ဇင်ထူးနိုင်ရွှေဖရုံသီးပင်တွေဟာ ဖော်ရွေတဲ့ သီးနှံတွေဖြစ်ပြီး ၎င်းတို့ရဲ့ အနီးအနားမှာ အခြားသီးနှံတွေ စိုက်ပျိုးတာကို ကြိုက်နှစ်သက်သလို ညီအစ်မသုံးဖော်လို့ တင်စားခေါ်ဝေါ်ကြတဲ့ သီးနှံ ၃ မျိုးထဲက ၁ မျိုးလည်းဖြစ်ပါတယ်။
ရွှေဖရုံသီး၊ ပြောင်း နဲ့ ပဲပင်တွေကို ညီအစ်မသုံးဖော်လို့ ခေါ်ဆိုကြပြီး အတူ ပေါင်းစပ်စိုက်ပျိုးကြတာ ဖြစ်ပါတယ်။ ဒီသီးနှံ ၃ မျိုးကို ပေါင်းစပ်ပြီး စိုက်ပျိုးခြင်းဟာ ထူးဆန်းတယ်လို့ ထင်ရပေမယ့်လည်း တကယ်စိုက်ပျိုးကြည့်တဲ့အခါမှာ အချင်းချင်း အပြန်အလှန် အကျိုးဖြစ်ထွန်းစေနိုင်တာလည်း ဖြစ်ပါတယ်။
သင့်တော်တဲ့ သီးနှံတွေကို အတူယှဥ်တွဲပြီး စိုက်ပျိုးခြင်းဟာ အကျိုးအမြတ်ရရှိနိုင်တဲ့ နည်းလမ်းကောင်း တစ်ခုဖြစ်ပါတယ်။
အဓိကရရှိနိုင်တဲ့ အကျိုးကျေးဇူးတွေကတော့ မြေနေရာချွေတာနိုင်ခြင်း၊ မြေဆီလွှာကျန်းမာရေး ကောင်းမွန်စေခြင်း၊ ရုပ်ပိုင်းဆိုင်ရာဂုဏ်သတ္တိများ ထောက်ပံ့ပေးနိုင်ခြင်းနဲ့ ပိုးမွှား ထိန်းချုပ်နိုင်ခြင်း စသည်တို့ဖြစ်ပါတယ်။ သီးနှံတွေစိုက်ပျိုးရာမှာ အမျိုးအစားပေါ်မူတည်ပြီး တွဲဖက်စိုက်ပျိုးနိုင်တဲ့ ဥပမာများစွာရှိသလို ရွှေဖရုံသီးတွေဟာ အနီးအနားမှာစိုက်ပျိုးတဲ့ အခြားသော သီးနှံတွေနဲ့ ကောင်းစွာ အလုပ်လုပ်ဆောင်နိုင်တဲ့ အပင်တွေ ဖြစ်ပါတယ်။ ရွှေဖရုံသီး စိုက်ပျိုးတဲ့အခါ ၎င်းအတွက် သင့်တော်တဲ့ အဖော်သီးနှံတွေကို ရွေးချယ်စိုက်ပျိုးမယ်ဆိုရင် ပိုမိုကောင်းမွန်တဲ့ အပင်ကြီးထွားမှု အခြေအနေတွေကို ရရှိနိုင်မှာဖြစ်သလို ပိုးမွှားကျရောက်နိုင်မှုနည်းပြီး သီးနှံပင်အချင်းချင်း အကျိုးဖြစ်ထွန်းစေတဲ့အခါ သီးနှံစိုက်ခင်းတွေကို ထိန်းသိမ်းပြုစုရာမှာလည်း လုပ်အားနည်းသွားစေမှာ ဖြစ်ပါတယ်။ ယခုဆောင်းပါးမှာတော့ ရွှေဖရုံသီးနဲ့ ဘယ်လို သီးနှံတွေကို တွဲဖက်စိုက်ပျိုးနိုင်မလဲဆိုတာ မျှဝေပေးသွားမှာ ဖြစ်ပါတယ်။
ပြောင်း
