ငါးဖယ်အောင်းငါး အသားတိုးမွေးမြူနည်းနှင့် ငါးမှုံ၊ ငါးသန်သားပေါက်ပြုစုနည်း

ငါးဖယ်အောင်းငါးမျိုးသည် ငါးသိုင်းမျိုးတွင်ပါဝင်ပြီး အလတ်စားငါးမျိုးဖြစ်သည်။ ကျောခုံး၍ အမြီးခွရှည်သော အကြေးခွံရှိငွေရောင်ငါးတစ်မျိုးဖြစ်သည်။

ပါဏဗေဒအလိုအားဖြင့် ငါးဖယ်အောင်းကို 'ရိုးတီးဗီလင်ဂါရီ'ဟုခေါ်သည်။ ခန္ဓာကိုယ်မှာ ခပ်ပြားပြားရှိပြီး ဦးခေါင်းမှလွဲ၍ တစ်ကိုယ်လုံးတွင် အဖြူရောင်အကြေးများ ဖုံးအုပ်လျက်ရှိသည်။ ကျောရိုး ဆူးတောင်တစ်ခုတည်းသာ ရှိသည်။ နှာတံတွင် အပေါက်ကလေးများ ပါရှိသည်။ ခန္ဓာကိုယ်သည် သိသိသာသာပြားသည်။

ဝမ်းဗိုက်အလျားတစ်ခုလုံးသည် တစ်ပြေးညီ တည်ရှိသည်။ စအိုရေယက်သည် တို၍ ဆူးမျှင်ပျော့ ၁၇ - ၁၈ ချောင်း ရှိပါသည်။ ကျောဆူးတောင်သည် ရှည်လျား၍ လွှသွားပုံဆူးမာ ဖြစ်သည်။ ခန္ဓာကိုယ်အရောင်သည် ငွေရောင်ဖြစ်၍ ကျောဘက်ပိုင်းသည် ငွေရောင်မှိုင်းမှိုင်းဖြစ်သည်။ မျက်ဆံသည် အနီရောင်ဖြစ်သည်။ ပါးစပ်ကျယ်၍ သွားမရှိဘဲ အပေါ်မေးရိုး အောက်မေးရိုးဖြင့် ကာကွယ်ထားသည်။

ငါးဖယ်အောင်း(Osteobrama belangeri) ၏ အသေးစိတ်အချက်အလက်များ

Kingdom - Animalia

Phylum - Chordata

Class - Actinopterygii

Order - Cypriniformes

Family - Cyprinidae

Genus - Osteobrama

Species - balengeri

ငါးဖယ်အောင်းမျိုးငါး အထီးနှင့်အမ ရွေးချယ်ခြင်း

ဆေးထိုးရန်အသင့်ဖြစ်နေသော ငါးဖယ်အောင်းမျိုး ငါးအထီး၏ ရင်ရေယက်သည် ကြမ်းတမ်းနေပါသည်။ အရောင်အသွေး တောက်ပနေပါသည်။ မျိုးရည် (Sperm) ကို စစ်ဆေးကြည့်သောအခါ မပျစ်လွန်းမကျဲလွန်း သွေးရောင်မပါသော မျိုးရည်ဖြစ်၍ နို့နှစ်ရောင်သန်းနေပါသည်။ ဆေးထိုးရန် အသင့်ဖြစ်နေသော ငါးဖယ်အောင်းမျိုးငါးအမ၏ ရင်ရေယက်သည် ချောမွေ့နေပါသည်။ ရင်ခေါင်းပိုင်းသည် လုံးဝန်း၍ ဘေးမြောင်းထမနေဘဲ ဝမ်းဗိုက်သည် ပျော့လည်နေသည်။ ငါးဥ၏အရောင်သည် သိသာထင်ရှားစွာ ပယင်းရောင်သန်းနေပါသည်။

