ငါး၊ ပုစွန်တို့အတွက် လိုအပ်တဲ့ ပရိုတင်း

မွေးမြူထားသော ငါးပုစွန်များတွင်လည်း အစာစားသည့် အလေ့အထပေါ် မူတည်၍ အပင်စား (Herbivore), အသားစား (Carnivore), အစုံစား (Omnivore) ဟူ၍ တူညီမှု မရှိသလို ရေပေါ်၊ ရေလယ်၊ ရေအောက်စသည်ဖြင့် နေထိုင်ကျက်စားမှု မတူညီသောကြောင့် ယင်းတို့ကို ကျွေးသည့် အစာအရည်အသွေးနှင့် ထုတ်လုပ်သည့် အစာပုံစံသည်လည်း မတူညီနိုင်ပါ။ ယေဘုယျအားဖြင့် အသားစားငါးများအတွက် Protein လိုအပ်ချက်သည် ကျန်အပင်စားနှင့် အစုံစား ငါးများထက် ပိုမြင့်မားမည်ဖြစ်သည်။ ထို့အတူ အသက်အရွယ် (အငယ်၊ အလတ်၊ အကြီး) တွင် အရွယ်အငယ်ဆုံးအချိန်သည် Protein လိုအပ်ချက်အများဆုံး ဖြစ်ပါသည်။ ထိုနည်းအတူ ရေချို၊ ရေငန်ပုစွန်များသည် အစုံစားသတ္တဝါများဖြစ်ပြီး သားပေါက် (Post Larvae) အရွယ်သည် သက်လတ်၊ သက်ကြီးအရွယ်ထက် Protein လိုအပ်ချက်ပိုမြင့်မားပါသည်။ ရေငန်ပုစွန်နဲ့ ရေချိုပုစွန်တွင်လည်း ရေငန်ပုစွန်သည် Protein လိုအပ်ချက် ပိုမြင့်မားပါသည်။

ကြီးထွားမှုအတွက်လိုအပ်သည့် Protein တစ်မျိုးတည်းအား အခြေခံ၍ ပြောမည်ဆိုလျှင် Protein ပါဝင်မှုမြင့်လေ အစာအရည်အသွေးကောင်းလေဟု ပြောဆို၍ ရနိုင်မည်လားဟုမေးလျှင် ဥပမာအားဖြင့် မြန်မာနိုင်ငံတွင်လက်ရှိမွေးမြူနေသည့် ရေချိုမွေးမြူရေးငါးများစုစုပေါင်း၏ ၇၀% ခန့်ရှိသည့် ငါးမြစ်ချင်း၊ ငါးကြင်းစသည့် ငါးများအတွက် အသားတိုးမွေးမြူခြင်းတွင် အမှန်တကယ် Protein လိုအပ်ချက်မှာ (၂၅%-၂၀%) ဖြစ်သော်လည်း Protein၄၀%ခန့် ရှိသော ပဲဖတ်ကိုကျွေးခြင်းဖြင့်ပို၍ ကြီးထွားမှုကောင်းမလာနိုင်ပါ။  ငါးများ အနေဖြင့် Protein ပိုမြင့်မားသော အစာကျွေးသော်လည်း ယင်းတို့ကြီးထွားရန် အမှန်လိုအပ်သည့် Protein (Amino Acid) ကိုသာ သုံးစွဲပြီး ကျန်သည်များကို မစင်အဖြစ် စွန့်ထုတ်မည် ဖြစ်သည်။

Proteinကို အကျယ်ပြောမည်ဆိုပါက နိုက်ထရိုဂျင် (Nitrogen) ဓာတ်ကို အခြေခံထားသည့် ဓာတုပစ္စည်းတစ်မျိုးဖြစ်ပြီး Amino Acids (Essential and Nonessential Amino Acids) များဖြင့်ဖွဲ့စည်းထားသည်။ အမိုင်နိုအက်ဆစ်အမျိုးအစားပေါင်း (၂၀) ခန့်ရှိပြီး ကြီးထွားမှုအတွက် မရှိမဖြစ် လိုအပ်သော အမိုင်နိုအက်ဆစ် (Essential Amino Acids – EAA) မှာ (၉) မျိုးခန့်ရှိပါသည်။

EAA လိုအပ်မှုသည် ရေနေသတ္တဝါမျိုးစိတ်အလိုက်၊ အသက်အရွယ်အလိုက် ကွဲပြားမှုရှိသည်။ ရေချိုရေငန် မတူညီမှုအပေါ်လည်း ကွဲပြားမှုရှိသည်။ ထို့အတူ ရေနေသတ္တဝါများကို ကျွေးသည့် အစာကုန်ကြမ်း (Raw Ingredients) များဖြစ်သည့် ကဇော်ဖတ်၊ ဖွဲနု၊ ပဲဖတ်၊ နှမ်းဖတ်၊ ပဲပုပ်ဖတ်၊ ပုစွန်ဖွဲ၊ ငါးပေါင်းမှုန့်တို့တွင် EAA အမျိုးအစားများပါဝင်မှုနှင့် ပါဝင်မှု ရာခိုင်နှုန်းများမတူကြပါ။ အချို့ကုန်ကြမ်းများတွင် အနည်းငယ်သာပါပြီး အချို့ကုန်ကြမ်းများတွင် ကြွယ်ဝမြင့်မားစွာပါဝင်ပါသည်။ ယင်းတို့ထဲတွင် ငါးပေါင်းမှုန့် (Fishmeal) သည် Protein မြင့်မားသလောက် EAA ပါဝင်မှု ကြွယ်ဝပါသည်။