ပြောင်းပင်ဟာ ညီအစ်မသုံးဖော်ထဲက တစ်ဦးအဖြစ် အထက်မှာ ဖော်ပြထားခဲ့ပြီး ဖြစ်ပါတယ်။ ပြောင်းဖူးနဲ့ ရွှေဖရုံသီးတွေကို ခေတ်အဆက်ဆက် အတူတကွ စိုက်ပျိုးခဲ့ကြတာပါ။ ပြောင်းဖူးပင်တွေဟာ နေရောင်ခြည်များစွာလိုအပ်ပြီး ၎င်းရဲ့အပင်အမြင့်ဟာ ရွှေဖရုံသီးအတွက် အရိပ်ပေးတဲ့အတွက်ကြောင့် ၎င်းတို့ဟာ အပြန်အလှန်အကျိုးပြုနိုင်တာ ဖြစ်ပါတယ်။ ထို့အပြင် ပြောင်းဖူးဟာ ရွှေဖရုံသီးရဲ့ နွယ်ပင်တွေ တက်နိုင်ဖို့အတွက် ရိုးတံအနေနဲ့လည်း ထောက်ပံ့ပေးတာ ဖြစ်ပါတယ်။
အခြားတစ်ဖက်မှာဆိုရင်လည်း ရွှေဖရုံသီးဟာ အပင်ကြီးထွားလာတာနဲ့အမျှ မြေပေါ်မှာဖြန့်ကျက် ပေါက်ရောက်နိုင်တာဖြစ်ပြီး ပေါင်းမြက်တွေ ပေါက်ရောက်နိုင်မှုကိုလည်း အနည်းဆုံးဖြစ်အောင် ထိန်းသိမ်းပေးနိုင်တာ ဖြစ်ပါတယ်။ ထို့အပြင် ရွှေဖရုံသီးရဲ့ နွယ်ပင်တွေနဲ့ အရွက်တွေဟာ မြေဆီလွှာအတွင်း အစိုဓာတ်ထိန်းပေးဖို့ကို ကူညီဖန်တီးပေးနိုင်ပြီး အမြစ်များ အပူလွန်ကဲခြင်းကနေလည်း ကာကွယ်ပေးနိုင်မှာ ဖြစ်ပါတယ်။
ပဲတောင့်ရှည်
ညီအစ်မသုံးဖော်ထဲက နောက်ဆုံးကျန်တဲ့ တစ်ဦးကတော့ ပဲပင်ဖြစ်ပါတယ်။ ကံကောင်းစွာနဲ့ပဲ ပြောင်းဖူးပင်ဟာ ပဲပင်ကြီးထွားဖို့အတွက် လိုအပ်တဲ့ ရိုးတံကို ပံ့ပိုးပေးနိုင်တဲ့အတွက် သီးနှံစိုက်ခင်းတွေမှာ နေရာအပို ရရှိစေမှာ ဖြစ်ပါတယ်။ ထို့အပြင် ပဲပင်ဟာ ရွှေဖရုံသီးတွေ ဖြစ်ထွန်းအောင်မြင်ဖို့အတွက် လိုအပ်တဲ့ နိုက်ထရိုဂျင်ဓာတ်တွေကို မြေဆီလွှာထဲ ပြန်လည်ဖြည့်သွင်းပေးခြင်းဖြင့် အာဟာရဓာတ်ကို ဆာလောင်နေတဲ့ ရွှေဖရုံသီးတွေအတွက် အာဟာရဓာတ် ရရှိစေနိုင်မှာ ဖြစ်ပါတယ်။
ထို့အပြင် ပဲပင်တွေဟာ ပြောင်းဖူးတွေမှာ ကျရောက်တတ်တဲ့ အဖျက်ပိုးမွှားတွေ ဖြစ်ကြတဲ့ ကျိုင်းပိုး၊ ရွက်စား ဖြုတ်ပိုးနဲ့ ငမြှောင်တောင်ပိုး ကဲ့သို့ အဖျက်ပိုးတွေကို ဖမ်းယူစားသောက်တဲ့ အကျိုးပြုအင်းဆက်များ လာရောက်နိုင်အောင် ဆွဲဆောင်နိုင်တာ ဖြစ်ပါတယ်။
မုန်လာဥဖြူ
ရွှေဖရုံသီးနဲ့ တွဲဖက်စိုက်ပျိုးနိုင်တဲ့ ညီအစ်မ ၄ ဖော်သာရှိခဲ့မယ်ဆိုလျှင် ပြောင်းဖူး၊ ပဲ၊ ရွှေဖရုံသီးတို့နဲ့ အလွန်လိုက်ဖက်တဲ့ သီးနှံဟာ မုန်လာဥဖြူ ဖြစ်ပါတယ်။ အေးတဲ့ရာသီဥတုဟာ မုန်လာဥဖြူ စိုက်ပျိုးဖို့အတွက် အသင့်တော်ဆုံးဖြစ်ပေမယ့်လည်း ၎င်းတို့ဟာ အပူဒဏ်ကိုလည်း အသင့်တင့် ခံနိုင်ရည်ရှိတာ ဖြစ်ပါတယ်။ မုန်လာဥဖြူဟာ ၎င်းနဲ့တွဲဖက်စိုက်ပျိုးတဲ့ အပင်တွေမှာ ကျရောက်တတ်တဲ့ ကျိုင်းပိုးကဲ့သို့ အဖျက်ပိုးမွှားတွေကို