ယခုတစ်ပတ်အတွင်း စျေးနှုန်းအပြောင်းအလဲဖြစ်ပေါ်ခဲ့သည့်သီးနှံများ

(၁၇.၁၂.၂၀၁၈ မှ ၂၁.၁၂.၂၀၁၈)ထိ

ဆန်၊စပါး

ရန်ကုန်ဈေးကွက်မှာ ဆန်ဈေးတွေကတော့ အရောင်းအဝယ်လည်းအေး ဈေးလည်းအေးနေပါတယ်။ အသစ်တွေကတော့ ဈေးကွက်ထဲကို လှိုင်လှိုင်ဝင်နေပါတယ်။ မြောင်းမြပေါ်ဆန်းသစ်က တစ်အိတ်ကို ၃၈၀၀၀ ကနေ ၄၂၀၀၀ ကျပ်၊ ဖျာပုံပေါ်ဆန်းကတော့ တစ်အိတ်ကို ၃၆၀၀၀ ကနေ ၃၈၀၀၀ ကျပ်၊ ဒေးဒရဲပေါ်ဆန်းသစ်က တစ်အိတ်ကို ၃၆၀၀၀ ကနေ ၃၈၀၀၀ ကျပ်၊ ပေါ်ဆန်းနယ်စုံသစ်က တစ်အိတ်ကို ၃၃၀၀၀ ကနေ ၃၅၀၀၀ ကျပ်၊ရှိပါတယ်။ ဆန်အသစ်တွေက ဆက်တိုက်ကို ဝင်လာတာဖြစ်တဲ့အတွက်ကြောင့် ဈေးက ကျဆင်းနေခဲ့ပြီး ဆန်အဟောင်းလက်ကျန်က မရှိသလောက် နည်းသွားတဲ့အတွက် ဆန်အဟောင်းလက်ကျန် ဈေးနဲ့ဆန်သစ်ဈေးနှုန်းတွေကတော့ ကွာခြားမှု ရှိနေပါတယ်။

ပြီးခဲ့တဲ့နှစ်ကာလာတူအခြေအနေမှာတော့ အထက်ဖော်ပြပါ ဆန်ဈေးနှုန်းတွေက လက်ရှိအခြေအနေနဲ့ နှိုင်းယှဉ်ရင် ဈေးကျဆင်းနေတာတွေ့ရပါတယ်။ ၂၀၁၈ ခုနှစ်မှာ ဆန်ချော အသစ်ဈေးတွေက ပြီးခဲ့တဲ့ နှစ်နဲ့ နှိုင်းယှဉ်ရင် တစ်အိတ်ကို ၅၀၀၀ ကျပ်လောက် လျော့နည်းနေခဲ့ပါတယ်။

မတ်ပဲ (FAQ/RC)

မတ်ပဲကတော့ ဒီတစ်ပတ်မှာ ဈေးအလွန်အေးသွားခဲ့ပါတယ်။ တစ်တန်ကို ထောင်ဂဏန်းလောက်သာ အပြောင်းအလဲ ဖြစ်နေခဲ့ပါတယ်။ အိန္ဒိယဝယ်ယူမှု အနည်းငယ်တန့်သွားခဲ့တဲ့အတွက် ဈေးကလည်း ငြိမ်သွားခဲ့ပါတယ်။ အိန္ဒိယမူဝါဒအချို့ကြောင့် ပဲဝယ်မှုကလည်း ရပ်တန့သွားခဲ့ပါတယ်။ လက်ရှိအခြေအနေမှာ ကုန်သည်တွေကလည်းစောင့်ကြည့်နေဆဲ အခြေအနေဖြစ်ပြီး တစ်ပတ်အတွင်း တင်ပို့မှုက ထက်ဝက်လောက် ကျဆင်းသွားခဲ့ပါတယ်။

