မုန်တိုင်းမရှိတော့သော်လည်း ကြွင်းကျန်တိမ်တိုက်များကြောင့် ဒေသအချို့ မိုးများနိုင်သေး

25/10/2022 15:12 PM တွင် အစိမ်းရောင်လမ်း အစိမ်းရောင်လမ်း မှ ရေးသား

ဆိုင်ကလုန်းမုန်တိုင်း SITRANG ဟာ အားပျော့သွားပြီး လက်ရှိမှာ အိန္ဒိယနိုင်ငံအရှေ့ခြမ်းဘက်ကို ဝင်သွားပြီ ဖြစ်ပေမဲ့ သူ့ရဲ့ အကြွင်းအကျန်တိမ်တိုက်တွေ ဆက်လက်ရွေ့လျားမှုကြောင့် အောက်တိုဘာလ ၂၅ ရက်-၂၆ ရက်နေ့တွေမှာ မြန်မာနိုင်ငံအနောက်ခြမ်းနဲ့ ကချင်ပြည်နယ်တို့မှာ မိုးဆက်လက်ရွာနိုင်ပြီး ကချင်ပြည်နယ်မှာတော့ နေရာကွက်ပြီးမိုးများနိုင်သေးတယ်လို့ နိုင်ငံတကာမိုးလေဝသ ထုတ်ပြန်ချက်တွေကို ကိုးကားခန့်မှန်းပေးနေသူ ဦးဝင်းနိုင်က ပြောပါတယ်။

ဒါနဲ့ပတ်သက်လို့ မုန်တိုင်းရဲ့နောက်ဆုံးအခြေအနေ၊ သူ့ရဲ့အရှိန်ကြောင့် မိုးများနိုင်သေးတဲ့ဒေသတွေ၊ မိုးမများပေမယ့် မိုးအနည်းငယ်တော့ ရွာနိုင်သေးတဲ့ဒေသတွေ၊ လေတွေကော တိုက်ဖို့ရှိသေးလား ဆိုတာတွေ အပေါ် ဦးဝင်းနိုင်ထံ Green Way က ဆက်သွယ်မေးမြန်းထားတာတွေကို ဖော်ပြပေးလိုက်ပါတယ်။

#Sitrang မုန်တိုင်းရဲ့ အခုနောက်ဆုံးအခြေအနေ ဘာဖြစ်သွားပြီလဲ..

“ သူက အခု ဘင်္ဂလားဒေ့ရှ်ကိုကျော်ပြီး အိန္ဒိယအရှေ့ဘက်ခြမ်း အာသံ၊ မဏိပူရဘက်ကိုရောက်သွားပြီ။ လက်ရှိက ၁၆ မိုင်နှုန်းလောက်ပဲရှိတော့တယ်။ မနက်ဖြန် မနက်ပိုင်းလောက်ကျရင်တော့ တစ်နာရီ ၁၄ မိုင်နှုန်းလောက်ကိုရောက်ပြီး အားပျော့ပျက်ပြယ်သွားတော့မယ်”

#လာမယ့် ၂၄ နာရီအတွင်း မိုးများနိုင်၊ မိုးရွာသေးနိုင်တဲ့ ဒေသများ

" အများဆုံးဖြစ်မှာက ကချင်ပြည်နယ်နဲ့ ချင်းပြည်နယ်မြောက်ပိုင်းပေါ့။ ဟုမ္မလင်းကနေ ကချင်ပြည်နယ်ထဲက ခန္တီး အထိ သွားလိမ့်မယ်။ အဲ့ဒီကြားပေါ့ဗျာ။ ဘာလို့လဲဆိုတော့ မုန်တိုင်းရွေ့သွားတဲ့လမ်းကြောင်းနဲ့နီးသွားလို့။ အာသံ၊ မဏိပူရဘက်နဲ့သွားနီးတဲ့အတွက် ဟုမ္မလင်း၊ မိုးညှင်း၊ တနိုင်း၊ ခန္တီး အဲ့ဒီလေးခုကြား ဧရိယာတွေမှာ မိုးများမယ်။ ၂၄ နာရီအတွင်းမှာကို ၄ လက်မခွဲလောက်ထိရွာနိုင်တယ်။ ဆိုတော့ တော်တော်များတာပေါ့"

