ပဲစိုက်ပျိုးချိန် မျိုးစေ့နှုန်းထား လျှော့ချနိုင်ရန်အတွက် အကြံပြုချက် (၅) ချက်

မြန်မာ့ဆောင်းဦးပေါက်ကာလဖြစ်တဲ့ တန်ဆောင်မုန်း(နိုဝင်ဘာ)ဆိုတာ စပါးရိတ်သိမ်းအပြီး ဆောင်းသီးနှံအတွက် ထွန်ရေးပြင်နေကြချိန်၊ စိုက်ပျိုးချိန်ကာလလည်း ဖြစ်ပါတယ်။

တောင်သူလယ်သမားအများစုအတွက် လယ်ထဲ၊ ကိုင်းထဲ အလုပ်အများဆုံးကာလဆိုရင်လည်း မမှားပါဘူး။

ဒီလိုအချိန်မှာ စာရေးသူတို့လို တောင်သူပညာပေးဆွေးနွေးပွဲ ပြုလုပ်သူတွေဟာ တောင်သူတွေ နေ့လယ် ထမင်းစားနားချိန်ကို အချိန်လုပြီး ဆွေးနွေးပွဲ ပြုလုပ်ကြရပါတယ်။

ယခုလည်းပဲ ကျနော်ဟာ ပဲခူးတိုင်းအရှေ့ပိုင်း၊ ဒိုက်ဦး၊ ပြွန်တန်ဆာဘက်ကို ပဲတီစိမ်းသီးနှံစိုက်စနစ်များ၊ ပိုး၊ ပေါင်းရောဂါကာကွယ်နည်းစနစ်များကို ဆွေးနွေးဟောပြောဖို့ ရောက်ရှိနေတာဖြစ်ပါတယ်။

ကျနော်ရဲ့ထုံးစံအတိုင်း ဘယ်သီးနှံမဆို

*မြေမှန်၊ မျိုးမှန်၊ စိုက်နည်းမှန်၊ ရာသီမှန်အောင်စိုက်*..ဆိုတဲ့ မှန် ၄-မှန် ဆောင်ပုဒ်ကို အရင်ဦးစွာ ရှင်းလင်းဆွေးနွေးလေ့ရှိပါတယ်။

"မြေမှန် "ဆိုတာ ကိုယ်စိုက်ပျိုးမယ့် သီးနှံနဲ့ ကိုက်ညီတဲ့ မြေကြီးရဲ့ ချဥ်ငံကိန်း(pH) မှန်ကန်တာပါ။

(ဥပမာ..ပဲတီစိမ်း သီးနှံအတွက် မြေကြီးpH ဟာ ၅.၅- ၆.၈အကြားရှိသင့်ပါတယ်။)

မြေကို မပြင်ဘဲ အပင်ကိုချည်း ပြင်နေမယ်ဆိုရင် အထွက်မတိုးနိုင်ပါဘူး။

"မျိုးမှန်"ဆိုတာ ရာသီဥတု/ပိုး/ရောဂါဒဏ် ခံနိုင်ပြီး၊ ဒေသနဲ့ကိုက်ညီတဲ့ အထွက်ကောင်း မျိုးသန့် ဖြစ်တာပါ။

"စိုက်နည်းမှန်"ဆိုတာကတော့ ၁ဧက အပင်အရေအတွက်ကိုက်ညီတဲ့ ပင်ကြား×တန်းကြား အကွာအဝေး၊ မျိုးစေ့ အတိမ်အနက် စတဲ့ စိုက်ပျိုးနည်းစနစ်ကျနဖို့ကို ဆိုလိုပါတယ်။

"ရာသီမှန်အောင် စိုက်"ဆိုတာက သီးနှံတွေရဲ့ အပင်ပေါက်မှု၊ ကြီးထွားဖွံ့ဖြိုးမှု၊ သီးပွင့်ရင့်မှည့်မှုတွေဟာ ရာသီဥတုလို့ခေါ်တဲ့ အပူချိန်၊ နေ့တာ အတိုအရှည်၊ အစိုဓာတ် နည်းများမှုအပေါ် လုံးလုံးလျားလျား မူတည်နေပါတယ်။