မလာရောက်နိုင်အောင် ကာကွယ်ပေးထားခြင်းဟာ ထူးခြားတဲ့ အားသာချက်ဖြစ်ပါတယ်။ ရွှေဖရုံသီးပင်တွေရဲ့အနီးမှာ မုန်လာဥဖြူစိုက်ပျိုးခြင်းဟာ ဆာလောင်နေတဲ့ အဖျက်ပိုးမွှားများကို ၎င်းတို့ရဲ့ အရွက်စိမ်းတွေပေါ်မှာပဲ စားသောက်ဖို့အတွက် ပိုးမွှားများကို ဆွဲဆောင်ထားနိုင်တာ ဖြစ်ပါတယ်။ အထူးသဖြင့် မုန်လာဥဖြူဟာ ရွှေဖရုံသီးမှာ ကျရောက်တတ်တဲ့ Squash Borer ကဲ့သို့ ပိုးမွှားတွေကို တွန်းလှန်ရာမှာ ထိရောက်မှု ရှိတာ ဖြစ်ပါတယ်။
ထပ်တရာပန်း
ချစ်တီးပန်းလို့လည်း ခေါ်ဆိုကြတဲ့ ထပ်တရာပန်းပင်တွေဟာ ရွှေဖရုံသီးပင်တွေနဲ့ ကောင်းစွာ အလုပ်လုပ်နိုင်သော သန်မာတဲ့ အပင်တွေဖြစ်ပါတယ်။ ထပ်တစ်ရာပန်းတွေဟာ အလှဆင်ရုံသပ်သပ် အသုံးဝင်တာမျိုးမဟုတ်ဘဲ ဆေးဘက်ဆိုင်ရာနဲ့ စိုက်ပျိုးရေးလုပ်ငန်းတွေမှာလည်း အကျိုးပြုပါသေးတယ်။ စိုက်ပျိုးရေးမှာဆိုရင် ထပ်တစ်ရာပန်းတွေကို သီးနှံစိုက်ခင်းတွေမှာ ထောင်ခြောက်သီးနှံ (Trap crop) အနေနဲ့လည်း အသုံးချနိုင်ပါတယ်။ ၎င်းတို့ဟာ ရေလည်း များများစားစား မလိုအပ်ဘဲ ရေဆင်းကောင်းတဲ့ မြေဆီလွှာမှာ ရှင်သန်ဖြစ်ထွန်းနိုင်တာ ဖြစ်ပါတယ်။ ထပ်တရာပန်းဟာ သီးနှံစိုက်ခင်း အတော်များများမှာ တွဲဖက်စိုက်ပျိုးနိုင်ပြီး အကျိုးရှိစေတဲ့ ပန်းပင်တစ်မျိုးဖြစ်ပါတယ်။
ထို့အပြင် ထပ်တရာပန်းပင်တွေဟာ ဗူး၊ ဖရုံ၊ သခွား တွေမှာ ကျရောက်တတ်တဲ့ ကျိုင်းနဲ့ ဂျပိုး အုပ်စုဝင် ပိုးမွှားတွေကို ဟန့်တားပေးနိုင်တာကြောင့် ရွှေဖရုံသီးပင်တွေကို ဘေးကင်းစေမှာလည်း ဖြစ်ပါတယ်။ ထပ်တစ်ရာပန်းပွင့်တွေဟာ အချိန်တော်တော်ကြာကြာ ပန်းပွင့်နိုင်တာကြောင့် ပန်းပွင့်နေတဲ့ ကာလတစ်လျှောက်လုံးမှာ လိပ်ပြာ၊ ပျားအပါအဝင် အခြားသော ဝတ်မှုန်ကူး အင်းဆက်တွေလာရောက်နိုင်တဲ့ အရင်းအမြစ်ကောင်း တစ်ခုလည်းဖြစ်ပါတယ်။ စိုက်ခင်းထဲ (သို့မဟုတ်) စိုက်ခင်း ပတ်ဝန်းကျင်မှာ ထပ်တစ်ရာပန်းပွင့်တွေ ရှိနေခြင်းအားဖြင့် ဇာတောင်ပိုး၊ လိပ်ခုံးကျိုင်း၊ ကပ်ပါးနဂျီကောင်၊ ပျစားယင် အပါအဝင်အခြားသော အကျိုးပြုအင်းဆက်တွေကိုပါ စိုက်ခင်းဆီသို့ ဆွဲဆောင်နိုင်မှာဖြစ်ပြီး ပျ အပါအဝင် အခြားသော သီးနှံအဖျက်ပိုးတွေကိုပါ သဘာဝအတိုင်း ကာကွယ်ပေးနိုင်မှာ ဖြစ်ပါတယ်။