ဆေးထိုးသားဖောက်ခြင်း

ငါးဖယ်အောင်းဆေးထိုးသားဖောက်ရာတွင် ဟော်မုန်းဆေးအဖြစ် Suprefact-E နှင့် Motilium-M တို့အား အသုံးပြုပါသည်။

အမ 1 Kg တွင် Suprefact -E (30) microgram × 0.5 pcs × 0.5 distilled water နှင့်
အထီး 1 Kg တွင် Suprefact -E(15)microgram ×0.5 pcs ×0.5 distilled water ဖြင့် ဆေးထိုးပါသည်။
ဆေးထိုးပြီးပါက (၆ပေ x ၄ပေ x ၄ပေ) အကျယ်ရှိသော breeding hapa တွင်ထည့်၍ မျိုးငါးအစုံ(၆)စုံအထိ ထည့်သွင်းမိတ်လိုက်စေနိုင်ပါသည်။

ငါးဖယ်အောင်းမျိုးငါးများ မိတ်လိုက်ဥချခြင်း

ငါးဖယ်အောင်းမျိုးငါးများအား ဆေးထိုးသားဖောက်ခြင်းဆောင်ရွက်ရာတွင် ဟော်မုန်းဆေးထိုးပြီး (၆)နာရီအကြာတွင် စတင်မိတ်လိုက်၍ဥချပါသည်။ ဥချပြီး ၂ နာရီတွင် ရေမာဥများဖြစ်လာသည်။ ငါးဖယ်အောင်းဆေးထိုးသားဖောက်ရန်အတွက် အထီး(၂)ကောင်၊ အမ(၁)ကောင် အချိုးအားဖြင့် မျိုးငါးများအားရွေးချယ်၍ ဆေးထိုးသားဖောက်ပါသည်။

ငါးဥများ ဆယ်ယူစုဆောင်းခြင်းနှင့် သားဖောက်ခြင်း

မျိုးငါးများ ဥချပြီး (၂) နာရီခန့်အကြာတွင် ရေမာဥလေးများ ဖြစ်လာ၍ ဆယ်ယူစုဆောင်းပါသည်။ငါးဖယ်အောင်းငါးမျိုး 1 kg အလေးချိန်ရှိ ငါးမျိုးမတစ်ကောင်၏ ဥချမှုအရေအတွက်သည် ဥလုံးရေ (၄)သိန်းခန့် ဥချသည်။

ငါးဖယ်အောင်းငါးဥများမှ အကောင်ပေါက်ခြင်း

မြန်မာနိုင်ငံ၏ မုတ်သုံရာသီဖြစ်သော(ဇွန်၊ ဇူလိုင်၊ သြဂုတ်) လများတွင် ဆေးထိုးသားဖောက် ပြုလုပ်နိုင်သည်။ ရရှိလာသော ရေမာဥလေးများအား ဥဖောက်ကိရိယာ(Jar) ထဲတွင်ထည့်၍ အောက်စီဂျင်လေပေးခြင်း ပြုလုပ်ပေးထားရပါသည်။ သန္ဓေအောင်ဥများသည် ရေအပူ ချိန်(၂၄-၂၅) ဒီဂရီစင်တီဂရိတ်တွင် ၁၆ နာရီ အကြာတွင် အကောင်ပေါက်လာသည်။ ငါးဖယ်အောင်းငါးမျိုး၏ ဥအရောင်သည် အဝါနုရောင်ရှိသည်။

