ထိုင်းနှင့်လာအိုဘက် အအေးလှိုင်းဖြတ်မှု မြန်မာပြည်အရှေ့ခြမ်းကို သက်ရောက်မည်

ထိုင်းနဲ့လာအိုဘက်ကို အအေးလှိုင်းဖြတ်မှုရဲ့အရှိန်ကြောင့် ဒီဇင်ဘာ ၁၈ ရက်ကစလို့ မြန်မာနိုင်ငံ အရှေ့ခြမ်းတစ်ခုလုံးမှာ ထူးထူးခြားခြား အအေးပိုလာနိုင်မယ်လို့ နိုင်ငံတကာမိုးလေဝသထုတ်ပြန်ချက် တွေကို ကိုးကားပြီး မိုးလေဝသခန့်မှန်းသူ ဦးဝင်းနိုင်က ခန့်မှန်းပါတယ်။

ဒီအအေးလှိုင်းဟာ လာအို၊ ဗီယက်နမ်မြောက်ပိုင်းနဲ့ ထိုင်းကိုသာ အဓိကဖြတ်မှာဖြစ်ပေမဲ့ အဲ့ဒီအရှိန်နဲ့ အရှေ့ ဘက်ကဝင်လာမဲ့ လေဖိအားများရပ်ဝန်းက လေအေးစီးကြောင်းတွေကြောင့် မြန်မာနိုင်ငံ အရှေ့ခြမ်းတစ်ခုလုံးမှာ ထူးထူး ခြားခြား အအေးပိုလာနိုင်တာဖြစ်တယ်လို့ ဦးဝင်းနိုင်က ဆိုပါတယ်။

“ သူက ထိုင်းနဲ့လာအိုဘက်ကိုပဲ အဓိကပေါ့နော်။ ကျွန်တော်တို့ဘက်ကို သက်ရောက်မှုကတော့ မြန်မာပြည်အရှေ့ပိုင်းတစ်ခြမ်းပဲထိမယ်။ ထိုင်းဘက်မှာလည်း ၁၈ ရက်နေ့အတွက် သတိပေးချက် တွေ ထုတ်ထားတာတွေ့တယ်။ မြန်မာဘက်မှာဆိုရင်တော့ အရှေ့ခြမ်းက တာချီလိတ်တို့၊ ကျိုင်းတုံတို့ဆို ၁၁ ဒီဂရီလောက်ထိ ကျဖို့ရှိတယ်။ ကရင်ဘက်ဆို လှိုင်းဘွဲ့ဆိုလည်း အဲ့ဒီလောက်ပဲ။ မြဝတီ၊ မဲဆောက်ဘက်ဆိုလည်း ၁၆ ဒီဂရီလောက်ထိ ကျမယ်။ ဆိုတော့ သက်ရောက်မှုအပိုင်းကတော့ မြန်မာပြည်အရှေ့ပိုင်းတစ်ခြမ်းပေါ့။ အထူးသဖြင့် ရှမ်းပြည်နယ်ပေါ့။ ပြီးတော့မှ အောက်ဘက်က ကရင်ပြည်နယ်၊ မွန်ပြည်နယ်နဲ့ တနင်္သာရီတိုင်းအရှေ့ခြမ်းတွေပေါ့။ အဲ့ဒီနေရာတွေမှာ အအေးဓာတ် သက်ရောက်မှုများမယ်” 

ဒီလို လေဖိအားများရပ်ဝန်းကြောင့် အအေးပိုနေမှုတွေဟာ ဒီဇင်ဘာ ၁၈ ရက်ကစလို့ ၂၁ ရက်နေ့ လောက်ထိ ရှိနေနိုင်မှာဖြစ်တယ်လို့လည်း ဦးဝင်းနိုင်က ဆိုပါတယ်။

မြန်မာပြည်အရှေ့ခြမ်းမဟုတ်တဲ့ တခြားဒေသတွေကိုတော့ ဒီအအေးလှိုင်းက ထူးထူးခြားခြား သက် ရောက်မှုမရှိနိုင်ဘူးလို့ သိရပါတယ်။ ဒါပေမဲ့ ရန်ကုန်တို့၊ ပဲခူးတို့အပါအဝင် အောက်ပိုင်းဒေသတွေမှာ တော့ ယခင်ခန့်မှန်းထားတဲ့အတိုင်း ဒီဇင်ဘာ ၁၉ ရက်နောက်ပိုင်းကျရင်တော့ အအေးတွေ ပိုလာနိုင် တယ်လို့ ဦးဝင်းနိုင်က ခန့်မှန်းပါတယ်။

လက်ရှိမှာ မုတ်သုံမျဉ်းဟာ အီကွေတာပေါ် သုညဒီဂရီကိုရောက်သွားပြီဖြစ်ပြီး မုတ်သုံမျဉ်းကြောင့် ဖြစ်လာမဲ့တိမ်ထုစုဖွဲ့မှုက ၅ ဒီဂရီဝန်းကျင်လောက်ပဲရှိတော့လို့ (ကော့သောင်းက လတ္တီတွဒ် ၁၀ ဒီဂရီမှာရှိ) မြန်မာနိုင်ငံဘက်ကို ဖျက်မိုးတွေ ဝင်ရောက်နိုင်ချေ၊ မိုးတိမ်တောင်တွေဖြစ်လာပြီး ရုတ်တရက်စိုက်ဆင်းလေပြင်းကျရောက်နိုင်တဲ့အခြေအနေတွေဟာ လုံးဝမရှိသလောက်ဖြစ်သွားပြီလို့ လည်း ဦးဝင်းနိုင်က ပြောပါတယ်။

#(ဆရာဦးဝင်းနိုင်အနေဖြင့် Windy App ရှိ ကမ္ဘာလုံးဆိုင်ရာမိုးလေဝသ Model များဖြစ်သည့် ECMWF Model နှင့် GFS Model ခန့်မှန်းချက်များကို အသုံးပြု၍ ကြိုတင်ခန့်မှန်းခြင်း ဖြစ်ပါသည်)

Photos Crd_ U Win Naing

#(မိမိဒေသ မြို့နယ်တစ်ခုချင်းအလိုက် အသေးစိတ်မိုးလေဝသအခြေအနေများကို သိလိုပါက Green Way app ရှိ ‘ မေးကြ၊ ဖြေကြ ဒေသအလိုက် မိုးလေဝသ’ အဖွဲ့တွင် အခမဲ့အဖွဲ့ဝင်ပြီး ဆရာနှင့် တိုက်ရိုက်မေးမြန်းနိုင်ပါသည်)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။