တောင်ကြာကလေး
တောင်ကြာကလေးအပင်ဟာလည်း သီးနှံစိုက်ခင်းတွေမှာ ပိုးမွှားများစွာကို ဟန့်တားနိုင်တဲ့ အစွမ်းသတ္တိရှိတာကြောင့် တွဲဖက်စိုက်ပျိုးသင့်တဲ့ အပင်ဖြစ်ပါတယ်။ တောင်ကြာကလေးအပင်ဟာ အစိုဓာတ်နိမ့်ပြီး မြေဆီဩဇာနည်းတဲ့ နေရာတွေမှာလည်း ရှင်သန်ပေါက်ရောက်နိုင်ကြတာ ဖြစ်ပါတယ်။ ၎င်းတို့ရဲ့ ရှင်သန်ကြီးထွားနိုင်မှု အခြေအနေတွေဟာ ရွှေဖရုံသီးပင်တွေနဲ့ အပြည့်အဝ သဟဇာတမဖြစ်ပေမယ့်လည်း ရွှေဖရုံသီးပင်တွေရဲ့ အနီးတစ်ဝိုက်မှာ စိုက်ပျိုးထားရှိခြင်းဖြင့် ပိုးမွှားထိန်းချုပ်ရာမှာ ထိရောက်မှု ရှိစေမှာ ဖြစ်ပါတယ်။ အဓိကအားဖြင့် တောင်ကြာကလေးဟာ ရွှေဖရုံသီးမှာ ကျရောက်တတ်တဲ့ ဂျပိုးနဲ့ ကျိုင်းအုပ်စုဝင် ပိုးမွှားတွေကို ထိရောက်စွာ ကာကွယ်ပေးနိုင်တာ ဖြစ်ပါတယ်။ ထို့အပြင် တောင်ကြာကလေးဟာ ရွှေဖရုံပင်တွေအတွက် ဝတ်မှုန်ကူးပေးနိုင်တဲ့ အကျိုးပြုအင်းဆက်တွေ လာရောက်နိုင်အောင်လည်း ဆွဲဆောင်နိုင်တာ ဖြစ်ပါတယ်။
အထက်မှာ ဖော်ပြခဲ့တာကတော့ ရွှေဖရုံသီးပင်တွေနဲ့ အတူယှဥ်တွဲစိုက်ပျိုးတဲ့အခါ အကျိုးရှိစေမဲ့ အဖော်ပင်တွေဖြစ်ကြပြီး တွဲဖက်မစိုက်ပျိုးသင့်တဲ့ အပင်တွေလည်းရှိပါတယ်။ တွဲဖက်မစိုက်ပျိုးသင့်တဲ့ အပင်တွေကတော့ အာလူး၊ ကြက်သွန်၊ ပန်းဂေါ်ဖီ၊ ကိုက်လန်၊ ဖရဲ၊ သခွား စတဲ့အပင်တွေဖြစ်ကြပါတယ်။ ဖရုံ၊ သခွား၊ ဖရဲ စတဲ့ သီးနှံတွေဟာ "Cucurbitaceae" ဆိုတဲ့ မျိုးရင်းထဲမှာ ပါဝင်နေတဲ့ သီးနှံတွေဖြစ်ပြီး သူတို့မှာ အဖျက်ပိုးနဲ့ ရောဂါကျရောက်မှု တူညီကြသလို အာဟာရလိုအပ်ချက်တွေလည်း တူညီနေကြတာကြောင့် ဖြစ်ပါတယ်။ အာလူးပင်တွေဆိုရင်လည်း ဖရုံသီးပင်တွေလိုပဲ နိုက်ထရိုဂျင်နဲ့ ဖော့စဖောရပ်စ်ဓာတ်ကို လိုအပ်တာချင်း တူညီကြသလို အနီးကပ်စိုက်ပျိုးတဲ့အခါ မှိုရောဂါတွေကိုပါ ကူးစက်ပျံ့နှံတတ်တာကြောင့် ဖရုံနဲ့ အာလူးကို အတူစိုက်ပျိုးတာမျိုးရှောင်ရှားသင့်ပါတယ်။
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
ဗွေဆော်ဦး ကြော်ငြာ
Aqua ဘူစတာ
Aqua ကယ်လဆီယမ်
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ comment.comment }}
{{ question.title }}