ငါးမှုံ၊ ငါးသန်သားပေါက်ပြုစုခြင်း

ငါးဖယ်အောင်းသားပေါက်များအား ဥမှပေါက်ခါစ သားလောင်းများ၌ (yolksac) ခေါ် အစာအိတ်ပါလာပြီး ၄၈ နာရီအကြာထိ အဆိုပါအစာအိတ်မှအာဟာရမှီဝဲပြီး ကြီးလာကြသည်။ ၄၈ နာရီကြာပြီးနောက် သားလောင်းများသည် ပြင်ပအစာများ စတင်စားလာနိုင်ကြသဖြင့် ဗီတာမင်အားဆေးနှင့် ကြက်ဥအနှစ်တို့ကိုရောကာ (၃) ရက်ကြာအထိ တစ်နေ့လျှင် ၄ ကြိမ် ကျွေးရပါသည်။ အကောင်ပေါက်ပြီး ၄ ရက်အကြာတွင် ငါးမှုံပြုစုရန် ကြိုတင်ပြင်ဆင်ထားသော မြေသားကန် ၁ ဧကကန် (အလျား ၂၀၀ x အနံ ၂၀၀) ပတ်လည်ရှိကန်တွင် ငါးမှုံကောင်ရေ(၂၀) သိန်းခန့် ထည့်သွင်းပြုစုနိုင်ပါသည်။

ငါးမှုံသားပေါက်ကန်အား ကြိုတင်ငါးရိုင်းရှင်း၍ ရေအနက် (၁) ပေခွဲတွင် ပဲဖတ် တစ်နေ့လျှင် သုံးပိဿာအား နေ့/ည (၂) ကြိမ်ခွဲကျွေး၍ ငါးမှုံ(၁၀)ရက်သားအထိ ပြုစုမွေးမြူရပါသည်။ ထို့နောက် ငါးမှုံ(၁၀)ရက်သားမှ ရက်ပေါင်း (၃၀) အထိ ဖွဲနု၊ ပဲဖတ်၊ ငါးကြေမှုန့်တို့အား (၃:၂:၁) အချိုးဖြင့် အချိုးကျရောစပ်၍ ရောစပ်ထားသောအစာအား တစ်နေ့လျှင်(၆)ပိဿာအား (၃) ကြိမ်ခွဲ၍ ငါးမှုံအား အစာကျွေးပြုစုရပါသည်။

ငါးဖြန်းပြုစုမွေးမြူခြင်း

တစ်လက်မအရွယ်ငါးသားပေါက်များကို မြေသားကန်တွင် ကောင်ရေ ၁၂၀၀၀၀ ထိ မွေးမြူနိုင်ပြီး ငါးဖြန်းအရွယ် (၃ လက်မ - ၄ လက်မ) အရွယ် ရောက်ရှိအောင် Protein 40 % ပါဝင်သောစပ်စာအား တစ်နေ့လျှင် (၂) ကြိမ်နှုန်းဖြင့် တစ်ကြိမ်လျှင် (၂-၄ ပိဿာ) အား body weight ၏ (10 % )ဖြစ်သော အစာအားကျွေး၍ မွေးမြူနိုင်ပါသည်။

အသားတိုးပြုစုမွေးမြူခြင်း

ငါးဖယ်အောင်းမွေးမြူရာတွင် မြေသားကန်အတွင်း၌ တစ်ဧကလျှင် ကောင်ရေ ၂၀၀၀၀ နှုန်း ထည့်သွင်းမွေးမြူနိုင်ပြီး ငါးဖြန်းအရွယ် (၃)လက်မအရွယ်များ ထည့်သွင်းမွေးမြူနိုင်ပါက ရှင်သန်နှုန်းပိုမိုရရှိနိုင်မည်ဖြစ်သည်။ Protein 40% ပါဝင်သေ ာဖော်စပ်အစာအား မွေးမြူထားသောငါးအလေးချိန်၏(၅-၇ %)ရှိ အစာအား နေ့စဉ်ကျွေးပြီး မွေးမြူပါက (၆-၇) လအတွင်း စျေးကွက်ဝင်အရွယ်(၃၀၀-၅၀၀)ဂရမ်အထိငါးများ ရရှိနိုင်ပါသည်။ ငါးဖယ်အောင်းငါးမျိုးသည် အစုံစားငါးမျိုးဖြစ်၍ သက်ရှိအကောင်ငယ်လေးများနှင့် အစာစိမ်းများလည်း ထည့်သွင်းကျွေးမွေးနိုင်ပါသည်။

ဆောင်းပါးများ/ သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...