"နောက်များမယ့်ဒေသဆို ကချင်ပြည်နယ်အထက်ပိုင်းက နောင်မွန်းကနေ မြောက်ဖျား မေခ၊ မလိခ စပြီးမြစ်ဖျားခံတဲ့ ဒေသတွေအထိပေါ့။ သူက ခုနပြောတဲ့နေရာတွေလောက်တော့မများဘူး။ ဒါပေမဲ့ ၁ လက်မလောက်ပဲလျော့မယ်။ ၃ လက်မခွဲလောက် ရွာလိမ့်မယ်"

"နောက်ထပ် ဒုတိယအများဆုံးဖြစ်မယ့်နေရာတွေကတော့ တန့်ဆည်နဲ့ မိုးကုတ်ကြား။ အဲ့ဒီနေရာတွေမှာက လာမယ့် ၂၄ နာရီအတွင်း ၂ လက်မလောက်ထိ ရွာနိုင်တယ်။ နောက်ပြီးတော့မှ ချင်းပြည်နယ်တောင်ပိုင်း မတူပီ၊ နောက် ရခိုင် ပြည်နယ်တောင်ပိုင်း တောင်ကုတ်၊ ငပလီ၊ ကျောက်ဖြူ၊ စစ်တွေ ပတ်ဝန်းကျင်တွေမှာတော့ နောက်လာမယ့် ၂၄ နာရီ အတွင်း ၂ လက်မကျော် ရွာနိုင်မယ်"

"နောက်မိုးအသင့်အတင့် ရွာနိုင်တဲ့ဒေသကတော့ ကရင်ပြည်နယ်။ သူကတော့ သိပ်မများဘူး။ ၁ လက်မခွဲလောက်ပဲ။ ကျန်တဲ့ဒေသတွေမှာတော့ ဥပမာ ပဲခူးတိုင်းတို့၊ ရန်ကုန်တိုင်းတို့၊ ဧရာဝတီတိုင်း အနောက်ခြမ်းတို့ မှာတော့ ၁ လက်မ အောက်ပဲရွာတော့မယ်။ နည်းနည်းပါးပါးလောက်ပဲဖြစ်မှာပေါ့"

#မိုးချည်းပဲလား၊ လေတွေကာ တိုက်နိုင်သေးလား?

"လေတွေကတော့ မရှိတော့ဘူး။ တိမ်တွေက အနောက်ဘက်ကနေ အရှေ့မြောက်ဘက်ကို အကွင်းလိုက်၊ အတန်းလိုက် ကြီးတွေ ရွေ့သွားပြီ။ အဲ့တော့ လေတော့ မပါနိုင်တော့ဘူး"

"မနက်ဖြန်(အောက်တိုဘာ ၂၆) ပြီးသွားပြီးရင်တော့ လျော့သွားပြီ။ မိုးမရွာနိုင်တော့ဘူး။ ဒါပေမဲ့ GTHO (Global Tropics Hazards Outlook) ရဲ့ ရက်ဝေးခန့်မှန်းချက်အရဆိုရင်တော့ နောက် ၅ ရက်နဲ့ ၁၀ ရက်ကျရင် ရခိုင်ကမ်းရိုးတန်းတစ်လျှောက်နဲ့ တောင်ဘက်ဧရာဝတီတိုင်း၊ ရန်ကုန်တိုင်း၊ ပဲခူးတိုင်းနေရာတွေမှာ မိုးပြန်ရွာနိုင်ချေ က ရှိနေသေးတယ် ပြောထားတယ်။ နိုဝင်ဘာ ၈ ရက်အထိ ဖြစ်နိုင်တယ်။ ဒါကတော့ စောင့်ကြည့်ရဦးမှာပေါ့"

