ခေတ်မီစွာနေထိုင်ပြုမှုစားသောက်ခြင်းဖြင့် သဘာဝကို ထိန်းသိမ်းပေးသင့်

22/08/2019 21:00 PM တွင် စိုက်ပျိုးရေးဉီးစီးဌာန စိုက်ပျိုးရေးဉီးစီးဌာန မှ ရေးသား ပြီး စိုက်ပျိုးရေးဉီးစီးဌာန စိုက်ပျိုးရေးဉီးစီးဌာန မှ ပေးပို့ထားပါသည်။

   သဘာဝပတ်ဝန်းကျင်ကို ကာကွယ်စောင့်ရှောက်ခြင်းသည် ကောင်းမွန်သည့်အချက်ဖြစ်ကြောင်းကို ကျွန်ုပ်တို့ လွန်ခဲ့သည့်နှစ်များကတည်းက သတိပြုမိခဲ့ကြပြီ။ ယနေ့ခေတ်ကာလတွင် သဘာဝအရင်းအမြစ်များသည် အကန့်အသတ်ဖြစ်လာသည့်အတွက် ကျွန်ုပ်တို့အနေဖြင့် ခေတ်မီစွာနေထိုင်ပြုမှုစားသောက်ခြင်းဖြင့် သဘာဝကို ထိန်းသိမ်းပေးသင့်၏။

   သဘာဝပတ်ဝန်းကျင်ကို သီးသန့်ရှိသည့်အရာဝတ္ထုဟု မထင်မှတ်ဘဲ ကျွန်ုပ်တို့အနေဖြင့် စွန့်ပစ်ပစ္စည်းများအနက် ပြန်လည်သုံးစွဲ၍ရသည့်အရာများကို ပြန်လည်သုံးစွဲခြင်းနှင့် မော်တော်ယာဉ်များမှ မီးခိုးငွေထုတ်လုပ်မှု လျှော့ချပေးခြင်းဖြင့် သဘာဝပတ်ဝန်းကျင်ကောင်းဖြစ်စေရန် ထိန်းသိမ်းပေးရာရောက်၏။ လူမရှိသည့်အခန်းတွင် လျှပ်စစ်မီးအလင်းရောင်ထွန်းထားမှုကို လျှော့ချခြင်းတို့သည် ကျွန်ုပ်တို့အတွက် အလွန်လွယ်ကူပြီး လိုက်နာကျင့်သုံးခြင်းဖြင့် သဘာဝပတ်ဝန်းကျင်ထိခိုက်မှုကို ကာကွယ်ပေးရာရောက်၏

   မြေကြီးအတွင်းရှိ သဘာဝအရင်းအမြစ်မှ အနာဂတ်တွင်စားသုံးနိုင်မည့် ကောင်းမွန်သည့် အစားအစာများကို ထုတ်ပေးနိုင်ရန်အတွက် ယခုကတည်းက မှန်ကန်ကောင်းမွန်သည့် ရွေးချယ်မှုကို ပြုလုပ်စားသုံးမှသာ အနာဂတ်အတွက်လည်း စိတ်ချရမည်ဖြစ်၏။ စားနပ်ရိက္ခာထုတ်လုပ်ခြင်းသည် သဘာဝပတ်ဝန်းကျင်ကို ကြီးမားသည့်ဆိုးကျိုးကို ဖြစ်စေရုံသာမက အချို့သော စားသောက်ကုန်များကို ထုတ်လုပ်ရာတွင် သဘာဝကို ပျက်စီးမှုများဖြစ်စေတတ်သည့်အတွက် ကျွန်ုပ်တို့အနေဖြင့် ကျန်းမာရေးအတွက် အမှန်တကယ် အထောက်အကူအပြုဆုံးဖြစ်မည့် အစားအစာမျာကို ရွေးချယ်စားသုံးရန် လိုအပ်၏။

