...