ရွက်ဖျန်းမြေဩဇာများ၏ အားသာအားနည်းချက်များနှင့် သတိပြုသင့်သည်များ

18/02/2022 14:30 PM တွင် ဇင်ထူးနိုင် ဇင်ထူးနိုင် မှ ရေးသား

ရွက်ဖျန်းမြေဩဇာတွေ အသုံးပြုတဲ့ တောင်သူတွေရှိကြပါသလား? ရွက်ဖျန်းမြေဩဇာတွေနဲ့ မြေမှာထည့်ပေးရတဲ့ မြေဩဇာတွေက ဘာတွေ ကွာခြားပါသလဲ? 

ရွက်ဖျန်းမြေဩဇာတွေ အသုံးပြုခြင်းဟာ အပင်တွေကို အာဟာရဓာတ်ရရှိအောင် အစာကျွေးတဲ့ နည်းလမ်းတွေ ထဲက တစ်မျိုးဖြစ်ပါတယ်။ ရွက်ဖျန်းမြေဩဇာတွေ အသုံးပြုခြင်းဖြင့် အပင်အတွက် အမှန်တကယ်လိုအပ်တဲ့ အာဟာရဓာတ်ကို အပင်ဆီသို့ အတိအကျပို့ပေးနိုင်ပါတယ်။ ဒီနည်းလမ်းနဲ့ အပင်တွေကို အစာကျွေးခြင်းဟာ အပင်ရဲ့ အစာရေကြောစနစ်တွေထဲကို တိုက်ရိုက်စီးဝင်သွားနိုင်ပြီး ဆေးတွေရဲ့ အာနိသင်ကို ၄၈ နာရီအတွင်း တွေ့မြင်နိုင်မှာ ဖြစ်ပါတယ်။ အမြစ်ကနေ လုံလောက်အောင် စုပ်ယူနိုင်ခြင်းမရှိတဲ့ အာဟာရဓာတ်တွေကို အရွက် မှာရှိတဲ့ လေရှူပေါက်တွေကနေတဆင့် တိုက်ရိုက်စုပ်ယူစေပြီးမှ အပင်ရဲ့အခြားသော အစိတ်အပိုင်းများဆီ ပို့ဆောင်ပေးတာ ဖြစ်ပါတယ်။

ရွက်ဖျန်းမြေဩဇာဆိုရာမှာ ဓာတုဆေးတွေရှိသလို သဘာဝပစ္စည်းတွေနဲ့ ပြုလုပ်ထားတဲ့ မြေဩဇာတွေလည်း ရှိပါတယ်။ ရွက်ဖျန်းမြေဩဇာများ အသုံးပြုခြင်းဖြင့် သီးနှံအထွက်နှုန်းကောင်းစေခြင်း၊ သီးနှံအရည်အသွေး ကောင်းစေခြင်း စတာတွေနဲ့ ချိတ်ဆက်မှုရှိနေသလို တစ်ဖက်မှာလည်း သတိပြုရမယ့်အချက်တွေရှိနေပါတယ်။

ယေဘူယျအားဖြင့် အောက်ဖော်ပြပါ အခြေအနေတွေ တွေ့ရမယ်ဆိုရင် ရွက်ဖျန်းမြေဩဇာတွေ အသုံးပြုဖို့ အတွက် အကြံပြုပါတယ်။ 