   လက်ရှိတွင် သြစတြေးလျနိုင်ငံရှိ သက်ကြီးရွယ်အိုများအနက် ၇ ရာခိုင်နှုန်းထက်နည်းသည့်ပမာဏကသာ နေ့စဉ်စားသုံသည့်အစားအစာထဲတွင် ဟင်းသီးဟင်းရွက်ကို ထောက်ခံနှုန်းအတိုင်း စားသုံးလျက်ရှိသည့်အတွက် သင်၏ပန်းကန်ထဲတွင် အသားအစား ဟင်းသီးဟင်းရွက်များကို ဦးစားပေးပြီး ထည့်သွင်းစားသုံးသင့်ကြောင်း ဟင်းသီးဟင်းရွက်များကို အာဟာရပြည့်ဝစုံလင်စွာနှင့် ပမာဏလွန်ကဲစွာ စားသုံးခြင်းမဖြစ်စေရန် စနစ်တကျ ထုတ်ပိုးပေးထားသည်။

   ရာသီပေါ်သီးနှံများသည် အရည်အသွေးကောင်းမွန်ပြီး စျေးချိုကြသဖြင့် ယင်းတို့ကို စားသုံးသင့်ကြောင်း၊ ရာသီအလိုက် စိုက်ပျိုးထွက်ရှိသည့် သီးနှံများဖြစ်သည့်အတွက် သိုလှောင်ထိန်းသိမ်း ထားရှိမှု၊ ဝေးလံသည့်ဒေသတစ်ခုမှ အခြားဒေသတစ်ခုသို့ သယ်ယူပို့ဆောင်မှုများမရှိသည့်အတွက် သဘာဝပတ်ဝန်းကျင် ထိခိုက်မှုနည်းပါးသည်ဟုဆို၏။

   အသားများကို စားသုံးရာတွင်လည်း သင့်တော်သည့်ပမာဏဖြစ်သည့် ဖဲချပ်တစ်ချပ်အရွယ် ပမာဏခန့်သာ စားသုံးသင့်ကြောင်း ဖွံ့ဖြိုးပြီးနိုင်ငံများဖြစ်သည့် သြစတြေးလျနှင့် နယူးဇီလန် နိုင်ငံတို့တွင် ညစာပန်းကန်ထဲတွင် အသားထည့်သွင်းစားသုံးခြင်းကို တွေ့ရလေ့မရှိကြောင်း၊ ရိုးရာဓလေ့ထုံးတမ်းအစဉ်အလာအရ အထူးအစီအစဉ်များရှိသည့် အခြေအနေမဟုတ်ဘဲ အသားကို ညစားတွင် စားသုံးလေ့မရှိကြောင်း၊ အထူးအခြေအနေတစ်ရပ်အရ စားသုံးမည်ဆိုပါက ထောက်ခံထားသည့် ပမာဏအတိုင်းသာ စားသုံးပေးခြင်းဖြင့် သဘာဝပတ်ဝန်းကျင်ကို ထိန်းသိမ်းရာရောက်သည်ဟုဆို၏။

   သဘာဝပတ်ဝန်းကျင်အတွက် အစားအစာမျာကို ရွေးချယ်စားသုံးရာတွင် ကောင်းမွန်လတ်ဆက်သည့် ဟင်းသီးဟင်းရွက် အစားအသောက်များကို စားသုံးပေးခြင်းက ပိုမိုကောင်းမွန်ကြောင်း ပဲမျိုးစုံနှင့် အစေ့အဆံများ စားသုံးခြင်းသည် အာဟာရပြည့်ဝသည့်အပြင် ကျန်းမာရေးနှင့်လည်းကိုက်ညီပြီး ကုလားပဲ သို့မဟုတ် ပဲနီကလေးပြုတ် ပန်းကန်တစ်လုံးပမာဏ စားသုံးခြင်းသည် စံသတ်မှတ်ထားသည့် ပမာဏအတိုင်းရှိသည်ဆို၏။

ကြေးမုံငယ် - လယ်ယာစီးပွား