AMIAဈေးနှုန်းအတက်အကျ မြန်ဆန်သည့် ပြည်တွင်းအသားတိုးကြက်အရှင်ဈေးကွက်မှာ ယခု ဖေဖော်ဝါရီလအတွင်း ဈေးနှုန်းပြန်လည်မြင့်တက်လာကြောင်း ကြက်မွေးမြူရေးလုပ်ကိုင်သူများထံမှ သိရသည်။
ဖေဖော်ဝါရီ ၁၅ ရက်နေ့အထိ ရန်ကုန် မင်္ဂလာတောင်ညွန့် ကြက်၊ ဘဲဈေး၌ အသားတိုးကြက်အရှင် ခြံဖမ်းဈေးနှုန်းမှာ တစ်ပိဿာလျှင် ၁၂,၃၀၀ ကျပ်မှ ၁၂,၆၅၀ ကျပ်အထိ ရှိနေပြီး ဒိုင်ရောင်းဈေးမှာ ၁၃,၃၀၀ ကျပ်မှ ၁၃,၅၀၀ ကျပ်ဝန်းကျင်အထိ မြင့်တက်လာခြင်းဖြစ်သည်။
မန္တလေးနှင့် စဉ့်ကိုင် အသားတိုးဈေးကွက်တွင်မူ အသားတိုးကြက်အရှင် တစ်ပိဿာလျှင် ၁၆,၅၀၀ ကျပ်အထိ ဈေးပေါက်နေပြီး အခြားဒေသများတွင်လည်း တစ်ပိဿာလျှင် ၁၅,၀၀၀ ကျပ်မှ ၁၆,၀၀၀ ကျပ်အထက်တွင် ရှိနေကြောင်း သိရသည်။
"ကြက်ဈေးက ကျရင်လည်း ဆက်တိုက်ကျသလို တက်ရင်လည်း အရမ်းမြန်တယ်။ အဓိကကတော့ ဈေးကွက်ထဲ ကြက်အဝင်များရင် ဈေးကျပြီး အဝင်နည်းသွားရင် ဈေးတက်တာပါပဲ" ဟု မွေးမြူရေးအစာနှင့် ကြက်ပေါက်ရောင်းဝယ်ရေး လုပ်ကိုင်သူတစ်ဦးက ပြောကြားသည်။
လက်ရှိတွင် ရန်ကုန်ရှိကြက်မွေးမြူရေးခြံအချို့၌ ကြက်အသေအပျောက်များနေခြင်းကြောင့် ဈေးကွက်အတွင်းသို့ ကြက်ကြီးအဝင် နည်းပါးသွားခြင်းက ဈေးနှုန်းမြင့်တက်ရသည့် အဓိကအကြောင်းရင်း ဖြစ်သည်။ ထို့ကြောင့် ဇန်နဝါရီလကုန်ပိုင်းမှစတင်ကာ ယခု ဖေဖော်ဝါရီလလယ်အထိ ဈေးနှုန်းများ ဆက်တိုက်မြင့်တက်နေခြင်း ဖြစ်ကြောင်းလည်း သိရသည်။
ကြက်မွေးမြူရေးလုပ်ကိုင်သူ တစ်ဦးက "ကြက်ဈေးတက်တဲ့အချိန်မှာ ကြက်က ထင်သလောက်မဖြစ်ပြန်ဘူး။ ဒါက မွေးမြူရေးသမားတွေအတွက် ဒုက္ခတစ်မျိုးပါပဲ။ ကြက်တွေက ရက် ၂၀ သားလောက်ကစပြီး ကြီးထွားနှုန်း မတက်တော့ဘဲ ဖြစ်နေတယ်" ဟု ဆိုသည်။
ပြီးခဲ့သည့် ဇန်နဝါရီ ၂၀ ရက်ဝန်းကျင်က မန္တလေး၊ စဉ့်ကိုင်၊ မကွေး၊ မိတ္ထီလာနှင့် ပြင်ဦးလွင် အပါအဝင် ဒေသအသီးသီးတွင် အသားတိုးကြက်အရှင် ခြံဖမ်းဈေးမှာ တစ်ပိဿာလျှင် ၁၀,၀၀၀ ကျပ်မှ ၁၃,၀၀၀ ကျပ်ဝန်းကျင်သာ ရှိခဲ့သည်။ အလားတူ ရန်ကုန်ဈေးကွက်တွင်လည်း ဇန်နဝါရီ ၂၂ ရက်က ခြံဖမ်းဈေး တစ်ပိဿာလျှင် ၈,၈၀၀ ကျပ်မှ ၉,၃၀၀ ကျပ်ခန့်သာ ရှိခဲ့ရာမှ ယခုအခါ သိသိသာသာ မြင့်တက်လာခြင်း ဖြစ်သည်။
ကြက်အရှင်ဈေး မြင့်တက်လာမှုနှင့်အတူ အသားဈေးကွက်အတွင်း၌လည်း ကြက်သားဈေးနှုန်းများ လိုက်ပါမြင့်တက်လျက်ရှိသည်။ လက်ရှိတွင် ကြက်သား (အရိုးမပါ အသားသီးသန့်) တစ်ပိဿာလျှင် ၃၃,၀၀၀ ကျပ်၊ ရင်အုပ်သား (အသန့်) ၂၉,၀၀၀ ကျပ်၊ ရင်ညွန့် (အရိုးပါ) ၂၇,၀၀၀ ကျပ်နှင့် ပေါင်သား တစ်ပိဿာလျှင် ၂၇,၀၀၀ ကျပ်ခန့်အထိ ဈေးပေါက်နေကြောင်း သိရသည်။
AMIA (ဈေးကွက်နှင့် သတင်းအေဂျင်စီ)မှ အစိမ်းရောင်လမ်းဆော့ဝဲသို့ ပေးပို့ထားသော အစိမ်းရောင်လမ်း၏ မူပိုင်ဆောင်းပါးဖြစ်သဖြင့် ဆောင်းပါးများ၊ သတင်းများ ကူးယူဖော်ပြလိုပါက “အစိမ်းရောင်လမ်းမှ ကူးယူဖော်ပြပါသည်ဟု” ထည့်ပေးပါရန် မေတ္တာရပ်ခံအပ်ပါသည်။
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ question.title }}