- မြေဆီလွှာ သမမျှတမှုမရှိဘဲ မြေချဉ်ခြင်း၊ ငံခြင်း 

- မြေဆီလွှာအစိုဓာတ် နိမ့်လွန်းခြင်း၊ မြင့်လွန်းခြင်း 

- အမြစ်တွင် ရောဂါကျရောက်နေခြင်း

- မြေဆီလွှာတွင် အာဟာရမျှတမှုမရှိခြင်း 

- ပိုးနဲ့ ရောဂါများကျရောက်နေခြင်း 

- အပူဒဏ်ခံရခြင်း စတဲ့ အခြေအနေတွေ ဖြစ်ပါတယ်။ 

ရွက်ဖျန်းမြေဩဇာရဲ့ အကျိုးကျေးဇူးများ

၁။ အပင်မှ အာဟာရဓာတ်များလျင်မြန်စွာ ရရှိခြင်း

ရွက်ဖျန်းမြေဩဇာတွေ အသုံးပြုခြင်းရဲ့ ထူးခြားချက်တစ်ခုကတော့ အပင်တွေဟာ များသောအားဖြင့် ချက်ချင်း နီးပါးကို အာနိသင်တုံ့ပြန်မှု ပြကြတာဖြစ်ပါတယ်။ ရွက်ဖျန်းမြေဩဇာတွေ အသုံးပြုခြင်းဟာ မြေဆီလွှာမှာ ထည့်ပေးရတဲ့ အာဟာရဓာတ်တွေထက် ၁၀ ဆ ပိုမြန်တဲ့နှုန်းထားနဲ့ အပင်ကရရှိနိုင်ပါတယ်။ ဒါ့ကြောင့် အပင်မှာ အာဟာရချို့တဲ့မှုပြဿနာတွေကို လျင်မြန်စွာကုသနိုင်ဖို့အတွက် ရွေးချယ်မယ်ဆိုရင် ရွက်ဖျန်းမြေဩဇာများကို ရွေးချယ်သင့်ပါတယ်။ 

၂။ လိုအပ်သောအာဟာရဓာတ်ကို အပင်ဆီသို့ အတိအကျပို့ပေးနိုင်ခြင်း

ရွက်ဖျန်းမြေဩဇာများအသုံးပြုခြင်းဖြင့် အပင်ရဲ့ ကြီးထွားမှုအဆင့်ဆင့်အလိုက် လိုအပ်တဲ့ အာဟာရဓာတ် ပမာဏအမျိုးမျိုးကို ရွေးချယ်ပြီးကျွေးနိုင်ပါတယ်။ လိုအပ်တဲ့ပမာဏကို အတိအကျပေးနိုင်တဲ့အတွက် သီးနှံအထွက်နှုန်းရော သီးနှံအရည်အသွေးကိုပါ မြှင့်တင်ပေးနိုင်ပါတယ်။ 

၃။ ရေငတ်ဒဏ်ခံနိုင်ရည်ရှိခြင်း

မြေဆီလွှာမှာ အစိုဓာတ်လုံလောက်စွာ မရှိခဲ့ရင် အာဟာရဓာတ်တွေကို မြေမှာထည့်ပေးတဲ့ နည်လမ်းက အကျိုးမရှိနိုင်ပါဘူး။ အဲ့ဒီလိုအချိန်မှာ အာဟာရဓာတ်တွေကို အပင်ကကောင်းစွာ စုပ်ယူနိုင်စေဖို့အတွက် ရွက်ဖျန်းမြေဩဇာများကို ရွေးချယ်အသုံးပြုနိုင်ပါတယ်။ 

 

ရွက်ဖျန်းမြေဩဇာတွေရဲ့ အားနည်းချက်

- ရွက်ဖျန်းမြေဩဇာတွေ အသုံးပြုတဲ့အခါ တစ်ခါတရံမှာ အပင်ရဲ့ အာဟာရလိုအပ်မှု ပမာဏအတိုင်း မရနိုင်တာမျိုးတွေ ရှိနိုင်ပါတယ်။ 

- ရွက်ဖျန်းမြေဩဇာတွေမှာ အာဟာရဓာတ်ပါဝင်မှု များတာကြောင့် ရေငွေ့ပျံတာမျိုးတွေနဲ့ ဆားဓာတ် ကျန်ခဲ့တဲ့ အခါမျိုးတွေမှာ အရွက်တွေကို လောင်ကျွမ်းစေနိုင်ပါတယ်။ 

- အရွက်တွေကို မတော်တဆလောင်နိုင်တဲ့အတွက် ပမာဏအနည်းငယ်ကိုပဲ အကြိမ်ရေများများနဲ့ အသုံး ပြုရတာမို့ လုပ်အားခပိုကုန်နိုင်ပါတယ်။ 