မြန်မာအစိုးရနဲ့ အိန္ဒိအစိုးရက ပြီးခဲ့တဲ့အပတ်က ကိုတာစနစ်နဲ့ ပတ်သတ်ပြီး ဆွေးနွေးမှု ပြုလုပ်ခဲ့ပေမယ့်လည်း တစ်စုံတစ်ရာ ထူးခြားမှု မတွေ့ရသေးပါဘူး။ ပြီးခဲ့တဲ့အပတ်က ဈေးကျဆင်းသွားခဲ့တဲ့ မတ်ပဲက တစ်တန်ကို ၈ သိန်း ကျော်နဲ့ ဈေးငြိမ်နေခဲ့ပါတယ်။ နယ်ကုန်စည်ဒိုင်ဖြစ်တဲ့ မုံရွာမှာတော့ တစ်တင်းကို ၂၃၀၀၀ နဲ့ ၁၀၀၀ ကျပ်၊ နေပြည်တော်ကုန်စည်ဒိုင်မှာတော့ ၂၅၀၀၀ နဲ့ ၃၀၀၀ ကျပ် ဈေးကျဆင်းသွားခဲ့ပြီး ပြည်ကုန်စည်ဒိုင်မှာတော့ ၂၆၅၀၀ နဲ့ ၅၀၀ ကျပ်ဈေးတက် လာပါတယ်။

ပဲစင်းငုံနီ

ပဲစင်းငုံနီကတော့ ကုန်သည်အများစုက ခန့်မှန်းထားတဲ့အတိုင်း ဆက်တက်နိုင်ပြီး အိန္ဒိယရဲ့ အခြေအနေအရ ဈေးနှုန်းကျဆင်းရန် နည်းသည့်အခြေအနေမှာ အိန္ဒိယကဝယ်ယူမှု ရုတ်တရက်ရပ်တန့်လုနီးပါးဖြစ်သွားခဲ့ပြီး ရန်ကုန်ဈေးကွက်မှာလည် ဈေးအဖွင့်မရှိတော့သလို ဈေးဖွင့်တဲ့အချိန်မှာလည်း ဈေးကကျဆင်းသွားခဲ့ပါတယ်။

မှန်းချက်နဲ့နှမ်းထွက် မကိုက်တဲ့ အနေအထားမှာ ကုန်သည်တွေအများစုလည်း ခန့်မှန်းမှုတွေမရှိတော့ပဲ အိန္ဒိယရဲ့ဝယ်လိုအားကိုသာ စောင့်ကြည့်နေတဲ့အခြေအနေဖြစ်နေပါတယ်။တောင်သူတွေကတော့ ဈေးက ဆက်စောင့်ရမလား ယခင် အခြေအနေဖြစ်သွားမလားဆိုတဲ့ မေးခွန်းထုတ်မှုတွေကြား ဗျာများနေပါတယ်။ ပဲအသစ်တွေကလည်း ထွက်လာပြီဖြစ်ပေမယ့် ဈေးကတော့ အဆိုးအဝါး မဖြစ်တာ တောင်သူတွေအနေနဲ့ ခံသာနေတဲ့ အခြေအနေလည်းဖြစ်ပါတယ်။ ရန်ကုန်ဈေးကွက်မှာ ပဲစင်းငံနီက တစ်တန်ကို ၇၆၀၀၀၀ နဲ့ ဈေးရှိခဲ့ပြီး အရောင်းအဝယ်ကတော့ ရက်ခြား သာဖြစ်နေပါတယ်။ နယ်ကုန်စည်ဒိုင်ဖြစ်တဲ့ မုံရွာကုန်စည်ဒိုင်မှာ ပဲစင်းငုံနီက တစ်တင်းကို ၂၃၅၀၀ နဲ့ ဈေးငြိမ်နေပါတယ်။ ပခုက္ကူ ကုန်စည်ဒိုင်မှာတော့ ၂၄၁၀၀ နဲ့ ၁၂၀၀ ကျပ်ဈေးကျဆင်းသွားခဲ့ပါတယ်။ ပြည်ကုန်စည်ဒိုင်မှာလည်း တစ်တင်းကို ၂၃၅၀၀ နဲ့ ၅၀၀ ကျပ်ဈေးကျဆင်းသွားခဲ့ပါတယ်။

