မတ်ပဲ၊ ပဲစင်းငုံ၊ ပဲတီစိမ်း ဈေးကွက်နှင့်အလားအလာ

မတ်ပဲနဲ့ ပဲစင်းငုံနီဟာ ဆက်တိုက်ကို ဈေးမြင့်တက်နေပြီး ဒီတစ်ပတ်ဈေးကွက်အပိတ် ဒီနေ့ မတ် ၁၇ ရက်မှာတော့  မတ်ပဲဈေးဟာ တစ်တန်ကို သိန်း ၂၀ ကျော်ထိ မြင့်တက်သွားပြီဖြစ်ပါတယ်။ ပဲစင်းငုံနီကတော့ တစ်တန်ကို ၂၂ သိန်း ၈ သောင်းနားကပ်လာပြီး ပဲတီစိမ်းကတော့ ဈေးပါးပါးလောက်အတက်အကျနဲ့ပဲ ငြိမ်နေပါတယ်။

ဒီပဲတွေရဲ့ ဈေးအတက်အကျတွေ ဘာကြောင့်ဖြစ်နေရတယ်၊ အလားအလာ ဘယ်လိုရှိနေလဲဆိုတာတွေနဲ့ ပတ်သက်လို့ လယ်ယာစိုက်ပျိုးရေးနှင့်ဈေးကွက်သတင်းအချက်အလက်အဖွဲ့(AMIA) ရဲ့ သုံးသပ်ချက်တွေကို ဖော်ပြပေးလိုက်ပါတယ်။

မတ်ပဲ

မတ်ပဲကတော့ ဆက်တိုက်ဈေးမြင့်တက်နေပါတယ်။ ပြည်တွင်းလက်ကြီးသမားတွေရဲ့ ဈေးဆွဲတင်မှုတွေကြောင့် ဈေးက တက်နေတာဖြစ်တယ်လို့သိရပါတယ်။ ကြိုပွိုင့်ရောင်းထားတဲ့ပဲတွေကို အပ်ရတော့မှာဖြစ်ပြီး တစ်တင်း ကို ၅၀၀၀၀ ကနေ ၅၅၀၀၀ ကြားပေးပြီး ဝယ်ယူထားကြတယ်လို့  နယ်အချို့က ပဲကုန်သည်တွေက ဆိုပါတယ်။

သတ်မှတ်ထားတဲ့အချိန် ပဲမအပ်ရင်တော့ လက်ရှိပေါက်ဈေးနှုန်းနဲ့ လျော်ရမှာဖြစ်လို့ ဈေးဆွဲတင်နေတာဖြစ်ပြီး ပဲအပ်ကာလ ကျော်လွန်သွားရင်တော့ ဈေးတွေ ပြန်ကျဆင်းနိုင်တယ်လို့ ခန့်မှန်းထားကြပါတယ်။

အိန္ဒိယနိုင်ငံမှာတော့ မတ်ပဲလိုအပ်ချက် ရှိနေလို့ CNFဈေးနှုန်းတွေပါ မြင့်တက်နေတာဖြစ်ပြီး  မတ်ပဲက ဈေး ဆက်မာဦးမယ်လို့သုံးသပ်မှုတွေ ရှိနေပေမဲ့ လက်ရှိပေါက်ဈေးနှုန်းထက် မြင့်သွားရင်တော့ အဝယ်လျော့နိုင်ပြီး ဈေးချဝယ်ယူတာတွေ ရှိလာနိုင်ပါတယ်။

ဒီနေ့ မတ် ၁၇ ရက်မှာတော့ ရန်ကုန်ဘုရင့်နောင်ဈေးကွက်မှာ မတ်ပဲ(FAQ/RC) တစ်တန်ကို ၂၀၀၈၀၀၀ ကျပ် ပေါက်ဈေးရှိပီး ပြီးခဲ့တဲ့တစ်ပတ်နဲ့ယှဉ်ရင် တစ်တန်ကို ၇၀၀၀၀ ကျော် ဈေးမြင့်တက်လာပါတယ်။

မန္တလေးဈေးကွက်၊ မုံရွာဈေးကွက်၊ အောင်လံဈေးကွက်၊ မော်လမြိုင်ဈေးကွက်၊ ပြည်ဈေးကွက်တို့မှာလည်း ဈေးတွေအားလုံးတက်ပါတယ်။

ပြီးခဲ့တဲ့ ၂၀၂၂ ခုနှစ် ကာလတူ အခြေအနေမှာတုန်းကတော့ မတ်ပဲက တစ်တန်ကို ကျပ် ၁၄ သိန်းကျော်သာ ပေါက်ဈေးရှိခဲ့တာ ဖြစ်ပါတယ်။

