စားကျက်မြေ ရှားလာသဖြင့် တနိုင်တပိုင် ဘဲမွေးမြူမှု နည်းလာ

ကျေးလက်ဒေသတွင် ဘဲလွှတ်ကျောင်းရန်အတွက် စားကျက်မြေနေရာ ရှားပါးလာသဖြင့် တနိုင်တပိုင် ဘဲမွေးမြူရေး လုပ်ကိုင်သူ အလွန်နည်းပါးလာကြောင်း သိရသည်။

ဘဲအရှင် ဖမ်းဈေးကွက် ကောင်းမွန်သည့်အတွက် တနိုင်တပိုင် မွေးမြူလိုသူများ ရှိသော်လည်း စားကျက်မြေနေရာ နည်းပါးလာခြင်း၊ မွေးမြူရေးအစာ ဈေးနှုန်းမြင့်တက်လာခြင်း စသည့် အခြေအနေများကြောင့် ဘဲမွေးမြူရေး လုပ်ကိုင်သူ နည်းပါးလာခြင်းဖြစ်ကြောင်း သိရသည်။

လက်ရှိတွင် ဘဲအရှင် ဖမ်းဈေးကွက်မှာ တစ်ပိဿာလျှင် ကျပ် ၂၃,၀၀၀ မှ ၂၄,၀၀၀ အတွင်း ဈေးရှိကြောင်း သိရသည်။

"ပုံမှန်ဆို ဘဲမွေးတာက သူတို့ကိုထားဖို့ ခြံလိုတယ်။ ကျန်တာက လယ်တွေထဲ လွှတ်ကျောင်းရတာ။ အခုက လွှတ်ကျောင်းဖို့ နေရာက ရှားလာတယ်။ လယ်သမားတွေကလည်း လယ်တွေထဲ အကျောင်းမခံဘူး။ မွေးမြူရေးအစာ ကျွေးရင်လည်း တွက်ခြေမကိုက်နိုင်ဘူး" ဟု တနိုင်တပိုင် ဘဲမွေးမြူရေး လုပ်ကိုင်သူ ဦးစိုးက ပြောသည်။

ကျေးလက်ဒေသတွင် တနိုင်တပိုင် မွေးမြူရာ၌ အများဆုံး မွေးမြူသည့် ဘဲအမျိုးအစားမှာ မန်ဒါလီနှင့် ကတ်ဘဲများ ဖြစ်ကြောင်း၊ မွေးမြူရေးခြံများအနေဖြင့်မူ ကာကီကင်းဘဲ အမျိုးအစားကို မွေးမြူမှု များကြောင်း သိရသည်။

အဆိုပါ ကာကီကင်းဘဲ အမျိုးအစားသည် ထိုင်းနိုင်ငံမှ မျိုးဥဝယ်ယူပြီး ပြည်တွင်း၌ သားဖောက်ကာ ပြန်လည်ရောင်းချခြင်း၊ မွေးမြူခြင်း ဖြစ်ကြောင်း သိရသည်။

ယခုနောက်ပိုင်းတွင် အဆိုပါ ကာကီကင်းဘဲ အမျိုးအစားကို အနည်းဆုံး အကောင်ရေ ၃၀၀ မှ ၅၀၀ အကြားအထိ မွေးမြူမှု ရှိသလို အများဆုံးဆိုလျှင် အကောင်ရေ ၁,၀၀၀ မှ ၂,၀၀၀ ကြားအထိ စီးပွားဖြစ် မွေးမြူမှု ရှိလာကြောင်း သိရသည်။

AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။