#(ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

Photos Crd_ U Win Naing

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။ 


မာလာမြိုင် ကုမ္ပဏီ ကြော်ငြာ
ဦးကြီးတို့ရဲ့ မြေကြီးက ရွှေသီးဖို့ပဲ ဖြစ်သင့်တာပေါ့။ ဒါပေမဲ့ စပါးခင်းထဲ ရွှေခရုရောက်လာပြီဆိုရင်တော့ မြေကြီးက ရွှေသီးဖို့ကို အနှောင့်အယှက် ကောင်းကောင်းကြီးပေးပါလိမ့်မယ်။ မြန်မာ့မျိုးရင်းခရုမဟုတ်တဲ့ တောင်အမေရိကမျိုးစိတ်ဖြစ်ပြီး မြန်မာနိုင်ငံကို ကျူးကျော်လာတဲ့ မျိုးစိတ်ဖြစ်တာကြောင့် အကောင်ပွားနှုန်းကလည်း အဆမတန် မြင့်တက်လာပါတယ်။ ခရုအမ တစ်ကောင်က တစ်ခါ ဥ မယ်ဆိုရင် ဥအရေအတွက် ၁၀၀ ကနေ ၁၀၀၀ အထိ အတွဲလိုက်ဥကြပြီး တစ်နှစ်မှာ ၃ ကြိမ်အထိ မျိုးပွားနိုင်ပါတယ်။ စပါးခင်းတွေမှာ ရွှေခရုကျပြီဆိုရင် ပန်းရောင် ဥ တွေ ကို စပါးပင်တွေမှာ တွေ့ရနိုင်ပါတယ်။ ဒီရွှေခရုတွေကို ရှင်းပစ်ဖို့အတွက်ကတော့ မာလာမြိုင်ရဲ့ ခရုဘုရင် ရှိနေပါပြီ။ ခရုဘုရင်က စားသေအစွမ်းနဲ့ အဆိပ်ငွေ့အာနိသင်ရှိတာကြောင့် ရွှေခရုတွေကို အထိရောက်ဆုံး ရှင်းပေးနိုင်မှာပါ။ အစွမ်းရှိပစ္စည်းဖြစ်တဲ့ Niclosamide -olamine 83.1% WP ပါဝင်ပြီး Chloronitrophenol ဆေးအုပ်စုထဲ ပါဝင်ပါတယ်။ ရေဖျော်ဆေးမှုန့်အမျိုးအစားဖြစ်လို့ ရေ ၂၀ လီတာဝင်တဲ့ဆေးဖျန်းပုံး တစ်ပုံးမှာ ၄၀ ကနေ ၅၀ ဂရမ်အထိ အသုံးပြုနိုင်ပါတယ်။ နှုန်းထားကိုတော့ တစ်ဧကမှာ ၁၅၀ ကနေ ၂၀၀ ဂရမ်နဲ့ တွက်ချက်ပေးထားပါတယ်။ သတိပြုရမှာတော့ ဆေးဖျန်းပြီးနောက်ပိုင်း စပါးခင်းအတွင်းမှာရှိတဲ့ ရေကို ၅ စင်တီမီတာနဲ့ ၃ ရက်ထားဖို့ လိုအပ်ပါတယ်။ ဆေးဖျန်းပြီး ၅၂ ရက်ကြာမှ ရိတ်သိမ်းသင့်ပါတယ်။ ခရုဘုရင်နဲ့ဆို စပါးခင်းကို ဒုက္ခပေးတဲ့ ရွှေခရုတွေကို ရှင်းလင်းနိုင်ပြီး မြေကြီးက ရွှေသီးနိုင်ပြီပေါ့ဗျာ။
Read more Facebook Page သို့သွားရန်

ဆွေးနွေးချက်များ

ဆွေးနွေးရန်