ဒါကြောင့် သီးနှံ အကြိုက် ရာသီဥတုကို ချိန်ဆ တွက်ချက်ပြီး စိုက်ချိန် လုရခြင်း၊ မိုးလေဝသ ခန့်မှန်းရခြင်း၊ ထယ်ရေး/ထွန်ရေး အထူအပါး၊ စိုက်ရက်တို့ကို မှန်အောင်စိုက်ရခြင်းကိုဆိုလိုကြတာပဲဖြစ်ပါတယ်။

ဆွေးနွေးရင်းနဲ့ တစ်ဧက အသုံးပြုရမယ့် မျိုးစေ့နှုန်းထားအကြောင်း ပြောရင်း..

ဒီရွာမှာရော ပဲ၁ဧကကို မျိုးစေ့ ဘယ်လောက်နှုန်း ကြဲပက်ကြလဲ ဆိုပြီး မေးကြည့်တော့

တောင်သူကြီး ဦး ထွန်းမြင့်က "၁တင်းခွဲ နှုန်းကြဲတယ်ဆရာ" တဲ့။

အော်...များလှချည်လား.ဗျ၊ အပင်တွေမထူလွန်းဘူးလား..လို့ ပြောတော့..

"အပင်ပေါက်လာတော့လဲ..အနေတော်ပါပဲ ဆရာ"လို့ ဆိုပါတယ်။

ဧရာဝတီတိုင်း၊ ဓနုဖြူမြို့နယ်က ကိုသိန်းစံဆီ ဖုန်းနဲ့လှမ်းမေးကြည့်တော့ မတ်ပဲ ၁ ဧကအတွက် ၁၂ ပြည်-၁၄ ပြည် ကြဲပါတယ်လို့ ဆိုပြန်တော့

စာရေးသူရဲ့ အတွေးထဲမှာ ဘာကြောင့်မျိုးစေ့နှုန်းထားတွေများများကြဲလာရသလဲ ဆိုတဲ့ မေးခွန်းကို ဖြေရှင်းရင်း ဒီစာစုလေးကို ရေးသားတင်ပြရခြင်းဖြစ်ပါတယ်။

"အမှန်တကယ် လိုအပ်သည့်မျိုးစေ့ပမာဏ"

စစ်ကိုင်း၊ မကွေးကဲ့သို့ အညာဒေသကုန်းပိုင်းထွန်ရေးပြင်မှာ မျိုးစေ့ချထွန်နဲ့ စိုက်ရင် ပဲတီစိမ်းမျိုး ၆ ပြည်-၈ ပြည်ပဲ စိုက်ကြပါတယ်။

ပဲတီစိမ်း၊ မတ်ပဲ ၁ ဧက ရှိသင့်သည့် အပင်အရေအတွက်= ပျမ်းမျှ -၁သိန်းခွဲရရန်..

၁ ဧက လိုအပ်သည့်မျိုးစေ့ ၁ သိန်းခွဲ= ခန့်မှန်း ၆ ပြည်-၈ ပြည်(အတန်းစိုက်စနစ်)

၁၀ ပြည်-၁၂ ပြည်( ပက်ကြဲ စနစ်)

Green life crop protection(Africa)ရဲ့ ပဲတီစိမ်းမျိုးစေ့ချရန် ထောက်ခံနှုန်းထားမှာ

တန်းကြား×ပင်ကြား (၁၈လက္မ×၆လက္မ)စိုက်စနစ်အတွက်

4-6kgs(၂ပြည်-၃ပြည်) လောက်သာ ဖော်ပြပါတာတွေ့ရပါတယ်။

အကြမ်းဖျဥ်း တွက်ကြည့်မယ်ဆိုရင်လည်း...