ရွက်ဖျန်းမြေဩဇာအသုံးပြုရာတွင် ဂရုစိုက်ရမည့်အချက်များ

၁။ ပတ်ဝန်းကျင်အပူချိန်ကို သတိပြုပါ

ရွက်ဖျန်းမြေဩဇာတွေအသုံးပြုမယ်ဆိုရင် ပတ်ဝန်းကျင် အပူချိန်ကိုသတိပြုစေချင်ပါတယ်။ အခန့်မသင့်ရင် မြေဩဇာအရည်ကို ဖော်စပ်ထားတဲ့ဖော်မြူလာအရည်များနဲ့ အပူတို့ပေါင်းစပ်ပြီး အရွက်တွေကို လောင်ကျွမ်း စေနိုင်တဲ့အတွက် ဖြစ်ပါတယ်။ အရွက်လောင်သွားတဲ့အခါ အပင်ရဲ့ရှင်သန်နိုင်မှုကိုပါ အန္တရာယ်ဖြစ်စေနိုင်ပါတယ်။ ရွက်ဖျန်းမြေဩဇာတွေ အသုံးပြုမယ့်အချိန်မှာ ပတ်ဝန်းကျင်အပူချိန်ဟာ ၂၄ ဒီဂရီစင်တီဂရိတ်အောက်မှာပဲ ရှိနေသင့်ပါတယ်။ အပူချိန်အပြင် ပတ်ဝန်းကျင်ရဲ့ စိုထိုင်းဆကိုလည်း ဂရုပြုဖို့လိုအပ်ပါတယ်။ ဒါ့ကြောင့် ဖျန်းမယ် ဆိုရင် မနက်ပိုင်း ၉ နာရီမတိုင်ခင်နဲ့ ညနေဆိုရင် ၄ နာရီနောက်ပိုင်းမှာ ဖျန်းသင့်ပါတယ်။ 

၂။ ရာသီဥတုအခြေအနေကို သတိပြုပါ 

ရွက်ဖျန်းမြေဩဇာတွေကို မြေဆီလွှာအစိုဓာတ်မရှိတဲ့အချိန်မှာလည်း အသုံးပြုနိုင်တယ်ဆိုပေမယ့် အစိုဓာတ် ရှိနေရင်တော့ ဆေးရဲ့အာနိသင်ပိုမိုထိရောက်မှာ ဖြစ်ပါတယ်။ ဆေးဖျန်းပြီး ၂၄ နာရီအတွင်း မိုးမရွာမှသာ အာနိသင်ထိရောက်ပြီး အကောင်းဆုံးဖြစ်တာမို့ ဆေးဖျန်းမယ့်အချိန်မှာ ရာသီဥတုအခြေအနေတွေကို သတိပြု ပြီးမှ ဖျန်းသင့်ပါတယ်။ 