ပဲစင်းငုံနီ

ပဲစင်းငုံနီကလည်း လက်ကျန်မရှိတော့ဘဲ ဈေးက မြင့်တက်နေတာ ဖြစ်ပါတယ်။ ရောင်းသူ ဝယ်သူ စိတ်ကြိုက် ဈေးပေးဝယ်ယူမှုတွေအထိ ရှိနေတယ်လို့လည်း ပဲကုန်သည်တွေအကြား သိရပါတယ်။ အိန္ဒိယနိုင်ငံကလည်း ပဲ အထွက်နှုန်းလျော့မယ်လို့ ထုတ်ပြန်ထားတာကြောင့် မြန်မာပြည်တွင်းမှာရှိတဲ့ အထွက်နှုန်းနည်းတဲ့ ပဲစင်းငုံနီက ဈေးမြင့်နေတာဖြစ်ပါတယ်။ အခုလို ဈေးတွေမြင့်တက်နေပေမယ့် တောင်သူအများစုလက်ထဲမှာတော့ ပဲမရှိတော့ ဘူးလို့ သိရပါတယ်။

ရန်ကုန်ဈေးကွက်မှာ ပဲစင်းငုံနီက တစ်တန်ကို ကျပ် ၂၂၇၈၀၀၀ ပေါက်ဈေးရှိပြီး ပြီးခဲ့တဲ့အပတ်နဲ့ယှဉ်ရင် တစ်တန်ကို ၇၀၀၀၀ နီးပါး ဈေးမြင့်တက်လာပါတယ်။

မန္တလေးဈေးကွက်၊ ပခုက္ကူ၊ မုံရွာနဲ့ အောင်လံဈေးကွက်မှာလည်း ဈေးတွေမြင့်တက်ပါတယ်။

ပြီးခဲ့တဲ့ နှစ် ကာလတူအခြေအနေမှာတုန်းကတော့ ပဲစင်းငုံနီက တစ်တန်ကို ၁၄ သိန်း ၁ သောင်းကျော်သာ ပေါက်ဈေးရှိခဲ့တာဖြစ်ပါတယ်။

ပဲတီစိမ်း

ပဲတီစိမ်းကတော့ ပါးပါးလေးအကျရှိတာကလွဲလို့ အတက်ဈေးနဲ့ ဈေးငြိမ်နေတယ်လို့ ပြောလို့ရပါတယ်။ နေ့စဉ်ပဲ အဝင်ပေါ်မူတည်ပြီး အပြောင်းအလဲ အနည်းငယ်သာ ရှိနေတာပါ။ ဗဟိုဘဏ်မူဝါဒကြောင့် ပြည်ပတင်ပို့ရာမှာ ဆုံးရှုံးနစ်နာမှုတွေ ရှိနေလို့ တင်ပို့မှုကတော့ အနည်းငယ်လျော့နည်းသွားတယ်လို့ သိရပါတယ်။ ဒါပေမဲ့ ပြည်ပနိုင်ငံအများစုကိုတော့ တင်ပို့နေဆဲဖြစ်လို့ လက်တလောမှာတော့ ဈေးက မာပြီး ငြိမ်နိုင်တယ်လို့ ကုန်သည် အချို့က ခန့်မှန်းပါတယ်။

ရန်ကုန်ဈေးကွက်ကော မန္တလေးဈေးကွက်မှာကော ပဲတီစိမ်းဈေးက အတက်အကျ ပါးပါးလောက်ပဲရှိတာပါ။

နယ်ဈေးကွက်အချို့မှာတော့ ပစ္စည်းလက်ကျန်မရှိတော့ဘူးလို့ သိရပါတယ်။

(လယ်ယာစိုက်ပျိုးရေးနှင့်ဈေးကွက်သတင်းအချက်အလက်အဖွဲ့ (AMIA) က ပေးပို့လာသည့် ဈေးနှုန်းများနှင့် သုံးသပ်ချက်ကို အခြေခံဖော်ပြခြင်း ဖြစ်ပါသည်။)

(အခြားကုန်စည်နှင့်သီးနှံဈေးနှုန်းများ သိရှိလိုပါက Green Way App ရှိ ' သီးနှံဈေးနှုန်းများ ' ကဏ္ဍတွင် ဝင်ရောက်ကြည့်ရှုနိုင်ပါသည်။)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။

Read more

Facebook Page သို့သွားရန်