ပဲတီစိမ်း

ပဲတီစိမ်းကတော့ အဝင်ရှိသလောက် အဝယ်ရှိနေခဲ့ပါတယ်။ ဈေးကလည်း တက်နေပါတယ်။ အရည်အသွေး အလိုက်ဈေးအနည်းငယ်ကွာခြားပေမယ့် မတ်ပဲတို့ နဲ့ နှိုင်းယှဉ်ရင် ထိပ်ရောက်နေတဲ့ ပဲလည်း ဖြစ်ပါတယ်။ တရုတ်ဝယ်လက်ကလည်း ပဲတီစိမ်းကို အများအပြား ဝယ်ယူနေတာဖြစ်တဲ့အတွက် ပဲတီစိမ်းတောင်သူတွေကတော့ အရည်အသွေးပိုင်းနဲ့ ပဲ ပတ်သတ်ပြီး စိတ်ပူရမယ့် အခြေအနေတစ်ခုပါ။ ရန်ကုန်ဈေးကွက်မှာ ပဲတီစိမ်းက တစ်တင်းကို ၂၈၀၀၀ ကနေ ၄၀၀၀၀ အထိ ပေါက်ဈေးရှိပါတယ်။မုံရွာဈေး ကွက်မှာတော့ တစ်တင်းကို ၃၃၀၀၀ ကနေ ၃၆၅၀၀ ရှိပြီးတစ်တင်းကို ၅၅၀၀ ကျပ် ဈေးတက်လာပါတယ်။ ပခုက္ကူကုန်စည်ဒိုင်မှာတော့ တစ်တင်းကို ၃၃၀၀၀ ရှိပြီး ၁၀၀၀ ကျပ်ဈေးတက်လာပါတယ်။ ပြည်ကုန်စည်ဒိုင်မှာတော့ တစ်တင်းကို ၃၅၆၀၀ ကျပ် ရှိပါတယ်။

ကုလားပဲ

ဒီတစ်ပတ်မှာတော့ ကုလားပဲကလည်း ဈေးကျဆင်းသွားခဲ့ပါတယ်။ ငွေဈေးအပြောင်းအလဲကြောင့် ပြည်ပတင်ပို့မှု ပဲအများစု ကျဆင်းသွားခဲ့သလို ပြည်တွင်းဝယ်ယူတဲ့ ပဲတွေကလည်း ဈေးကျဆင်းသွားခဲ့ပါတယ်။

မုံရွာဈေးကွက်မှာ ကုလားပဲလုံးဝါ(ကြီး၊သေး)က တစ်တင်းကို ၂၃၅၀၀ ကနေ ၂၅၅၀၀ ရှိပြီး ၁၀၀၀ ကျပ်၊ ကုလားပဲလုံးဖြူ(ကြီး၊သေး)ကတော့ တစ်တင်းကို ၂၄၂၀၀ ကနေ ၂၅၅၀၀ ရှိပြီး တစ်တင်းကို ၁၀၀၀ ကျပ်ဈေးကျဆင်းသွားပါတယ်။ မြင်းခြံကုန်စည်ဒိုင်မှာ ကုလားပဲလုံးဝါကြီးက တစ်တင်းကို ၂၅၄၀၀ ကျပ်ရှိပြီး ၃၀၀ ကျပ်၊ ကုလားပဲလုံးဖြူကြီးက တစ်တင်းကို ၂၂၈၀၀ ရှိပြီး တစ်တင်းကို ၉၅၀ ကျပ်ဈေးကျဆင်းသွားခဲ့ပြီး

ပခုက္ကူကုန်စည်ဒိုင်မှာလည်း ကုလားပဲလုံးဖြူကြီးကတော့ တစ်တင်းကို ၂၄၅၀၀ ကျပ်ရှိပြီး ၂၅၀ ကျပ် ဈေးကျဆင်းသွားပါတယ်။

ဝတ်ရည်မွန်(AMIA)

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...