ဇင်ထူးနိုင် 

ကိုးကားချက် 

- https://hylineproducts.com/ 

- အစိမ်းရောင်ခြံ - Green Farm 

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။


ဗွေဆော်ဦး ကြော်ငြာ

ကိုယ်မွေးထားတဲ့ ငါး၊ ပုစွန်လေးတွေ မြန်မြန်ကြီး၊ များများရှင်စေချင်တယ်ဆိုရင်... အားဆေးကောင်းလေးတွေ ရှိနေပါတယ်ရှင့်... ငါး၊ ပုစွန်လေးတွေ အားရှိသန်မာထွားကျိုင်းသွားစေမဲ့ Aqua Calcium, Aqua Booster, Aqua Mix ဆိုတဲ့ ဆေးလေးတွေပါနော်.. Aqua Calcium ဆိုတာက.. နာမည်နဲ့လိုက်အောင်ပဲ ငါး၊ ပုစွန်တွေအတွက်လိုအပ်တဲ့ ကယ်လ်ဆီယမ်များ ခဲပျစ်ပါဝင်နေတဲ့ အရည်မျိုးဖြစ်ပြီး ဗီတာမင်စီလည်း ပါဝင်ပါတယ်ရှင့်..။ ဒါလေးထည့်ပေးလိုက်ရင် ငါး၊ ပုစွန်တွေရဲ့ ကြီးထွားနှုန်း၊ အရွယ်အစားနဲ့ အသက်ရှင်နှုန်းတို့ကို မြှင့်တင်ပေးပြီး ကန်ထဲမှာလည်း နိုက်ထရိတ်များလျော့ကျအောင် ဆောင်ရွက်ပေးမှာပါနော်..။ Aqua Booster ဆိုတာကတော့… ဘတ်တီးရီးယား၊ ဗိုင်းရပ်၊ ပရိုတိုဇိုအာတွေရဲ့ တိုက်ခိုက်မှုကို ခံနိုင်ရည်ပိုရှိစေမဲ့ အရေးပါတဲ့ ဇီဝကမ္မဆိုင်ရာ အာဟာရအားတိုးဆေးမျိုးပါ။ သူ့မှာက သြဂဲနစ်အက်စစ်အမျိုးမျိုး၊ glycan နဲ့ အမိုင်နိုအက်ဆစ်များ ပေါင်းစပ်ပါဝင်နေလို့ ငါး၊ ပုစွန်တွေရဲ့ ကျန်းမာရေးကော ဇီဝကမ္မဖြစ်စဉ်ကိုကော ကူညီထောက်ပံ့ပေးနိုင်ပါတယ်ရှင့်။ ဒါ့အပြင် အာဟာရစုပ်ယူနိုင်စွမ်းမြင့်စေပြီး အစာခြေအင်ဇိုင်းများကို လှုံ့ဆော်ပေးသလို ဘက်တီးရီးယားဒဏ်ကို လည်း ခံနိုင်ရည်ရှိစေလို့ ကြီးထွားနှုန်းနဲ့ ရှင်သန်နှုန်း မြင့်တက်စေမှာပါနော်။ နောက်တစ်ခု... Aqua Mix ကကောဆိုရင်တော့.. သူက ကယ်ဆီယမ်၊ မဂ္ဂနီဆီယမ်နှင့် ပိုတက်ဆီယမ် ပါဝင်တဲ့ အရောအ‌နှောဖြစ်လို့ ငါး၊ ပုစွန်လေးတွေရဲ့ အသက်ရှင် နှုန်းကို တိုးမြင့်စေပြီး အစာခြေစနစ်ကိုလည်း တိုးတက်စေပါတယ်။ ပြီးတော့ ကြွက်သားများ ကျုံ့ခြင်းတင်းခြင်းများကိုလျော့စေကာ အရေခွံလဲနှုန်းမြင့်စေပြီး အခွံများကို ပိုမာကြော လာစေနိုင်ပါတယ်။ ဒါတင်ပဲလားဆိုတော့...မဟုတ်သေးဘူး...ကြီးထွားနှုန်းလည်း ပိုကောင်းလာပြီး ဖမ်းဆီးချိန်မှာ အသွေးအရောင် လည်း ပိုလှနေစေမှာ ဖြစ်ပါတယ်ရှင့်။ ဆိုတော့ ဒါလေးတွေကို သုံးပေးမယ်ဆိုရင်... ငါး၊ ပုစွန်လေးတွေ ရှင်သန်ကြီးထွားနှုန်းမြင့်မားလာနိုင်တာဆိုတော့... ဝင်ငွေပိုတိုးလာမယ်ဆိုတာက ပြောနေစရာတောင် လိုမှာမဟုတ်ပါဘူးနော်.. ဒါလေးတွေလိုချင်တယ်ဆိုရင်တော့ ‘ဗွေဆော်ဦး’ မှာ ရနေပါပြီရှင့်...
Read more Facebook စာမျက်နှာသို့သွားရန်

ဆွေးနွေးချက်များ

ဆွေးနွေးရန်