အသားတိုးငါးမြစ်ချင်းငါးအတွက် လိုအပ်သည့် Protein (၂၅%) ရှိသော (သို့မဟုတ်) ယင်းထက်မြင့်မားသော မည်သည့်အစာကုန်ကြမ်းတစ်မျိုးတည်းကို ကျွေးစေကာမူ ယင်းငါးအတွက် အမှန်လိုအပ်သည့် EAA အချိုးအစား အပြည့်အဝ မပါနိုင်သဖြင့် ကြီးထွားမှုအတွက် အပြည့်အဝမရရှိနိုင်ပါ။ အသားတိုးငါးမွေးမြူရေးလုပ်ငန်း လုပ်ကိုင်သူများသည် ယေဘုယျအနေဖြင့် Protein ပါဝင်မှုကိုသာ ကြည့်၍ အကဲဖြတ်နေကြသည်။

သိပ္ပံနည်းကျဖော်စပ်ထားသည့် Formulated Feed ဖြစ်သည့် အစာတောင့် (Pellet) များတွင် EAA ပါဝင်မှုမြင့်မားသည့် Fishmeal ကုန်ကြမ်းကို အခြေခံ၍ စုစုပေါင်းကုန်ကြမ်းပစ္စည်း (၅) မျိုးခန့် ရောစပ်ထားပြီး ‌ရေနေသတ္တဝါ အမျိုးအစား၊ အသက်အရွယ်အလိုက် သင့်တော်မည့် ပုံစံနှင့်အရွယ် (Type & Size) များ ထုတ်လုပ်၍ မွေးမြူရေးအတွက် အကျိုးရှိစွာ အသုံးပြုနိုင်သည်။

ကုန်ကြမ်းပစ္စည်းအမယ်များ ရောစပ်ရခြင်းမှာ ကုန်ကြမ်းတစ်ခုခြင်းစီတွင် မတူညီသည့် EAA ပါဝင်မှုအရ မွေးမြူရေးငါးအတွက် အမှန်လိုအပ်သည့် EAA များ Protein တွင် အနီးစပ်ဆုံး ပါဝင်စေရန် ဖြစ်သည်။ 

ပိုမိုကောင်းမွန် အရည်အသွေးပြည့်ဝသည့် အစာဖြစ်စေရန်အတွက် ငါး၊ ပုစွန်အလိုက်လိုအပ်သည့် သတ္တုဓာတ်နှင့်ဗီတာမင်ဓာတ်များ ပေါင်းစပ်ဖြည့်စည်းပေးရန်လည်း လိုအပ်သည်။  

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

မာလာမြိုင် ကုမ္ပဏီ ကြော်ငြာ

ပြောင်ခင်းမှာ ပေါင်းရှင်းဖို့ ဘူဒိုဇာ လာပြီ ဒိုး... ပြောင်းခင်း စိုက်နေရင်း ပေါင်းခင်းမဖြစ်သွားရအောင် မအပ်စပ်တဲ့ ပေါင်းတွေအကုန်ဒိုးဖို့ "ဘူဒိုဇာ" လာပြီဗျို့။ ပြောင်းခင်းထဲက ပေါင်းတွေကို အမြစ်ပြတ် သုတ်သင်ပေးမယ့် အစွမ်းထက်ထက် ဆေးတစ်လက် ဆိုရင် ပေါင်းမနိုင်ခင် "ပြောင်း" နိုင်ဖို့ ပြောင်းအထူး ရွေးချယ်ပေါင်းသတ်ဆေး "ဘူဒိုဇာ" နဲ့ဆိုရင် ဘယ်ပေါင်းတွေ ခံနိုင်ပါ့မလဲ? အဓိကပေါက်တတ်တဲ့ "မြေဇာ၊ မြက်ယား၊ ဆင်ငို၊ လက်သဲခွ၊ ဝမ်းဘဲစာ၊ လေးခွမြက်၊ ဝက်ကျွတ်၊ တောဟင်းနုနွယ်၊ မှိုချဥ်၊ ဟင်းဂလာ၊ ခွေးသေးပန်း၊ ဗောက်ပင်၊ ဗောက်လောက်ညို၊ ဆေးပုလဲ၊ ပရန္နဝါ၊ မြက်မုန်ညင်း" တို့ကို အမြစ်ပြတ် အထူးနှိမ်နင်းဖို့ "ဘူဒိုဇာ" ရှိရင် စိတ်သာချလိုက် ဦးကြီးတို့ရေ။ ပြောင်းဖူးပင် တစ်လသားမပြည့်မီ ပေါင်းအရွက် (၂-၄) ရွက် ထွက်ချိန်မှာ အချိန်မှန်မှန်နဲ့ မြန်မြန် သုံးထားဖို့ပဲ တိုက်တွန်းလိုက်ချင်တယ်ဗျ။ လက်မနှေးဘဲ အခုပဲ ပြောင်းခင်းထဲကပေါင်းတွေ "ဘူဒိုဇာ" နဲ့ ရှင်းလိုက်ရအောင်။

Read more

Facebook page သို့သွားရန်