ပဲတီစိမ်း နို့ဆီ၁ဗူး=အစေ့ ၁ သောင်းထားပါက

၁ ပြည်=အစေ့ ၈သောင်း

၂ ပြည်= အစေ့ ၁သိန်း ၆သောင်း

(၁စေ့ ၁ ပင်ပေါက်ခဲ့ရင်၊ ၁ဧက အပင်၁သိန်းခွဲ ရနိုင်ပါတယ်)

မျိုးစေ့တွေအများကြီး သုံးကြတဲ့အပေါ် စာရေးသူ အတွေ့အကြုံအရ ဥာဏ်မီသလောက်စဥ်းစားကြည့်တော့..

အတန်းစိုက်စနစ် မဟုတ်ခြင်း။
ထယ်ထိုးကြဲစနစ်တွင် အစေ့နက်လွန်းခြင်း။
အပင်ငယ်၊ အသေအပျောက်များလာခြင်း။
ပင်စည်ထိုးယင်/ပိုးကိုက်လောက်စား များလာခြင်း။
အပင်ပါးပါးကို ၊အမြင်အရ အားမရခြင်း။

(တောင်သူတယောက်အပြောမှာ"ထူသော် မမှား၊ ပါးသော် မယားဆူ" တဲ့ဆရာ)

ပေါင်းပေါက်ရောက်မှု နည်းစေခြင်း စတဲ့အချက်တွေကြောင့် မျိုးစေ့နှုန်းထားမြင့်လာရခြင်း ဖြစ်နိုင်ပါတယ်။

မျိုးစေ့နှုန်းထားများခြင်းရဲ့ ဆိုးကျိုးတွေရှိပါတယ်။ အဲ့တာတွေကတော့

မျိုးစေ့များရင် အပင်ထူမယ်၊ အပင်ထူရင် ပိုး/ရောဂါ ပိုများပါတယ်။ အဲ့ကျရင် ဆေးသုံးစွဲမှု ကုန်ကျစရိတ် ပိုများစေပါတယ်။ အပင်ထူရင် အသီးကိုင်းဖြာထွက်မှုနည်းတဲ့အတွက် အထွက်နှုန်းလျော့စေပါတယ်။ မျိုးစေ့အသုံးများတဲ့အတွက် ကုန်ကျစရိတ် ပိုများစေပါတယ်။ (၁ ဧက=၁၆ ပြည်ကြဲရင် ၆ ပြည်စာပိုကုန်ပါတယ်။ တစ်နိုင်ငံလုံး ပဲစိုက်ဧက ၃သန်း နဲ့တွက်ရင် ပဲတင်းရေ ၁၀သိန်းကျော် ဆုံးရှုံးနိုင်ပါတယ်။)

မျိုးစေ့နှုန်းထား လျှော့ချနိုင်ရန်အတွက် အကြံပြုရမယ်ဆိုရင်

မျိုးကောင်း မျိုးသန့်ကို ရှာဖွေအသုံးပြုပါ။
မျိုးစေ့ မကြဲမီ မျိုးလူးဆေး အသုံးပြုပါ။
မျိုးစေ့ကို မြေကြီး နက်နက် မချပါနှင့်။ (အထူးသဖြင့် မျိုးကြဲပြီးမှ ထယ်နက်နက်ထိုးခြင်းသည် မျိုးစေ့ဆုံးရှံးနိုင်ပါသည်။)
အစိုဓာတ်ကို အမိအရဖမ်းစိုက်ပါ။
စိုက်ချိန် နောက်မကျအောင် အချိန်လုစိုက်ပါ။ (ရေနက်ကွင်း၊စပါးရိုးပြတ်များ၊ရေခမ်းအောင်စောင့်ပြီး၊ထယ်ရေးစောင့်မည့်အစား၊ ခုတ်ဖုံးစနစ်ဖြင့် စိုက်ချိန်လုသင့်ပါတယ်)

ကဲဗျာ..နိဂုံးအနေနဲ့ ပဲစိုက်တောင်သူများ သီးနှံတွေအထွက်တိုးပြီး၊ စျေးကောင်းရကြပါစေ။

စေတနာများစွာဖြင့်..

ဒို့ဦးလေး

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...